سرگال:امریکہ:طالبان گپتران گیش امیت دؤخ نیاں

افغانستان آ امن ائے قیام آپا بی اغ والا کوشست نی تکا ھچھ گیش امیت دؤخ نیاں ۔کے ای وٹاژ او کے ای ڈؤل آژ کوشست بیسغاں ۔کوشست کھنغ والا ہماں مڑدم دی اساں ہماں کہ طالبان ائے منغ والا آں او ہمیں حوالہ آژ پاکستان ائے دی نزیخ نیاہ کھایاں او ہماں مڑدم دی ہماں کہ طالبان ائے تشدد پسندی آپا تحفظ ایر کھناں مگہ گڈا دی افغانستان آ امن آ لوٹھاں ۔امن پسند دھُر اے محسوس کھناں کہ کم او پیش گوستی ایں چھِل سال آنی عرصہ آژ افغانستان ائے عوام تشدد،خانہ جنگی،او حون خرابہ ائے گواس آ ساہ گرغاں ۔او آنہانر ھچھ امیت نیاہ نیاغیں ہمیں خاطرہ آں لوٹھاں کہ کم چہ کم ماحول چھی اے بدل بی او اگر مچھیں بھیرا نہ تہ چھی اے حد تکا امن قائیم بی۔گوستی ایں سال امریکہ او طالبان ائے نیمگا ہماں کہ گپتران بی غئے سا ہمائی بارو آ بازیں دھُر آنر اے امیت ضرور اسا کہ طالبان ائے سلوخ آ چھی اے نرمی کھائے او طالبان چھی اے حد تکا ہمیں ٹؤک آپا راضی بی آں مہ تشدد کھمین بی تاکہ ھچھ وڑ ائے منغ نامہ بی رؤ مگہ ہمیں مچھیں عمل آ طالبان تشدد ائے عمل آنژ پھدا نویسغاں ۔ہمیں نیمگا افغانستان ائے صدارتی گچین کاری دی بی سا او آنہی آ طالبان آ مچھیں تیزی آگو خلل ماکھنغ ائے کوشست کھُزا۔صدراتی گچین کاری تہ پھیلو بیسا مگہ ماحول ردین بی اغ ائے سبب آژ ووٹ ماکھنوخ آں بازی آ تر وتی ووٹ نہ داسا ۔ہمیں ماہ ہمائی آ صدارتی گچین کاری بی غئے سا ۔اے حبر دی آتکا کہ نزیخ ایں روش آں منغ نامہ ائے خاکہ تیار بی رؤ ہمائی چکا دوایں دھُر دستخط کھناں مگہ طالبان ائے عمل آنژ تنگ بیسؤ صدر ٹرمپ آ گپتران ائے عمل آ ماتل کھُزا۔نی پدوارغ گپتران ائے بی اغ ائے حبر ایں ۔ہمیں دھکا عامین ویچار اش آں کہ امریکہ،افغان مڑائی آژ ہماں کہ آنہی ائے سجوں آنژ دراژ مڑائی ایں ،تنگ بیسا او وتی پؤجی آنر نی گڑدینگ آپا باڑہ ایں ۔چوش کہ گپتران ائے بارو آ وا افگانستان ائے امن لوٹھوک عوام او خاصیں بھیرا ہموزا ائے زائیف باز پکر مند آں گُڈا دی ہر کھسے آر انتظار ایں کہ آخیر کار چھے بی اغ والا ایں ۔اگر امریکہ ائے ڈن ائے وزیر واجہ پومپیو ائے یک نی ایں بیان چکا ویچار کھُزی آ برؤ تہ ہمیں اٹکل بی کہ حالت چھی اے امیت دؤخ نیاں ۔نی ایں روش آں امریکہ ائے ڈن ائے وزیر پنچ ملک آنی دؤرہ چکا اسا۔آنہی دؤرہ ائے آخیری ایں جاگاہ ازبکستان اسا۔ہموزا ائے بنجہ تاشقند آ آنہی آ امریکہ ائے نمائیندگ او طالبان ائے نیمگا بی اغ والا ایں گپتران ائے حوالہ آژ ہماں دی چھی اے گوشتا آنہی آژ تہ اے اٹکل بی کہ طالبان نی دی تشدد پسندی ائے لیو جُزینغ آپا باڑہ آں ۔واجہ پومپیو ائے روگا صدر ٹرمپ نیخیں ارادہ آنگو اگا ودھغئے سا او گپتران آپا دیم روی بیسا مگہ ھچھ منغ نامہ تکا پُجھغ آژ پیشا امریکہ اے گندغ آپا باڑہ ایں کہ طالبان ائے سلوخ آ بدلاؤ بی غیں ہمائی آژ کہ اے اٹکل بی کہ طالبان اصل آ امن آپا باڑہ آں ۔واجہ پومپیو ائے ہمیں ٹؤک آژ اے کل بی کہ امریکہ نی دی ہمیں پکر آ ایں کہ طالبان ائے سلوخ آ نرمی ائے امیت کھمین ایں ۔