سرگال:پؤجی سروک ائے مدت کار آ گیش کھنغ ائے مسلہ پاکستان سرکار آپا سغر دڑد بیسا

پاکستان ائے سروزیر عمران خان آ گوستی ایں سال اگست آ یک نوٹیفکیشن آگو پؤج ائے سروک جنرل قمر باجوا ائے مدت کار آ سئے سال آنی گیش کھزغئے سا ہمائی آ نومبر ۲۰۱۹ آ ملازمت الغی اسا ۔عمران خان سرکار آ جنرل باجوا ائے مدت کار آ گیش کھنغ ائے وجہ پیش کھزؤ گوشتغئے سا کہ ملک آ درپیش حالت آنر دیستؤ آنہی آر ہمیں فیصلہ گرغی بیسا ۔آنہی گُشغ اسا کہ بالا کوٹ چکا ھلگر،پلوامہ آ بم ھلگر آ پھدا ائے حالت،ھند ائے وٹاژ جموں وکشمیر ائے خاصیں درجہ آسر کھنغ او سیماں چکا گیش بیسغیں ناوشی ائے سبب آژ حالت ردین بیسغئے سا ہمائی سبب آژ جنرل باجوا ائے مدت کار آ گیش کھنغ ضروری بیسغئے سا، مگہ مزن ایں عدالت آ گوستی ایں سال ۲۶ نومبر آ مدت کار آ گیش کھنغ ائے بارو آ نوٹیفیکیشن آ معطل کھزؤ گوشتا کہ نی ایں قانون اندرا باز خامی آں او مدت کار آ توسیع ائے بارو آ ہماں کہ فیصلہ گتی آ شزا آنہی اندرا باز بے ضابطگی ایں۔مزن ایں عدالت آ گوشتا کہ آرمی دفع ۲۴۳ ائے شق ۳ اندرا پؤجی سروک ائے مدت کار آ توسیع یا پدوارغ آنہی تقرر کھنغ ائے بارو آ ھچھ نہ گوشتی آ شزا ،ہمیں خاطرہ عدالت آ جنرل باجوا آر چھڑوئی آ شش ماہ ائے توسیع داسؤ عمران خان سرکار آ حکم داسا کہ آں ہمیں مدت ائے نیمگا مزن ایں پؤجی اپسر آنی مدت کار آ توسیع یا پدوارغ تقرری ائے بارو آ ھچھ قانون ٹھائینی نہ تہ جنرل باجوا شش ماہ پھدا ملازمت آژ ہٹی رؤ ۔مزن ایں عدالت ائے ہمیں فیصلہ آژ پاکستان ائے سرکار اندرا باز اتھل پتھل پیدا بیسا۔پھرچھے کہ آں زانی کہ شش ماہ ائے اندرا ھچھ قانون ٹھائینغ آسان کار نعیں آں دی اینگے صورت آ ہماں وخت کہ آنہی آ پارلیمان آ اپوزیشن ائے حمایت ملسی آ نعیں ہماں کہ ھچھ دی قانون ٹھائینغ آپا ضروری ایں۔ایزا اے ٹؤک دی زکر ائے لائیق انت کہ گوستی ایں روش آنی پؤجی اپسر آنر آنہاں نی ملازمت اندرا ہماں کہ توسیع ملسا آں رسمی اسا او ھچھ قانون ائے روگا نیا۔مزن ایں عدالت ائے فیصلہ آ پھدا او پؤجی استیبلشمنت ائے مشورہ چکا عمران خان سرکار آ اپوزیشن پارٹی آنی آپا وتی سلوخ آ نرمی کھنغ بنا کھُزا۔سرکار آ اپوزیشن ائے پھجی آ گپتران کھنغ ائے ٹؤک کھنغ بنا کھزا تاکہ قومی اسمبلی او سینیت آ ھزمت ائے بارو آ بل آ آنہاں نی حمایت آگو منظور کھنائینغ بیس بی،ہمیں کوشش ائے یک کلی ائے بھیرا پاکستان مسلم لیگ نواز ائے یک مزن ایں لیڈر رانا ثنائاللہ آ منشیات ائے غیر قانونی سؤداگری ائے یک کیس آ ضمانت داسی آ شزا۔پیسر ائے صدر آصف علی زرداری آ طبئی بنشت چکا ضمانت ملسا او نواز شریف ائے لندن آژ ملک گڑدغ چکا سرکار آ ھچھ تنقید نہ کھزا۔ہمیں وجہ آژ ۷ جنوری آ ھزمت بل آ منظوری ائے دگ صاف بیسا۔