سرگال: پاکستانئ پوج ھر وھدہ جمھورین وڑئ گیچئن بوتگین حکومتئ پانادا اوشتاتگیت، پہ راستی؟

بہ پاکستانئ یک مذھبین و سیاسین جماعت، جمعیت العلمائ اسلام سروک فضل الرحمن بہ موجودین حکومتا عمران خانی حلاپا بہ اسلام آباد دست بہ سَکین احتجاج و ریلئ احتمام آ کرتگیت و لوٹتگیت کہ سرئ وزیر عمران خان ھر چی زودتر شہ وزارتا عزمائ استفاء دنت۔ مولانا فضل الرحمن بہ نومبرئ اولا ای ریلے احتمام کنگا بوتگیت و پہ سرئ وزیرا تاناکا دو روچ وخت اشتہ کہ بری نیاما باید انت کہ استفاء دنت۔ آی آزاتئ مارچ ای مارچئ ناما اشتگیت کہ بہ آی مین اسٹریم اپوزیشنئ گل گون یکئ انت، آوان مُچین شنت کہ عمران خان دھاندلئ وڑئ گیچئن کارئ برتگیت و شرؔین وڑئ و معنوین رازئ عوامئ منڈیٹا بہ دست نیاورتگیت۔ بیدئ ایشی آی ای الزاما جتگیت کہ موجودین حکومت شہ عوامین مسئلہ انی حل کنگا عاجز انت و پاکستانئ معیشیتا دیم بہ تباھی آ برتگیت۔ بہ پسوئ عمران خان شہ استفاء دیگا انکار کرتگیت۔ اپوزیشنئ سرا الزام جتگیت کہ آوان بی کانونین راھانا بہ دیما گپتگنت و گیچئن بوتگین حکومتئ را لوٹنت کہ شگون کننت و بہ عمران خانی نیمہ داریا پوج رازئ کہ امیت شوت پورہ ئن وڑئ پانادی اوشتاتگنت۔ پوج گشتگیت کہ پاکستانئ پوج بہ دنیائ تھا باز دسپلینئ واوندئ پوجئ انت و ھیچبر نہ لوٹیت کہ گیچئن بوتگین حکومتئ را گیرمستحکم کنگئ کوشستا کنت۔ پاکستانئ سلیحبندین پوجئ گوشوک، میجر جنرل عاصف غفور بہ گئوستگین یکشنبہ بہ وتی بیانا گشتگیت کہ پاکستانئ پوج یک گیرنیمہ دارین ریاستین ادارہ انت کہ کانونئ احتراما کنت و ھر وھدہ گیچئن بوتگین حکومتئ پانادا اوشتاتگیت پہ امیشا پہ ھیچ ڈلئ و یا کسئ ایشی اجازتا نہ دنت کہ حکومتئ گیرمستحکم کنگئ کوشستا کنت۔ سبحان اللہ ای پاکستانین پوجئ دعوی انت؟ کہ پاکستانئ تاریخ کم شہ کم نیمئ راستامین وڑئ حکمرانی و ھر وار تہ تچکین وھدان پاکستانئ عواما شہ جمھوریتا محروم ساتتگتنت۔ ھمی پوجئ گوشوک کہ آوانی سرا کم شہ کم دو گئوستگین سرئ وزیرانا ھونئ الزام انت و ای دعوئ اوشکتہ باز عجب معلوم بیت۔ پاکستانئ پوج ای سلیحبندین پوجانا جمھوریت و کانونئ ساتوک زانتگیت کہ آی جنرل ھر وار بہ جمھورئ گیچئن بوتگین حکومتان شہ واکدارئ گیرکانونین وڑئ یک نیمگ کرتہ و وت واکا غصب کرتگنت ایش بیدئ یک جوئ دیگہ چیزئ انت۔

پوجین ڈیکٹیٹر جنرل پرویز مشرفی حبر اگہ بیت ، آی نواز شریفا نہ تاناکا شہ واکا زورت، بلکہ آی سرا بہ دھشت گردیئ بھرا بازین الزام ھم جتہ و جیلئ تھا دیمی دات و رندا آی را و آی کھول آ بہ جلاوطنی آ دیم داتئ۔ رندا شہ ۲۰۰۸ گجام راستامین پوجین دشمنئ نہ بوتگیت مگہ شہ ای حکیکتا منکر بوتگ نہ کننت کہ ھمی پاکستانئ پوج بہ سومی گیچئن بوتگین سرئ وزیر نواز شریفی حلاپا محاذئ سَککنگا بوت۔ وھدہ کہ آی حکومت بہ سلیحبندین پوجا رانشاندیوکی کرتیت کہ دھشت گردین ڈلانی لگاما گرنت کہ شہ آوانی وجا پاکستان بہ دنیائ تھا نام بد انت۔ بہ ایشیجاگہ بہ نواز شریفی حلاپا سازشئ جال پرینتنت و عدالت و احتسابئ بیورو بہ ریاستا چُنتی ادارہ ان کار گپتہ و آی را و شہ آی خاندانا چُنت کسا بہ جیلئ تھا پرینتنت و نواز شریف نون ھم بہ جیلئ تھا انت و حالی ھم باز نازروک انت و ای الزاما پاکستانئ مردم پوجئ سرا وارد کنگا انت۔

موجودین حکومت شہ گیرمستحکم بیگئ رکینگا و جمھورین قدرانی ساتتنئ دعوئ داروک ھمی پوج و آی چیف آرمی جمھوریت نوازئ مثالئ وڑا بوتگنت۔ گیندیت ۲۰۱۷ اکتبرا انتھا پسند و دھشت گردین ڈل تحریک لبیک پاکستانا بہ اسلام آباد مظاھرہ کرتنت و بی کانونی ھم بری مظاھرہ اتیت و پولیسانی سرا ھلگر ھم کرتنت و کانونی وزیرئ استفاء لوٹوک ھم بوتنت۔ دیگہ آ وھدہ پوج پہ جمھوریتئ ساتتنا نیاتیت بلکہ آوان پہ مظاھرہ کنوکان زر داتنت کہ گیشتر مظاھرہ کننت و سرئ وزیر ھم مجبور پہ آوانی مُچین لوٹگانی منگا کرتنت۔ ایش انت گیندنت بہ آ وھدہ کانونئ وزیرئ استفاء لوٹوک بوتنت بہ آوانی گیرکانونین کاران و کاروائیانیش شہ چما پرینتنت پہ چہ کہ آ حکومت نواز شریفی گلئ اتیت۔ ایش انت نکل پاکستانئ پوجئ دسپلین و جمھوریتئ نیمہ داری۔