سرگال: افریقہ ائے باز بہر آنر دھشت گرد ٹلہ آنژ خطر

راست پھول کھنے تہ ہماں وڑا ماحول او آف او گواس آ بدلاؤ او ردین بیسغیں حالت جہانی براسی ائے دھیان لوٹھی،ہماں بھیرائ جہانی براسی آر دھشت گردی ائے خطر آنی وٹا دی دھیان دئے اغ ائے ضرورت ایں۔او اے دی اصلیت ایں کہ ہمیں دوایں خطر آنی آپا جہانی براسی خاصیں ڈؤل چکا ہماں ملک ہماں کہ گیش عمل کھُز کھناں آں شر ایں بھیرا وتی کردار ادا نہ کھنغاں یا کھمیں دل لوٹھی گرغاں ۔دھشت گردی اے وخت باز خطر ناکین بیسا جتا ملک آنر باز چیلنج دیما آں ۔اگر ما وتی دمغ ائے ٹؤک کھنوں تہ کے ای ملک طالبان ،القاعدہ ،لشکر طیبہ او جیش محمد ڈؤل ائے خطر ناکین ٹلہ آنی زد لافا آں ۔اشاں نی اندرا کے ای ٹلہ آنر اگر یک ملک لوٹھی تہ قابو کھنز کھنت مگہ اینگا مان کھائے کہ آنہی تشدد پسندی ائے ایجنڈہ آنہی آر مثبت گام زیرغ آژ دیر ایر کھنت۔رونشت آسیا ائے کے ای ملک آنی اندرا داعش او اسلامی استیت آ تباہی کھزؤ ایر کھزا۔چوش کہ آنہاں ہماں دمغ آنی چکا قوضہ کھزغئے سا آنہانژ بازی آتر آنہی قوضہ آژ آجو بیسغاں مگہ آنہی خطر کھمین نویسا او چنتی ملک آنی اندرا آنہاں نی تخریب کاری جزغیں ،ہمیں بھیرا اگر افریقہ ائے وٹا گندوں تہ القاعدہ آگو جڑسی ایں الشباب او باز ایں دیگر دھشت گرد ٹلہ آں ہمیں دمغ آ باز تباہی کھزا ۔سجلا ایں روش آں الشباب آ صومالیہ ائے شہر مغادیشو آ ود کُش ھلگر کھُزا،گوستی ایں شمبھے ئے روش آ دی ہموزا یک لاری بم ائے ھلگر بیسا ہمائی اندرا کم چہ کم ہپتاد مڑدم جنجیسغاں او سدیں دیگر ٹھپی بیسغاں۔ہمیں ھلگر آژ اے اٹکل بیسا کہ صومالیہ اندرا ہمیں ٹلہ ہمائی آر ۲۰۱۱ آ بین الاقوامی فورسز آ صومالیہ آژ درا کشتغئے سا آں پدوارغ زور آور بیسا۔الشباب آ نی دی صومالیہ ائے یک مزن ایں بہر اندرا زور ایں مگہ ایزا آنہی چھی اے زور پھُرشتغئے سا البت گوستی ایں روش آں آنہی آ کے ای ود کش ھلگر کھزغاں۔آنہی ائے سجوں آنژ مزن ایں ھلگر ۲۰۱۷ آ مغادیش آ ہی بیسغئے سا ہمائی اندرا ۶۰۰ آژ دی گیش مڑدم مڑتھغئے ساں۔گوستی ایں سال ائے بنگیج آ الشباب آ نیروبی ائے یک ہوٹل کمپلیکس چکا ھلگر کھزغئے سا ہمائی اندرا ۲۲ مڑدم مڑتھغئے ساں۔صومالیہ آ الشباب او دیگر دھشت گرد ٹلہ آنر آسر کھنغ آپا امریکہ آ گواسین مہم تسر کھُزا مگہ گڈا دی آنہی ھلگر گیش بی گاں۔