سرگال:پاکستانی پؤج ائے تنقید کھنغ ائے قیمت؟

دھشت گردی آر گیش کھنغ والا او دھشت گردی ائے سؤداگری کھنغ والا پاکستانی پؤج وضہار نعود اللہ قادر پوہ بی ۔آں جہان ائے یک اینگے ادارہ ایں ہماں کہ وتی ہم وطن آر قوم پرستی ائے سرتیفیکت دی بہر کھنت او آنہی ہمیں سلوخ پاکستان ائے قیقم ائے وخت آژ ہموزا ائے سماجی زند ائے بہر رہسا۔آنہی نزیخ ہموزا ائے سروزیر آنژ گتؤ خاصین،سیاسی ،سماجی او علمی زانتکار دی پاکستان آپا سیکیورتی ائے رسِک رہھسغاں ۔ہمیں خاطرہ آں ہمائی آر دی لوٹھاں آنہی آر قوم پرستی ائے سرتیکفیکت دیاں او ہمائی آر لوٹھاں آنہی آر قوم دژمن یا غدار دی منسؤ دستگیر کھناں۔محالف آر یرغمال کھزؤ آنہانر گار کھنغ ائے تہ پاکستانی ایجنسی آنی پسند ائے کار رہسا ۔آنہی ہمیں روش ائے سجوں آنژ مزن ایں نشانہ نی ایں روش آں پشتون نوجوان او کارکن آں ۔کھدیں آنہی نشانہ چکا بلوچ  بی آں کھدیں کھسے دوہمی۔گوستی ایں دو سال آنژ قبائیلی دمغ آنژ جڑسی ایں پشتون کارکن او نوجوان جبر آگو یرغمال کھزی آ شزغاں ۔آنہانر دھشت گرد منسؤ آنہانی انکاؤنتر کھزی آ شزا او دروغی مقدمہ قائیم کھزؤ آنہانر جیل آنی اندرا ماکھزی آ شزا۔ہمیں قبائیلی دمغ آ تحریک طالبان پاکستان ڈؤل ائے دھشت گرد آنی جھوک اسا۔ہماں وخت پاکستانی پؤج آ ہمیں جاگاہ آ تحریک طالبان ائے حلاپ چھڑوئی آ نام آپا آپریشن بنا کھزا تہ ٓسل ایں دھشت گرد آنر تہ گیش نشانہ نہ کھزی آ شزا بلکہ عامین مڑدم آنر گیش پریشانی دیما کھنغی بیسا ۔چوش کہ آپریشن ائے نیمگا مزن ایں تعداد آ مڑدم وتی لوغ آنر السؤ ملک ائے دیگر جاگاہ آ اوٹ گرغ آپا لاچار بیسغاں ۔ہمیں خاطرہ ہماں قبائیلی جاگاہ نی مڑدم آنر پؤج وتی حلاپ پوہ بی غئے سا آنہانر نشانہ کھزی آ شزا۔اینگے چھی اے پشتون مڑدم کراچی آ دی اساں ۔آنہانژ یک نوجوان آں دی اسا ہماں کہ کراچی آ وتی کیرئیر ٹھائینغ ائے کوشست کھنغئے سا۔آنہی آر پولیس آ تیر جھزؤکشتا ۔دیگر دی کے ای دپ ہمیں ڈؤل ائے بیسغاں ہمیں پس منظر آ پشتون نوجوان آں وتی حق آنی محافظت آپا یک تنظیم پشتون تحفظ موونت یعنی پی ٹی ایم ائے نام آژ قائیم کھُزا۔ہماں وخت آژ نی تکا اے تنظیم پؤج آر نا پسند ایں ۔نوجوان آنر نشانہ کھزی آ رؤغیں ۔آنہاں نی حلاپ دروغی مقدمہ قائیم کھزؤ آنہاں نی کیرئیر آر برباد کھزی آ رؤغیں ۔چوش کہ پشتون تحفظ موونت امن او جمہوری ڈؤل چکا وتی تحریک جزینغیں ۔آنہی باسک گیش بی غاں ۔پاکستان ائے ریاکاری ائے یک مثال اش انت کہ ھند ائے اندری ایں مسلہ آنی بارو آ ہماں ملک ائے حاکم او سفارت کار مچھیں جہان آ گمراہ کھنوخیں پروپیگنڈہ کھناں آنہی بارو آ کھدیں اے ٹؤک محسوس نہ کھناں کہ اے ھند ائے اندری مسلہ آ مداخلت ایں مگہ افغان صدر چکا مداخلت ائے الزام جھنغ آ آنہاں دیر نہ کھُزا۔