سرگال:امریکہ او افغان منغ نامہ:اُمیت او گُمان

امریکہ او طالبان ائے نیمگا منغ نامہ چکا دستخط بی اغ آ تنک چند روش ہی گوستغاں کہ اے حبر دی آتکا کہ جال افغانستان آ طالبان ائے یک ھلگر آ سئے مڑدم مڑتھگاں۔اصل آ طالبان وتی پنچ ہزار قیدی آنی رہائی آ افغانستان آگو گپتران آپا اولی ایں شرط منی۔طالبان وتی پنچ ہزار قیدی آنی بدلہ آ یک ہزار قیدی آنر دی وتی قید آژ اِلغ آپا تیار ایں ۔منغ نامہ آپا یک مزنیں عرصہ  تکا امریکہ او طالبان ائے نمائیندگ آنی نیمگا گپتران بیسا او گپتران ائے نیمگا باز بحران دی بیسا۔یک مرحلہ ہماں دی آتکا ہماں وخت مزنیں عرصہ تکا جزغ والا ایں گپتران آ اچانکی آژ نیمگا ہی امریکہ ائے صدر ٹرمپ آ ماتل کھُزا ہمائی آ پھدا مایوسی او نا امیتی ائے ماحول پیدا بیسغئے سا۔بھر حال گپتران ائے سلسلہ پدوارغ نی ایں روش آں بنا بیسا او شمبھے یعنی ۲۹ فروری آ امریکہ ائے وٹاژ ہموزا ائے خاصیں نمائیندگ زلمئے خلیل زاد او طالبان ائے سیاسی سروک ملا عبدالغنی برادر آ منغ نامہ چکا دستخط کھُزغاں ۔اے منغ نامہ قطر ائے شہر دوحہ آ بیسا او ہمیں موقع چکا امریکہ ائے ڈن ائے وزیر مائیک پومپیو دی سانڑی سا ۔ہمیں منغ نامہ آ پھدا افغانستان آژ امریکہ ائے پؤجی آنی لوغ آ گڑ دغ آپا دگ سدھا بیسا او امیت کھزی آ رؤغیں کہ اگی ایں چھیاردہ ماہ آنی نیمگا ڈن ائے ملکی پؤجی آنی گڑدغ ائے کار پورا بی۔مگہ ہمیں منغ نامہ ائے حوالہ آژ تنک باز چھی اے اگہ مگہ جڑسی آں ۔ہمینگا کہ وا امریکہ ائے دپاعی ایں وزیر مارک ایسپر آ گوشتا کہ اے منغ نامہ منزل ائے وٹا یک شر ایں گام ایں مگہ اے چھڑوئی آ بنگیج ایں ،دگ باز آسان نعیں ۔افغانستان آ پھائیدار امن آپا باز مہل ائے ضرورت ایں او چھی اے فریق آنر منغ نامہ دی کھنغی بی آں ۔واجہ مارک ایسپر آ اے ٹؤک کابل آ گوشتا ہموزا آنہی آ افغانستان ائے صدر اشرف غنی آگو بیٹھک کھپزا۔ہموزا ہڑ دوکین لیڈر آں دی منغ نامہ ائے بارو آ بیان جاری کھُزا۔ہمینگا کہ سرا دی اشارہ داسی آ شزا کہ ہمیں منغ نامہ آپا تنگ باز گمان آں مگہ چھی اے امیت دی جڑسی آں ۔سجوں آنژ خاصیں ٹؤک تہ اش انت کہ کم او پیش دو تہائی ائے افغانستان آ مِڑغ والا ایں امریکہ ائے ہمیں دراژ مڑائی آسر بیس بی۔او امن ائے امیت کھنغ بیس بی۔امریکہ ائے وٹاژ گوشتی آ شزا کہ آنہی آ ہمیں عہد کھُزا کہ آں ۱۳۵ رقش آنی اندرا اندرا سیزد ہزار پؤجی آنژ ہشتاد او شش سد آنر گڑدینتھؤ لوٹھائینی۔او وتی اتحادی آنر دی گُشی کہ آں دی کولیشن فورسز آنی تعداد آ گھٹ کھناں ۔مشترکہ بیان آ اے ٹؤک دی گوشتی آ شزا کہ اگہ طالبان دی وتی عہد چکا قائیم رہسا او منغ نامہ ائے پاس ایر کھُزیئ تہ منغ نامہ چکا دستخط بی اغ ائے چھیاردہ ماہ آنی اندرا اندرا مچھیں ڈن ائے ملکی پؤجی افغانستان آژ گڑداں رواں۔طالبان آ دی وتی مڑوک آنر ہدایت کھُزا کہ آں ھچھ وڑ ائے ھلگر آژ گریز کھناں او اینگے ھچھ نہ کھناں کہ ہمائی آژ افگانستان آر نقصان بی۔امیت کھنغ لوٹھی کہ چھیار دھائی آنی مڑائی او تشدد ائے شکار افغانستان نی چین او اطمینان ائے ساہ گری او حالت وشتر بی آں ۔