سرگال:پاکستان آ میڈیا چکا سخت ایں پابندی

بیست او یک می صدی آ ہماں وخت جہان ائے باز ملک عصری لوٹھغ آنر دیتؤ نوخیں اصول آنی چکا وتی معاشرہ آر ٹھائینغاں ،پاکستان آ قدامت پسندی او بنیات پرستی ائے پاڑ باز پکو بی گاں ۔پاکستان آ چند اداری او مڑدم آں ہماں کہ معاشرہ آر نوخیں طریقہ آگو اگا برغ آ لوٹھغاں مگہ آنہار کار کھنغ ائے آجوئی نعیں ۔ملک آ اے وخت ویچار آنی پدھر کھنغ ائے آزاتی ائے حالت باز ردین ایں ۔حوال کار،مڑدمی حق آنی کارکن،قاضی او مرکزی دھُر آنی سیاسی پارٹی کھسے آر دی وتی مرضی آگو کار کھنغ ائے اجازت نعیں۔ہمیں سبب ایں کہ نی ہمیں مچھیں مڑدم ہمیں پابندی ائے حلاپ یک پلیت فارم چکا نیاہ پھیزاغاں ۔سرکار آ میڈیا او حوال کار آنر منضبط کھنغ آپا کے ای ادارہ تجویز کھُزغاں ۔ہمائی آ کے ای نی حلاپت کھُزی آ شزا اے کے ای وجوت آ آتکغاں ۔اینگا نعیں کہ میڈیا آ کنترول کھنغ ائے کوشست چھڑوئی آ عمران خان ائے پاکستان تحریک انصاف آ کھُزا بلکہ اے سلسلہ پاکستان مسلم لیگ نواز ائے سروکی ائے وخت آژ بنا بیسغئے سا ،نی اے دیگر ٹؤک انت کہ مروشی وا آنہی پارٹی او سروک آنر ہمیں وڑ ائے پابندی دیما آں ۔ہموزا تکا پاکستان آ میڈیا ائے آجوئی ائے سوال ایں تہ اینگے کے ای بین الاقوامی ادارہ آں ہماں ہاں کہ ایزا ائے حالت آنی چکا پکر آ پدھر کھُزا۔انستیتیوت فار ریسرچ ایڈوکیسی اینڈ ڈیولپمنت آ سال ۲۰۱۹ آپا وتی سالانی رپورت آ پاکستان آ میڈیا آ منضبط کھنغ ائے چھی اے مثال داسغاں۔ہمائی آ پبلیکیشن ،الیکترانک چینل،او ڈیجیتل میدیا آ کنترول کھنغ آپا پاکستان ائے میدیا ریگولیتری اتھارتی ائے میڈیا آپا خاصیں عدالت ،انسداد دھشت گردی عدالت ائے زریعہ آگو حوال کار نصر اللہ آ پنچ سال آنی جیل ائے سزا ،رضوان الرحمن او شاہ زیب جیلانی ائے حلاپ سائیبر ڈوہ آنی قانون ائے استعمال اینگے مثال آں ہماں کہ پاکستان آ میڈیا ائے حالت بیان کھنغ آپا باز آں۔ہمیں ہی نہ ۲۰۱۹ آ ہی میڈیا نگرانی ائے عالمی ادارہ،رپورٹر وِدآؤت بارڈر آ حوال کار آنی ویچار پدھر کھنغ ائے آجوئی ائے روگا ملک ائے درجہ بندی ائے لسٹ جاری کھزغئے سا ہمائی روگا پاکستان وتی کہنیں درجہ آژ سئے درجہ بُنا بیسغئے سا۔پاکستان آ گوستی ایں شش سال آ نزیخ ۳۳ حوال کار آنی حون بیسا او سال ۲۰۱۹ آ ہی ہپت حوال کار آنی حون بیسا۔مڑدمی حق آنی آپا کار کھنغ والا ادارہ او قاضی آنر دی اینگے مشکل دیما آں ۔آسیہ بیبی او جنید حفیظ آ دین ائے توہین کھنغ ائے ڈوہ آ سزا داسی آ شزغئے سا ۔چوش کہ آسیہ بیبی آر باز کوشست آنی پھدا عدالت آ رہا کھُزا۔ہمیں ہڑ دونانی مقدمہ آ نہ چھڑوئی آ قاضی آنر پاترپت داسی آ شزغاں بلکہ مزن ایں قاضی آنر دی تھُڑسینتھی آ شزا۔اینگے حالت آ پاکستان آ انصاف ائے امیت کھنغ بے معنی ایں ۔یک دُرا ایں ملک و معاشرہ آپا میڈیا ائے آجوئ باز ضروری ایں تاکہ بُرائی آ پھولسؤ آنہی آ آسر کھنغ ائے ملسؤ کوشست کھنغ بیس بی۔ہماں وخت تکا پاکستان ہمیں اصلیت آنر نہ منی ہماں وخت تکا آنہی بحران آژ درا بی اغ مشکل ایں۔