سرگال:ہانگ کانگ آ جمہوریت ائے گواس

نی ایں روش آں ہانگ کانگ آ ضلع کونسل ائے گچین کاری بیسا۔اے گچین کاری اینگے وخت آ بیسا ہماں وخت گوستی ایں شش ماہ آژ سٹی اسٹیٹ ،احتجاج او مظاہرہ آنی زد آ ایں۔ہر وٹا سڑک آنی چکا احتجاج او جھیڑو نیاہ پھیزاغاں۔ہمیں جھیڑو آنی پھدا کے ای وڑ ائے قصو دی اُش کھنغ آ مِلغاں۔ہانگ کانگ آ مجموعی وڑا ۱۸ ضلع آنی کونسل آں ہمائی آپا گچین کاری بیسا ۔چوش کہ سروکی آ اے ھچھ مزن ایں اہمیت ائے ادارہ نیاں بلکہ بُنی ایں سطح ائے ادارہ آں آنہاں نی زمہ واری دی گیش نیاں ہمائی اندرا عامین شہری آنی بنیاتی ایں ڈؤل ائے آساقی او ٹریفک لائیسنس آنی خیال ایر کھنغ بی مگہ بہر حال ضلع کونسل ائے گچین کاری ائے اہمیت ضرور بی او چوش کہ اے جمہوری ایں ادارہ آں ہمیں خاطرہ جمہوریت آپا عامین مڑدم آنی رحجان ائے دی اٹکل جھنغ بیس بی ۔یک مزن ایں عرصہ آژ ہومزا جھیڑو جزغاں ہمائی اندرا ہانگ کانگ ائے ورنا طبقہ گیش بہر گرغیں۔احتجاج او مظاہرہ آنی نیمگا ھَندے ھَندے آ پُر تشدد دپ دی بی آں ۔ہمیں خاطرہ اے گشغ بیس بی کہ ناوشی ائے ہمیں ماحول آ ھزائی ڈؤل چکا ووٹر آنی اندرا جوش نیاہ پھیزاغیں۔اے دی گوشتی آ رؤغیں کہ ووٹنگ ائے شرح باز گیش رہسا او ۷۰ پیصد آژ گیش مڑدم آں ووٹ داسغاں۔آنہی مُکٹ دی ورنا آنی سغر چکا ایں ۔گچین کاری ائے نتیجہ آنژ کل بی کہ ہژدہ کونسل آنژ ۱۷ چکا جمہوریت پسند دھُر آ قوضہ کھُزا درگتہ کہ اسٹیبلشمنٹ آ منغ والا دھُر آنی بہر آ چھڑوئی آ یک کونسل آتکا۔باسک آنی تعداد ۴۵۲ ایں ہمائی آژ ۳۹۲ باسک جمہوریت پسند پارٹی آنی گچین بیسغیں آں او چھڑوئی آ شست سیٹ اسٹیبلشمنٹ ائے منغ والا آنر ملسغاں ۔نی تک ائے سجوں آنژ کھمین سیٹ آنہاں نی بہر آ آتکغاں
ضلع کونسل ائے گوستی ایں گچین کاری ۲۰۱۵ آ بیسغئے سا ۔ہماں وخت مشکل آژ ۴۷ پیصد پولنگ بیسغئے سا۔گیر بی کہ نی ایں گچین کاری آژ سرا اسٹیبلشمنٹ ائے منغ والا پارٹی ائے قوضہ ۲۹۲ سیٹ آنی چکا اسا۔