سرگال:دین ائے بے حرمتی ائے نام چکا پاکستان آ ظلم او جبر

براسگی،ُب او برداشت نہ چھڑوئی آ مچھیں مزہب آنی بنیاتی ایں اصول ایں بلکہ مڑدمی حق آنی خاصیں بہر ایں ۔ھچھ دی ملک ائے معاشرہ اگر ہمیں بنیات آنی سرا ٹھائینتھی آ برؤ تہ آں راستیں وٹا ترقی کھنت ۔وتی آژ جتا ویچار آنر برداشت نہ کھنغ او وتی ویچار آنر دوہمی آنر مڑھغ آژمعاشرہ ائے میل کمزور بی  او آنہی ترقی جکھی رؤ۔پاکستان ائے معاشرہ ہمیں مشکل آنر دیما کھنغیں ۔پاکستان ائے معاشرہ اندرا روژن ویچار آنی کمی ایں۔پاکستان اندرا اگہ کھسے عقل او دانشمندی ائے ٹؤک کھنت تہ آنہی آر نشانہ کھزی آ رؤ ایزا تکا کہ آنہی حون دی کھُزی آ رؤ۔مئے دیما اینگے چنتی مثال آں ۔جنید حفیظ آر پھاہو ائے سزا اش کھنائینغ ائے مسلہ وتی وڑ ائے سری ایں مسلہ نعیں ۔پاکستان اندرا اینگے مسلہ آنی مزن ایں لسٹ ایں ،ہمائی اندرخاصیں بھیرا اقلیت او عامیں ڈول چکا اکثریت فرقہ ائے مڑدم آنر نشانہ کھزی آ رؤ۔پاکستان ائے صوبہ پنجاب ائے پیسر ائے گورنر سلمان تاثیر ائے انجام آژ کھئے پوہ نعیں ۔آں چھڑوئی آ دین ائے بے حرمتی ائے نام چکا بی اغ والا تشدد چکا پابندی جھنغ آپا قانون اندرا بدلاؤ ائے مطالبہ کھنغئے سا ۔آنہی آر آنہی رکھو آ باز بے دڑدی آگو کُشتغئے سا۔سلمان تاثیر ائے مسلہ ہمیں خاطرہ حبر آنی اندرا رہسا پھرچھے کہ آں یک مقبول مڑدم اسا۔آنہی اے پھجی آ ہماں دی مسلہ بین الاقوامی حبر آنی اندرا رہسا آں آسیہ بی بی ائے اسا۔ہمیں عیسائی زائیف آر دی دین ائے بے حرمتی کھنغ ائے نام چکا پھاہو ائے سزا اش کھنائینتھی آ شزغئے سا او قید او بند دیما کھنغی بیسغئے سا ۔آخیر کار مزن ایں عدالت آ آنہی آر بری کھُزا،بری بی اغ آ پھدا آنہی ائے پاکستان آ رہغ ممکن نیا ہمیں خاطرہ آں پاکستان السؤ شزا ۔پاکستان اندرا عقل ائے ٹؤک کھنغ خطر ناک ایں ،پرچھے کہ کھدیں کھسے آر تھاں ٹؤک سیب نیائے ھچھ گُشغ نویس بی۔پاکستان ائے زانتکار دھُر ملک آ رہغ آ باڑہ نیاں ۔ہماں مڑدم آں درا پڑھیائی کھُزا آں پاکستان ائے اندری حالت آنر دیستؤ گڑدغ آ باڑہ نیاں ۔آنہار اے پکر لاحق بی کہ آں اینگے ماحول اندرا تھانگا رہاں ہموزا کہ ساہ بند بی۔ہموزا کہ ویچار پدھر کھنغ ائے دی آجوئی نعیں ۔چنتی سال آنژ پاکستان اندرا برداشت ائے کمی ایں۔ سوال اے پیدا بی کہ ہمیں ملک آر ایزا تکا پُجھینغ ائے زمہ وار کھئے ایں ۔ھچھ دی ملک ائے ود او ترقی آپا ہموزا ائے سرکار،ادارہ او دانشمند طبقہ ائے خاصیں عمل دخل بی۔پاکستان آ سروکی آ آئیغ والا ایں سرکار آ وتی زمہ واری پھیلو نہ کھزا او معاشرہ آ راستیں وٹا نہ کھزئ۔پاکستان آر اگر جہان اندرا وتی ساکھ وشتر کھنغی ایں تہ آنہی آر وتی روش مٹینغی بی او وتی معاشرہ اندرا برداشت ائے کمی آ دیر کھنغی بی۔