سرگال:چین ۔پاکستان اقتصادی راہداری ائے سوب مندی چکا کھڑو بی اغ والا سوال

چین ،پاکستان اقتصادی راہداری ائے پروجیکت بلا گمان یک مزن ایں پروجیکت ایں ہمائی چکا چین آ پاکستان اندرا مزن ایں پھیمانہ چکا سرمایہ کاری کھُزا او کھنغیں۔پاکستان آ ہمیں پروجیکٹ آپا ہماں کہ امیت ہاغ کھنائینتھی آ شزغاں ۔آنہی بارو آ البت سنجیدہ دھُر آنی نیمگا وڑ وڑ ائے سوال پیدا بی گاں۔ہمیں سنجیدہ دھر آ وا پاکستان ائے باز اقتصادی زانتکار ،سیاست زانتکار او پروجیکٹ ائے تکنیکی او اقتسادی ٹک آنی چکا نیاہ ماکھنغ والا مڑدم او بین الاقوامی زانتکار دی اوار آں ۔پاکستان ائے چنتی مزن ایں سیاسی دھُر او سرکار ائے وٹاژ ہمیختر امیت داسی آ شُزا کہ آنہی آ مبالغہ گیش مان آغیں۔اے ویچار پدھر کھُزی آ رؤغیں کہ اے پروجیکٹ وتی کارکردگی ائے سبب آژ پاکستان ائے اقتصادی حالت بدل بی او ہر وٹا وشحالی نیاہ کھائے ۔اگر اینگا بیسا تہ اشی آژ مزن ایں ٹؤک چھے بی ۔پاکستان ائے نی ایں اقتصادی حالت باز پکر دؤخ انت او اینگین آ یک دھُر آ اگر اقتصادی راہداری  ائے بارو آ امیت جوڑ سؤ ایر کھزغاں تہ اے یک ھزائی ٹؤک انت۔مگہ چھی اے گمان ہمیں پروجیکت ائے بارو آ وا پاکستان اندراسرا آژ موجوت آں۔یک شکایت تہ اے رہسا کہ چین ائے وتی مفاد گیش ایں ،پاکستان ائے کھمین ۔اے دی گوشتی آ رؤغیں کہ پاکستان ائے کمپنی آنی ھچھ خاصیں نپ او کھٹ نعیں ۔آں گیشتر نقصان آ ایں ،وا نی ایں سروزیر عمران خان ہمیں پروجیکٹ ائے حلاپ اسا۔یک دھکا تہ آنہی پارٹی آ مزن ایں احتجاج ائے پروگرام دی کھزغئے سا مگہ آںہماں وخت اپوزیشن اسا۔پاکستان ائے کے ای دھُر آں ہمیں اقتسادی رہداری ائے پروجیکٹ آ نوخیں ایسٹ انڈیا کمپنی آگو دی تعبیر کھُزا۔چین پاکستان اقتسادی راہداری ائے یک دوہمی ٹک دی ایں ہمائی ائے ردین اثر بین الاقوامی پھیمانہ چکا دی محسوس کھُزی آ رؤ۔اصل آ اے چین ائے ہمیں ہمہ گیر پروجیکٹائے بہر ایں ہمائی آ آں بیلٹ اینڈ روڈ انیشیٹو ائے ڈؤل چکا گیش کھنغی،بیلٹ اینڈ روڈ انیشیٹو ائے تجربہ شَر ایں تجربہ نعین آنہی آگو چین مالیہ تہ دئے غیں مگہ عامین ویچار اش انت کہ آں قرض  ائے صورت آ اینگا کھنغیں ۔قرض دئے اغ آ چین سجوں آنژ اگا ایں مگہ آنہی بارو آ تفصیل نہ ڈسی اینگا کھزؤ چین ہماں ملک آنی گمان آنر گیش کھنغیں ہماں کہ وتی ترقی پروجیکٹ آنی آپا چین آژ قرض گتا۔