سرگال:باجوہ ائے ایکشن چکا مزن ایں عدالت ائے فیصلہ سویلین سروکی آپا اختیار استعمال کھنغ ائے وسیلہ

پاکستان ائے مزن ایں عدالت آ پاکستان ائے آرمی چیف جنرل باجوہ ائے مدت کار آ توسیع کھنغ ائے فیصلہ آ داشتؤ اصل آ یک مزن ایں بحث آپا دگ سدھا کھُزا ۔اصل آ آرمی چیف ائے مدت ملازمت آ توسیع  آ  اصل آ عدالت آ نہ داشتا بلکہ فوری ایں ڈؤل چکا سئے سال آنی بجائے شش ماہ ائے ایکسٹینشن آ عارضی ایں ڈؤل چکا منظوری داسؤ سرکار چکا اے زمہ واری ماکھزا کہ آں تکنیکی خامی او ضابطہ آنی حلاپ ورزی آنر دیر کھنت او رسمی ایں وڑا آرمی چیف ائے ایکسٹینشن یا برحالی آپا ھچھ قانون ٹھائینی تاکہ ھچھ دی گمان باقی نہ بھچی۔مزن ایں عدالت آ گویا پارلیمان آ اے اختیار داسا کہ آں ہمیں فیصلہ آ ھچھ فیصلہ کھنت۔مزن ایں عدالت آ یک آئینی بحران آ ٹالسا مگہ پاکستان ائے سروزیر او آنہی سرکار آ مزن ایں سبکی دیما کھنغی بیسا۔سری ایں سوال اے کھڑو بیسا ہمینگا کہ عدالت آ اشارہ داسا کہ سروزیر عمران خان آ وتی وٹاژ ۱۹ اگست آ ہی نوٹیفیکیشن
جاری کھزا کہ جنرل باجوہ آ سئے سال ائے مدت کار آ اکسٹینشن داسی آ شزا ۔گیر بی کہ آنہی ائے
مدت کار ہمیں سال ۲۹ نومبر آ آسر بی اغ والا اسا ۔درگتہ کہ آرمی چیف آر ایکسٹینشن دئے اغ ائے
اختیار صدر آر بی ۔عدالت آ ہماں وخت کابینہ ائے منظوری ائے سوال کھڑو کھزا او باز بے ضابطگی آنر پدھر کھزئ تہ کابینہ ائے ہنگامی بیٹھک لوٹھائینتھی آ شزا او دوہمی نوٹیفیکیشن جاری
کھزی آ شزا او آنہی آ اے گوشتی آ شزا کہ آرمی چیف ائے ملازمت آ توسیع پؤج ائے ضابطہ ۲۵۵
ائے روگا کھزی آ رؤغیں مگہ عدالت آ ہمیں ٹؤک نہ منسا او سرکار آ گیر کھنائینتھئی کہ ضابطہ ۲۵۵ائے اطلاق نوی پھرچھے کہ آرمی چیف ائے مدت کار آ توسیع یا پدوارغ برحالی یا آئین ائے
دفعہ ۲۴۳ ائے صدر مملکت کھز کھنت ۔عدالت ائے سئے نفری بینچ آ آرمی چیف آپا مشروط ایکسٹینشن ائے فیصلہ کھُزا۔نی سرکار آگو شش ماہ آنی وخت ایں او ہمیں نیمگا آنہی آ پارلیمان آژ اے قانون پاس کھنائینغ ائے کاروائی پورا کھنغی بی۔عمران خان آپا اے اصل ایں امتحان ائے گھڑی بی۔شش ماہ آنی ہمیں عرصہ جنرل باجوہ اوپؤج آپا باز پریشانی ائے بی پھرچھے کہ ۲۹ نومبر آ
پھدا آنہی مدت کار اوآنہی اگا توسیع پارلیمان ائے اختیار آ بی۔