سرگال:ایران ۔امریکہ ناوشی آژ ھند آر پِکر

گوستی ایں جمع آ عراق آ ایران ائے اعلی پؤجی کمانڈر میجر جنرل قاسم سلیمانی ائے حون ائے ہماں کہ دپ بیسا آں بہر حال باز دُکھ ائے ٹؤک اسا پھرچھے کہ آنہی آش رونشت آسیا آ یک نوخین او رسمی ایں مڑائی ائے خطر گیش بیسا۔میجر جنرل سلیمانی بلا گمان ایران ائے یک سخت گیر دُھر آنی نیمگا گیش مشہور اسا مگہ اے ٹؤک دی راست ایں کہ یک مضبوط پؤجی کمانڈر ائے وڑا آگو دی ایران آ آنہی مزن ایں قدر اسا۔آنہی آ نزیخ بیست سال آنی تکا ایران ائے قدس فورس ائے سروکی کھزغئے سا ہماں ہاں آنہی آر یک دھکا ؛انقلاب ائے یک زیندگ شہید؛ائے نام داسغئے سا۔حیر ایران اندرا آنہی مقبولیت ائے علاوہ رونشت آسیا آژ خطر ناکین دھشت گرد ٹلہ داعش یا آئی ایس آئی آ سیریااو عراق آ بے اثر کھنغ آ آنہی آ مزن ایں کار کھزاغئے سا۔ہماں دمغ آ آئی ایس آئی آژ چھٹینغ آپا آنہی عمل آنژ چھم چھرینغ نویس بی ۔آئی ایس آئی آ درا کھنغ آپا یک ڈؤل آژ عراق او امریکہ آنہی آ ہڑدوکین آنی مدد کھزغئے سا پھرچھے کہ آئی ایس آئی ائے حلاپ امریکہ ھلگر آنی تیاری کھنغئے سا۔بہر حال یک نوخیں وڑ ائے ناوشی ہمیں دمغ آ پیدا بی اغ ائے گمان پیدا بیسا۔سلیمان ائے مقبولیت عراق اندرا چھی اے کھمین نعیں۔او اتفاق آگو عراق آ ہی صدر ٹرمپ ائے حکم آگو آنہی آر کُشتی آ شزا۔عراق آ آنہی حون ائے باز بدگوشی کھُزی آ شزا آنہی آٹکل ہمیں ٹؤک آژ بی کہ ہموزا کہ قانون ساز آں اے فیصلہ کھُزا کہ سرکار امریکہ آر وتی پؤجی آنر گڑدینتھؤ لوٹھائینغ آپا لاچار کھنت۔چوش کہ باز دھُر ہمیں فیصلہ ائے حمایت نہ کھنغاں ۔بہر حال ہمیں منغ نامہ ائے حق آ ۱۷۰ ووٹ آتکغاں ،درگتہ کہ ۱۶۰ آں ہمیں ووٹنگ آ بہر نہ گتا۔اگا ہمیں بارو آ چھے فیصلہ کھائے اے تہ رندا معلوم بی مگہ اے ضرور اٹکل بی کہ عراق ائے اندری دھُر آنی نیمگا ناوشی پیدا بیسا۔یک دھر اے لوٹھی کہ امریکہ ائے پؤجی عراق آژ گڑداں برواں او دوہمی آنہی حق آ نعیں ۔ہمیں صورت آ اے خطر دی پیدا بیسا کہ دھشت گرد آنی دست مضبوط بی آں او اے یک مزن ایں بد بختی ائے ٹؤک بی۔ایران او امریکہ ائے نیمگا ناوشی ہماں وخت پیدا بیسغئے سا ہماں وخت صدر ٹرمپ آ ہمیں منغ نامہ آژ وضہار یک وٹی ایں ڈؤل چکا جتا کھزغئے سا ہماں کہ ۲۰۱۵ آ بیسغئے سا  ہماں وخت صدر اوبامہ سروکی چکا اسا۔ٹرمپ ائے ہماں فیصلہ آژ آنہی رونشت سنگت دی ناوش بیسغاں ۔آنہی ہمیں فیصلہ آژ ہڑ دوکین ملک آنی نیمگا ناوشی پیدا بیسا۔او کرا کرا آں گیش بیسا۔