سرگال: پاکستان بہ زیان بیگین کسانی بی پھد بیگئ کئیسئ لڑوکان جیئنگیش۔

ایش کجام وڑئ ھبرئ نہ انت کہ ھر وار پھدا گشتگ بیت کہ بہ پاکستان نہ ایشی کہ پوج شہ مُچان پرواکتر انت بلکہ وترا شہ ھر کانونئ برزتر زانت پہ چہ کہ بہ پاکستانا گیشترکین کار گون پوجیانی اشارہ تسر بنت چہ بہ مُلکا سیاسین نظام بیت یا روچانگین نظم و نسق و کجام معاملہ بہ پاکستانئ پوجئ سیائگا کارکنوکین ایجنسی کانونئ ھر کار و معاملہ وتی ضابطہ طئ کنگا بیت و بہ آی عمل بیت، مُلکئ عامین کانون و ضابطہ آنی پاسداری کنگ و یا آوانی نہ منئ منصبئ کوتئ نہ انت۔ بہ پاکستانئ تاریخا گیش شہ سہ دھہ انت کہ راستامین وڑئ پوجین واکداری گئوزیت ای دروست انت کہ بہ ھر ڈیکٹیٹر حلاپا جمھورین تحریک بناہ بنت و ھر کجام را ھم شہ واکا محروم کنگا بنت مگہ گیچئن بوتگین حکومت پہ وتی اختیارانی کار گرگا وخت نہ داریت و پوج ای کارا کنت کہ بیدئ پوجین ضابطہ آنی بہ ای مُلکا ھیچی نافذ بوتگ نہ کنت۔ گڈین پوجین ڈیکٹیٹر جنرل پرویز مشرف زوال بیگا ھور وھدہ کہ گیچئن بوتگین حکومت سَک بوتیت، اولی حکومت وتی حکومتئ دورہ پنچ سالئ وھدہ بود کرتیت و دومی حکومت ھم وتی وھدہ بود کرتیت گرچہ آ وھدہ ھیچ کجام وتی پنچ سالا بود کنگئ وھدہ بہ دست نیاورتتنت۔

عمران خانی حکومت سومی حکومت انت کہ شہ بحالین جمھوریتئ راہ سومی وار شہ عامین گیچئن کاریا رندا بہ گئوستگین سالا بہ واکا رستیت۔ دیمئ حکومت پوجئ پسندئ وڑئ حکومت نہ اتنت شہ ای معیارا عمران خانی حکومت خوش قسمت اتیت کہ پوج پہ آی باز مھربان انت و ای ھبرا مُچین سی دارنت کہ بہ پوجئ خاسین حکمت عملئ سیائگا عمرانی حکومت بہ واکا رستگیت۔ یعنی شہ پرویز مشرفی زوال بیگا رندا تہ انون راستامین وڑئ کجام پوجین بغاوتئ نہ بوتگیت، اگہ غور کرتگ بیت ایش نیکین فالئ انت کہ رد بہ رد بہ یازدہ سالئ گیچئن بوتگین حکومت کار کنگا انت۔ کدرتین وڑئ بری وھدہ پہ جمھوریتئ دیمرئیا وخت رستگیت۔ باز ناملایمی کہ شہ پوجئ دست مان دیگا بہ سیاستا بہ دیما کات شہ آی رکتگیت، مگہ چیزئ کہ بوتیت بہ ایشی حلاپا بوتیت، بہ ایشی جاگہ کہ کرار کرار کانون بالادستیا گپتن، عمران خانی دورہ واکدارئ کانون پاسداری جوان ختم بوتیت، پہ چہ کہ نام برتگ بہ پوجئ احسانئ سیائگا سرئ ڈبہ انت، پہ امیشا کمین مزاحمتئ ھم شہ ای واکا در نہ انت۔ رازئ کہ جنرل پرویز مشرف بہ بلوچستان ظلمئ کوھانا پروشتیت، آی پوج ھم بہ عوامئ سرا رازئ کہ ایجنسی مسلط بوتگنت دیگہ آ تسلط رندا شہ آی واکداریا ھم الاس نہ بوتیت، مخالپتئ توارانا بہ اودان سیاسین کارکنوکان بہ جمھوریت پسند و تعلیم گروکان زوانانی بند کنگا کوشست انت، آوانی جیئنگ و بی پھد بیگ بناہ انت نہ کجام وجئ درا انت و نہ آوانی کھول زاننت پہ چہ گناھئ گپتگ بوتگنت و جیئنتگ بوتگنت و یا بہ کجام ھندا انت۔ جیئنتگین کسانی سرا بازین ظلم بیت آوانی لش کہ تیر وارتہ انت ھر نیمگئ پرینتگ بنت و بازین زیان بوتانی یکجائن کبرئ ھم دیستگ بوتگیت، ای احتجاجئ توار ھم اگہ بال بیایت جابجا خفہ کرتگ بنت، بی پھد بیگئ معاملہ تاناکا نون بہ بلوچستانا نہ انت۔ بہ پاکستان ھر صوبہ ھر ایجنسی ھر کسئ بوتگ کنت کہ بی پھد بیت۔ چی پشتون تحفظ موومنٹ یعنی پی ٹی ام لیڈر و کارکنوک بی پھد بیگیش ھم استیت، حتئ پارلیمنٹ باسکانا ھم بہ جیلا پرینتگنت، عمران خانی دور و اعتبار شہ ای اعتبارا پہ ایجنسیان گیشتر تنک انت کہ نون بی پھد بوتگی کسانی لڑوکین کسانی جیئنگ دیگہ نوکین ھبرئ انت۔ یک وکیلئ کہ نامی انعام رحمان انت بہ دسامبرئ ۱۷ آی را شہ گئسئ مُچانی دیما ایجنسئ مردم برتگنت، سرئ چی الزام جتگنت ای دورین ھبرئ انت وتی دروستی بیگئ نشانا ھم نہ داتگنت، ای معاملہ بہ عدالتا ھم رستگیت و آ گئسئ مردم بہ لاھور ھائ کورٹا بہ راولپنڈیئ بنچ دیما گون فریادس رستگنت و پرستگنت کہ چی گشنت کہ کم شہ کم چی بوتگیت کہ آی را گپتگنت، چُنت روچ رندا عدالت گشتگیت کہ پوجئ کجام ایجنسی آی را گپتگیت شد و پھد پہ بی پھدین کسانی پھدئ گرگ کسانی حال امیش انت، نون وکیلی شہ ای وڑئ کئیسانی وکالت کنگا ایجنسیانی نشان بنت و ای مُچین پاکستانئ گئوستگین کریکیٹر کپٹان و موجودین سرئ وزیر عمران خانی وھدہ تسر بنت ھما کہ پہ پاکستانا مدینہ وابا دیست نون حالیش ایش انت۔