سرگال:عمران خان ائے سیاسی پریشانی

عمران خان گوستی ایں سال ریاست ائے باز طاغتور ادارہ آنی تعاون او واہریائی آگو سروکی چکا تہ آتکا ،مگہ آنہی آ ہماں جوش آگو سروکی وتی دست آ گتا او پاکستان ائے عوام او ورنا طبقہ آنژ وعدہ او دعوی کھُزئی ہمائی وجہ آژ ہر وٹا امیت پیدا بیسغئے سا او باز مڑدم ہماں کہ سیاست زانتکار آنی دعوی او وعدہ آنی اصلیت آژ پوہ نیا آنہانر باور بیسا کہ اصل آ پاکستان آ مزن ایں بدلاؤ بی اغ والا ایں۔سجوں آنژ گیش امیت معاشی حالت آنی بارو آ بیسا کہ عمران خان ائے سرکار پاکستان آ معاشی بحران آژ درا کھنت ۔عمران خان آ بدعنوانی او دھشت گردی آ آسر کھنغ آپا دی مزن ایں دعوی کھُزگاں ۔مگہ چھی اے ہی وخت آ اٹکل بیسا کہ عمراں خان ہر محاذ چکا نوسوب بیسا۔سیاسی ماحول اندرا دی باز اُتھل پُتھل پیدا بیسا۔باز جلدی مڑدم آنر اے محسوس بیسا کہ عمران خان ائے سرکار سیاسی سطح چکا صلاح ائے سلوخ اپنائینغ ائے بجائے جھیڑوئی دگ چکا جزغیں۔
عمران خان آ ہمیں ٹؤک ائے باور اسا کہ پؤج ائے آنہی چکا دست رکھیائی ایں او آں آنہی ہر جائیز
او ناجائیز فیصلہ آنہی گون بی مگہ شاید آنہی آ ہمیں ٹؤک چکا ویچار نہ کھُزا کہ پؤج وتی کار تہ
سیاست زانتکار ائے بُڑزا زوار بیسؤ کشی مگہ وتی عزت آ نقصان پُجھینتھؤ آں ہمیں وڑھچھ سیاست
ائے مہرہ نویس بی۔مثال آ نی ایں روش آں پیسر ائے سروزیر نواز شریف ائے ناجوڑی ائے مسلہ آ
چوش کہ آنہی آر عدالت آژ اے اجازت ملسا کہ آں علاج آپا لندن برؤ مگہ عمران خان آنہی حق آ نیا۔
نوازشریف ائے حالت ہمیختر ردین اسا کہ اے گمان پیدا بیسغئے سا کہ اگر آنہی حالت اینگا رہسا او
آں پاکستان آژ درا علاج آپا نہ شُزا تہ چنتی سوال کھڑو بی آں ۔پؤج اے لوٹھغئے سا کہ نوازشریف آ
درا علاج آپا روغ ائے اجازت مِلی برؤ اگر ھُزا نہ کھنت کہ چھی اے بیسا تہ مچھیں الزام پؤج چکا
کھائے ،نی تکا پؤج چکا زوالفقار علی بھٹو او بینظیر بھٹو ائے الزام آسیب ائے وڑا آنہی پھدا ایں۔
اگر نواز شریف آ چھی اے بیسا تہ کاص ڈؤل چکا صوبہ پنجاب آ پؤج آپا وتی دیم بھچینغ مشکل بی رؤ۔آنگا تہ عمران خان ائے دیگر اتحادی دی اے نہ لوٹھاں کہ ہمیں حالت آ نوازشریف ائے پاکستان
آژ درا روغ آ ھچھ خلل بی۔باز دیگر ٹؤک آنژ دی عمران خان آ باز دھکو مان آتکا ۔مولانا فضل الرحمن آ آزادی مارچ ائے جار جھزا ۔پاکستان ائے سیاسی او حوال کار آنی دھُر آنی نیمگا ہمیں ٹؤک
ائے باز چرچہ ایں کہ عمران خان محسوس کھنغیں کہ نی آنہی ساکھ باقی نہ رہسا ہماں کہ گچین کاری آژ سرا اسا۔عمران خان آ نی محسوس بی غیں کہ آنہی پھاز آنی بُبا ڈغار تلشغیں ۔