سرگال:پاکستان آ حب الوطنی ائے نام چکا ظلم او جبر

حب الوطنی او قوم پرستی ہڑ دوکین اینگے اصلاح آں ہمائ چکا ہر وخت ٹؤک بی مگہ جتا جتا دور آ چاہے آں حاکم طبقہ بی یا آنہی حلاپ حزب اختلاف بی یا مزہبی سروک بی آں یا گڈا معاشرہ ائے زانتکار وتی وتی ڈؤل چکا آنہی وشادگی کھناناں آختغاں او وتی وتی ویچار آنی روگا آنہی آر پوہ بیسغاں ۔خاصیں بھیرا ہماں معاشرہ آ آنہی وشادگی گیش مشکل ایں ہموزا اکثریت ھچھ خاصین مزہب آر منغ والا بی ۔ہمیں وڑ ائے یک سوال اسلام آباد مزن ایں عدالت ائے مزن ایں قاضی آ غداری ائے ڈوہ آ ڈوہی آنی درخواست ضمانت چکا سماعت کھزؤ سرکاری قاضی آژ پھول کھُزا۔شوا کھسے ائے حب الوطنی آ تھانگا چیلنج کھُز کھنے او آنہی چکا پھرچھے ملک آگو غداری ائے الزام جھنغ بیس بی۔ڈوہی پشتون موومنت ائے سروک منظور پشتین ہمائی چکا وا ملک آگو غداری ائے الزام جھزی آ شزا،آنہی حمایت آ احتجاج کھنغئے سا او اے احتجاج دی پر امن اسا او آنہاں قانون ائے دی ھچھ حلاپ ورزی نہ کھُزغئے سا آنہی آ مچھین احتجاج ائے نیمگا وتی جمہوری فرض آنی لحاظ ایر کھُزغئے سا آنہی باوجوت آنہی آژ آنہی حب الاوطنی ائے ثبوت او شواھد لوٹھسی آ رؤغیں۔پشتون تحفظ موومنت احتجاج ائے نیمگا مچھیں پاکستان آ مظاہرہ کھنغ والا آنر دستگیر کھزی آ شزغئے سا آنہانژ چھی اے آنر ضمانت داسی آ شزا او نی تکا ہزارا تنظیم ائے باسک پاکستان ائے جتا جتا جیل آنی اندرا مصیبت آ دیما کھنغاں۔آنہانژ چنتی آنی چکا فرار بی اغ ائے الزام ایں ۔پاکستان آ مروشی دی ڈن ائے ملکی حاکم آنی ٹھائینتھی ایں قانون لاگو ایں او حکمراں جماعت ہماں وخت وتی مخالف آنر تھُرسینغ آ باڑہ بی تہ سرکار آنہاں نی چکا غرادی ڈؤل ائے الزام جھنتھ ہماں کہ آنہاں نی آپا سجوں آنژ آسان دگ بی۔قاضی اطہر من اللہ آ حب الوطنی ائے ہماں کہ تعریف پیش کھزا آنہی ائے ایزا ڈسغ ضروری ایں ؛کھسے حب الوطنی ائے وضاحت تھانگا کھز کھنت او کھسے مڑدم ھچھ شہری ائے حب الوطنی ائے بارو آ تھانگا تصدیق کھُز کھنت۔آنہی آ وطن آگو حب ائے وضاحت کھزؤ گوشتا کہ اے ماتی ایں وطن آگو حب او بستگی ائے پھجی پھجی آ ملک ائے دیگر شہری آنگو حب آر پدھر کھنت ،مارا وتی حب الوطنی چکا ناز بی اغ لوٹھی آنہی آپا ھچھ ثبوت آ پیش کھنغ ائے ضرورت نعیں؛اسلام آباد ائے مزن ایں قاضی ائے ہمیں لپظ حب الوطنی ائے یک باز جامع تعریف پیش کھنت مگہ پاکستان ائے سیاسی سروک آنر آنہی چکا ویچار کھنغی بی کہ آنہاں نی سیاسی نظام آنہی چکا چھیخترعمل کھنت ۔مروشی پاکستان آ اینگا سرکار ائے ہماں دعوی آنی نیمگا بی غیں کہ ملک آ یک دی سیاسی قیدی نعیں مگہ پشتون تحفظ موومنت ائے بازی آ تر دستگیر بیسغیں بسک سیاسی قیدی آں او مچھیں پر امن احتجاج کھنغئے ساں ۔