سرگال:پاکستان ائے تھڑستی ایں گام

بہر بی اغ آ رندا پاکستان ائے ہمیں بد بختی رہسا کہ ہموزا جمہوریت کھدیں دی سوب مند نویسا۔گُشغ آپا تہ پاکستان اندرا گچین کاری دی بی او گچین بیسغیں سرکار سروکی سنبھالی مگہ اے دیستی آ شزا کہ سرؤک آنی چکا پؤج ائے حکمرانی بی ۔ہمیں سبب ایں کہ سیاسی حاکم وتی سرکار ائے مُدت کار پھیلو کھُز نہ کھناں یا گُڈا آں ھچھ آزات ایں ڈؤل چکا ھچھ فیصلہ گِرغ آپا لاچار بیسغاں ۔ہمیں خاطرہ اے دیستی آ شزا کہ سیاسی حاکم آنی لوٹھغ ائے باوجوت پاکستان ائے وتی ہمسائیگ خاصیں بھیرا ھند آگو شر ایں سیال داری قائیم نویسا۔پھرچھے کہ پاکستان ائے پؤج ھند ائے پھجی آ شر ایں سیال داری ائے حق آ نعیں ۔آنہی آژ آنہی مفاد چکا ضرب مان کھائے۔کے ائ دھکا اینگے دی موقع آتکغاں کہ ہماں وخت ھند او پاکستان ائے نیمگا سیال داری وشتر بی اغ ائے نزیخ پُجھسا ہماں وخت اچانکی آگو یک لکسی ایں دست آ آنہی آ سوب مند بی اغ نہ داسا ۔صاف ایں کہ ہمیں لکسی ایں دست پؤج ائے غین ۔اصل آ پاکستان ائے پؤج آ سروکی ائے حون سرا آژ مان آتکا ۔گچین کاری ہموزا بی آں ،سیاست زانتکار دی گچین بی آں،مگہ سروکی سرا آژ پؤج ائے دست آ ہی بی ۔اشی آژ ہمیں حالت دیما آتکا کہ سیاسی حاکم نی ہماں مڑدم بی ہمایئ چکا کہ پؤج ائے دست رکھیائی بی ۔اشی آژ پاکستان ائے بارو آ ہمیں گوشتی آ رؤغیں کہ ہموزا گچین بیسغیں سیاسی حاکم نوی بلکہ پسند ائے حاکم بی ۔نی ایں سروزیر عمران خان ائے بارو آ دی ہمیں ٹؤک گوشتی آ رؤغیں۔اے گوشتی آ رؤغیں کہ نواد ائے دھایئ تکا پاکستان ائے پؤج ائے مچھیں عمل وتی محکمہ تکا ہی محدود رہسغئے ساں ۔مگہ کرا کرا پؤج آ ملک ائے دیگر شعبہ آ دخل دئے اغ بنا کھُزا۔آئی ایس پی آر ) ائے دائیرہ گیش بیسا۔آئی ایس پی آ وتی دائیرہ کار ہماں شعبہ آنی وٹا کرا کرا گیشتر کھنغ بنا کھُزا ہماں ہاں نی تعلق عامین شہری آنژ اسا۔لیفتینت جنرل عاصم باجوا ائے سروکی آ آئی ایس پی آر ائے اثر میڈیا او کمیونی کیشن آ تیزی آگو گیش بی اغ بنا بیسا مگہ ڈاریکتر جنرل میجر آصف غفور ائے عہدہ سنبھالغ آژ ہی آنہی آ مزن ایں پھیمانہ چکا سیاسی عمل کھنغ بنا کھُزا۔داریکتر جنرل آ وتی پریس کانفرنس آ مزن ایں پھیمانہ چکا آئی ایس پی آر ائے عمل آنی بارو آ ڈسغ بنا کھُزا ہمائی آژ اے اٹکل بی سا کہ نی پؤج جتا شعبہ آ بازیں حد تکا دخیل بیسا۔ہمیں سلوخ ائے بازیں دھُر آنی وٹاژ بد گوشی کھزی آ شزا مگہ پؤج آ آنہی پرواہ نعیں ۔سرکار چکا پؤج ائے بالادستی آر جہان پسند ائے نیاہ آژ دیستی آ نہ رؤغیں ۔جہان پاکستان آر یک جمہوری ایں ملک ائے بھیرا گندغ آپا باڑہ ایں ۔پاکستان اندرا عوام ائے مسلہ روش پروش گیش بی غاں۔اینگین آ گزری ہمیں ٹؤک ائے غیں کہ حاکم عوام ائے مشکل آنر دیر کھنغ آپا گام گیج کھنت مگہ سرکار چکا ہماں وخت تکا پؤج ائے قوضہ ایں تہ سرکار چھے کھُز کھنت۔