سرگال:دروغی وعدہ او ٹؤک آنر السؤ پاکستان آ ھچھ بدلاؤ نعیں

پاکستان آ اے وخت بنیاتی ایں مسلہ عمران خان سرکار آپا اے وخت سغر دڑد بی سی آں مگہ مروشی حالت اش انت کہ سرکار آگو جڑسی ایں مڑدم ہمیں مسلہ آنی چکا ٹؤک کھنغ ائے ضرورت پوہ نوی آں ۔بنیاتی ایں مسلہ آنر لکینغ آپا یک ڈؤل آژ مزہب پرستی آ عام کھنغ ائے کوشست کھزی آ رؤغیں تاکہ آنہی اوٹ آ اصل ایں مسلہ آنی وٹا مڑدم آنی دھیان ہٹائینتھی آ برؤ۔۔ہمیں سبب ایں کہ ہماں وخت سروزیر گشتانگ کھنغ آپا کھڑو بیسا تہ آنہی مچھیں کوشست ہمیں بیسا ملک ائے عوام آ دیما مسلہ آنی ھچھ زکر نہ کھزی آ رؤ بلکہ مچھیں دھیان عملی گام آنژ گیش مڑدم آنر مزہب او اخلاقیات ائے ٹؤک آنی وٹا کھزی آ رؤ ۔سروزیر اصل ایں موضوع آنژ ہٹسؤ اینگے ٹؤک آنر زور آگو کھڑو کھنت کہ بقول شاعر ھزا کھنت کہ ھچھ دی پوہ نوی کھسے،اے ٹؤک اولی ایں روش آژ ہی گوشتی آ رؤغیں کہ عمران خان پؤج ائے پسند ائے سروزیر ایں وا عمران خان دی ہمیں ٹؤک آر منی کہ آنہی سرکار آ پؤج ائے مچھیں حمایت ایں او سیاسی سروکی او پؤج ائے سروکی آ ھچھ فرق نعیں ۔اینگین آ اے ٹؤک فطری ایں کہ سرکار ائے مقصد اعلی طبقہ آنر آسر کھنغ نعیں بلکہ اپوزیشن آ مچھیں ڈؤل آگو آسر کھنغ ایں ۔اینگین آ ملک ائے آئین یک کاگد ائے ٹکر ایں ۔پھجی پھجی آ اے کوشست دی بی کہ یک مستحکم سول ملتری سرکار ائے قیام عمل آ بی تاکہ مخالف آنر سختی آگو پھدا کھزی آ برؤ۔سول ملتری سرکار ائے یک سجوں آنژ مزن ایں خراوی اش انت کہ آنہی آ عوام ائے حق آنر شمشتی آ شزا۔سرکار ہماں وڑا روحانی تعلیم آ نی ایں مسلہ آنی چکا اہمیت دئے غیں آنہی نتیجہ اے گندغ آ آتکا کہ پاکستان آ یک دھکا پدوارغ مزہبی او روحانی لیڈر باز طمطراق آگو میدان آ آتکغاں او آنہانر عوام ائے حمایت دی ملسی ایں۔ہمیں روحانی لیڈر آنر اقتصادی نظام آر وشتر کھنغ یا جمہوری قدر آنر مستحکم کھنغ ائے ھچھ پکر نوی ۔اینگے حالت آ اے ٹؤک دی دیما پھیزاغیں کہ عوام ائے بنیاتی ایں حق آنر کشتی آ رؤغیں ۔زائیف تھانگا لوغی ایں تشدد آ دیما کھنغاں ،ناموس ائے نام چکا تھانگا ڈوہ کھزی آ رؤغاں او تھانگا مڑدم آنی مزہب آ زور جبر آگو مٹینتھی آ رؤغیں او آنہی چکا مڑدم آنی ھچھ دھیان نعیں ۔یک اٹکل ائے روگا نی تکا سدیں زاگی آنر آنہاں نی مرضی ائے حلاپ جبر آگو آنہاں نی مزہب آ مٹینغ آپا لاچار کھزی آ شزا۔باز کسنیں چُکھ آنر جنسی سؤداگری آ دھکو داسی آ شزا۔حیرانی ائے ٹؤک اش انت کہ اینگے مسلہ آ پاکستان ائے پولیس چھڑوئی آ تماشا گندغیں ۔پاکستان آ مچھیں مزہب ائے منغ والا آنی آپا براور حق آنی ٹؤ زور آگو کھزی آ رؤ مگہ ہمیں ٹؤک آ چھیختر سچائی ایں آنہی اٹکل ہمیں ٹؤک آژ جھنغ بیس بی کہ ہموزا اقلیت آنی آپا نی تکا کمیشن قائیم نویسا او مڑدمی حق آنی کمیشن او زائیف آنی آپا کمیشن ائے نوخیں ترتیب آپا نی جائیزہ گتی آ رؤ۔پاکستان آ وسیلہ آنی کمی نعیں مگہ ہمیں وسیلہ آنی چکا چند خاصیں مڑدم آنی قوضی ایں درگتہ کہ عوام چنتی وڑ ائے مسلہ آنر دیما کھنغیں ۔گشغ آپا تہ پاکستان آ کے دھکا گچین کاری بیسا او گچین بیسغیں سرکار آتکا مگہ اے گشغ غلط نوی کہ پاکستان ائے پؤج آ اولی ایں روش آژ ہی سروکی ائے چسکا مان آتکا