سرگال:پاکستان آ مزہبی سیاسی ٹلہ سرکار ائے اثر بُنا

مملکت خدادا پاکستان،ہمینگا کہ نام آژ ہی پدھر ایں اے ملک مزہب ائے بُنشت چکا وجوت آ آتکغئے سا۔ہموزا اسلامی بڑھیائی ائے بُنشت چکا براوری چکا مبنی فلاحی او انصاپ ائے نظام ائے سرکار قائیم بیس بی۔اے ویچار ایں  پاکستان ائے مچھیں اسلام پسند یا اسلام ائے نام گرغ والا مزہبی سیاسی پارٹی آنی ،درگتہ کہ پاکستان ائے قیام آ پھدا بانی پاکستان محمد علی جناح آ قوم ائے نام وتی اولی ایں گشتانگ آ یک اینگے پاکستانی معاشرہ ائے خاکہ پیش کھزغئے سا ہمائی آ کہ سماج ائے مچھیں طبقہ آنی نیمگا  بقائے باہم ائے جزبہ پیدا بی۔سماج آ مزہب،زات،برادری،جاگاہی ناوشی ائے ھچھ جاگاہ نہ بھچی،مگہ معاشرہ اندرا یک دھُر اینگے دی اسا ہماں کہ ھچھ نہ ھچھ ھالت آ سرکار چکا وتی قوضہ مضبوط کھنغ ائے کوشست آ مان اساں ۔اے دھُر اسا پاکستان آ اسلام ائے نام گرغ والا آنی۔اشی ائے علاوہ اعتدال پسند او  چپ محاذ آژ بستگی والا سیاستزانتکار دی اساں ۔چپ محاز یا ترقی پسند آنی سرا آژ اے کوشست رہسا کہ ملک آ یک غیر جانبدار نظام قائیم بی مگہ ہمیں طبقہ ائے کوشست دیگر ملک آنی بھیرا سوب مند نہ رہسا۔آنہانر کمیونست یا لادین منسؤ چُپ کھنائینتھی آ شزا۔جنرل ضیائالحق ائے سروکی سنبھالغ آ پھدا ہموزا ملک ائے اعتدال پسند طبقہ حاشیہ چکا پُجھسا ہموزا مزہبی ٹلہ آنی سرکار او انتظامیہ چکا قوضہ مضبوط بیسا۔صاف ایں کہ شاہ ائے جلاوطنی آ پھدا ملک آ ہماں ڈؤل ائے حالت پیدا بیسغاں آنہی آ نہ چھڑوئی آ مجاھد پیدا کھُزغاں بلکہ سیماں ائے آں وٹاژ دھشت گردی ائے سلسلہ دی بنا بیسا۔نوخیں حالت آ پاکستان ائے حاکم آں دھشت گردی آر وتی ڈن ائے پالیسی ائے بہر کھُزا۔آنہاں نی ہمیں پالیسی افغانستان آژ روس ائے پؤج ائے روغ آ پھدا دی جاری رہسا۔ہمیں پالیسی ائے نتیجہ آ پاکستان آ نہ چھڑوئی آ دھشت گرد او عسکری تنظیم پیدا بیسغاں بلکہ آنہاں نی تربیت کیمپ او جھوک دی قائیم بیسغاں ۔آنہی آ چھڑوئی آ افغان مجاہد ہی اوار نویسغاں بلکہ پاکستان ائے مزہبی ٹلہ آں دی وتی وتی جتا عسکری ٹلہ قائیم کھُزغاں۔حزب المجاہدین،جموعت الحرار او جموعت الدعوی ڈؤل ائے دھشت گرد تنظیم وجوت آ آتکغاں ۔مزہبی انتہا پسند ٹلہ آنی پکڑ سرکار چکا مضبوط بیسا وا پاکستان ائے خفیہ ایجنسی آئی ایس آئی ہمیں دھشت گرد آنر تربیت دا او آنہاں نی مالی واہریائی کھنت ۔پاکستان ائے سرکار چاہے آں ھچھ دی سیاسی پارتی آگو بستگی ایر کھنت ،آنہاں نی عمل آنژ وتی چھم چھرینتھی ایں ۔دھشت گردی ہماں دو دیمی تلوار ائے بھیرا بی ہماں کہ وتی او غیر آ ھچھ فرق نہ کھنت ۔پاکستان آ یک وخت ہماں دی اسا ہماں وخت کہ جتا دھُر آنی مڑدم آنی نیمگا آپس آ ہی جھیڑو اسا ۔مسیت آنی اندرا ود کُش ھلگر عامی اسا۔ود کش ھلگر کھنغ والا آنر اے باور دیائینتھی آ شزغئے سا کہ آنہاں نی ہمیں بھیرا وترا کُشغ اسلام ائے بالادستی قائیم کھنغ ائے دگ آ قربانی بی ،آں سدھائی آ جنت آ رواں ۔درگتہ کہ اصلیت اش انت کہ اسلام آ ھچھ ھند آ دی اے نہ وانینتھی آ شزا کہ بے ڈوہ مڑدم آنی حون بہائینغ آژ جنت مِلی۔غلط ویچار او پالیسی آنی سبب آژ مروشی پاکستان وا وتی ٹھائینتھی ایں دھشت گرد آنی نشانہ چکا ایں ۔دوہمی وٹا دھشت گردی ائے نگرانی کھنغ والا بین الاقوامی ادارہ آ پاکستان آ وتی سرڈغار آژ دھشت گردی آ آسر کھنغ آپا جون۲۰۲۰ تک ائے مہلت داسا ۔اگر آنہی آ اینگا نہ کھُزا تہ آنہی آر بلیک لسٹ آ ماکھزی آ رؤ۔