سرگال:صدر ٹرمپ ائے ناوشی دیر کھنغ ائے ویچار

عراق آ امریکہ ائے پؤجی جھوک آنی چکا گوستی ایں روش آں ایران آ ۲۲ میزائیل چھغل داسغئے ساں ہماں کہ اصل آ امریکہ ائے صدر ٹرمپ ائے ہماں فیصلہ ائے حلاپ اساں ہمائی روگا ایران ائے اعلی ایں پؤجی کمانڈر میجر جنرل قاسم سلیمانی آ عراق آ کُشتی آ شزغئے سا۔جنرل سلیمانی ائے کُشغ ائے حلاپ ایران آ امریکہ ائے حلاپ باز ناوشی پیدا بیسغئے سا پھرچھے کہ آں ایران ائے نہ چھڑوئی آ یک زور ٓور پؤجی جنرل اسا بلکہ پؤج او عوام ائے نیمگا سَک مقبول دی اسا۔ایران ائے علاوہ وا عراق اندرا دی آنہی باز منغ والا اساں،پھرچھے کہ رونشت آسہا ائے سجوں آنژ خطرناکیں دھشت گرد ٹلہ داعش ائے حلاپ آنہی آ مزن ایں سوب مندی بیسغئے سا۔عراق او سیریا ائے قوضہ والا دمغ آنژ ہماں وڑا داعش آ بے دخل کھزی آ شزا آں چھی اے کسن ایں ٹؤک نیا ۔بہر حال صدر ٹرمپ ائے ہمیں اچانکی فیصلہ چکا سنگت اع دُژمن ہڑ دوکین آنر حیرانی بیسغئے سا او چنتی دھُر آنی وٹاژ اے اٹکل جھزی آ سا کہ چوش کہ صدر ٹرمپ وتی اندری ایں سیاست آ ہمیختر بجھسی آ اسا ہمیں کاطرہ آنہی آ ہمیں مہم جوئی کھزغئے سا۔بہر حال مسلہ ہماں دی رہسا آنہی آژ مچھیں جہان پکر آ مان آتکا ۔امریکہ ائے رسمی ایں سنگت دی خاصیں پکرکھنغاں۔اشی گون ہماں مچھیں ملک آنی پریشانی دی گیش بیسا ہماں ہاں نی ایران ائے پھجی آ سؤداگری سیال داری ایں۔ایران آ بدلہ گرغ ائے ٹؤک دی کھزغئے سا او ہمیں پاترپت چکا عمل کھنغ چکا دی آنہی آ دیر نہ کھُزا ۔عراق آ امریکہا ئے پؤجی جھوک آنی چکا ھلگر آ پھدا عالمی براسی ائے پکر باز گیش بیسا ۔ہر وٹا اے پکر لاحق بیسؤ شزا کہ اے بیس بی کہ ہمیں ھلگر آ پھدا ھلگر او جوابی ھلگر آنی سلسلہ تسر بی برؤ۔ھزا نہ کھنت اگر اینگا بیسا تہ چھڑوئی آ رونشت آسیا آ ناوشی گیش نوی بلکہ ہمیں ٹؤک ائے دی گمان پیدا بیس کہ عالمی پھیمانہ چکا نوخین انداز ائے صف بندی بنا بیرؤ۔بہر حال نی تکا اینگے پکر ائے ٹؤک مان نیاغیں۔ہر کھسے آر انتظار اسا کہ صدر ٹرمپ ائے جواب چھے بی او تھاں بیرئے فیصلہ کھنت مگہ اطمینان ائے ٹؤک اے رہسا کہ آنہی سلوخ نرم رہسا آنہی آ وتی پیرا آ گوشتا کہ ایران ائے میزائیل ھلگر آنژ امریکہ آر گیش نقصان نویسا او امریکہ ائے مچھیں پؤجی محفوظ آں ۔آنہی ہمیں ٹؤک دی اطمینان دؤخ رہسا کہ آں نا وشی دیر کھنغ ائے حق آ ایں او آں وتؤ پؤجی زور نہ آزمائینی۔ایران ائے وٹاژ دی چھی اے اینگے اشارہ ملسغاں۔ایران ائے صدر حسن روحانی آ گوشتا کہ اگر امریکہ آ پدوارغ اینگے غلطی کھُزا تہ ایران ائے وٹاژ خطر ناکین جواب داسی آ رؤ۔ہڑدوکین ملک آں ہمیں اشارہ داسا کہ ہماں وخت تکا یک وٹاژ ھچھ ردین گام نہ زڑتھی آ شزا تہ دہگر وٹاژ آنہی جواب نہ داسی آ رؤ۔کم چہ کم عارضی ڈؤل چکا ہی جہان آ اطمینان ائے ساہ تہ گتا۔