سرگال:شامی باہوٹ آنی مشکل او سیاست اے لیو

ہمیں روش آں ہموزا یک وٹا شام ائے صوبہ ادلب آ حالت ردین بی غاں ہموزا ترکی او یورپی یونین ائے نیمگا الزام او جوابی الزام آنی یک نوخیں دور بنا بیسا۔ہمائی صاف مطلو اش انت کہ سیاست ائے لیو باہوٹ آنی زند آنی بھا چکا لیو کھزی آ رؤغاں۔نی ایں روش آں ہموزا شامی پؤج آ صوبہ ادلب آ باغی جماعت آنی جھوک چکا ھلگر کھُزا او اے سوبہ ہماں باغی آنی آخیری ایں اوٹ گوشتی آ رؤغیں ،ہموزا ہمیں باغی آنی مدد او پُشت پناہی کھنغ والا ملک ترکی ائے پؤج آ یک شامی طیارہ آ تباہ کھُزا ہمائی آ پھدا ہڑ دوکین ملک آنی نیمگا ناوشی پیدا بیسا۔مگہ ہمیں مچھیں عمل ائے سجوں آنژ ردین او دآکھی دپ اے بیسا کہ ھچھ دھ لکھ مڑدم وتی لوغ آنر السؤ باہوٹی ائے زند گوازینغاں ہمیختر ساڑتھی ائے موسم آ یک اینگے دمغ آ ماروانہ ٹھاپرانہ ہموزا آنہاں وا کل نعیں کہ آںہانر تھونگو برغ لوٹھی ۔اے یک مڑدمی بحران ائے منظر ایں ۔ہمیں نیمگا ترکی ائے صدر واجہ رجب طیب اردگان  اے گوشتؤ حالت آنر گیش ردین کھُزا کہ ہمیں باہوٹ آنر اگا ودھغ آژ نہ داری ہماں کہ ترکی ائے دگ آژ یورپ پُجھغ آپا باڑہ آں او آنہی آپا کوشست کھنغاں ۔دوہمی وٹا آستریلیا آ ہمیں الزام جھزا کہ ترکی وتی سیماں آر یورپ روغ آپا باڑہ مڑدم آنی آپا بوژتھؤ یورپی یونین آر بلیک میل کھنغ ائے کوشست کھنغیں ۔مگہ ہمیں بارو آ حالت آنی چکا نیاہ ایر کھنغ والا باز تنظیم آنی وٹاژ اے ٹؤک گوشتی آ شزا کہ ترکی آ بس آنی اندرا پھُر کھزؤ باہوٹ آنر یونان او بلغاریہ ائے سیماں تکا پُجھینتھا ہموزا ہمسائیگ ملک آنی پؤجی آنہانر وتی سیماں آ آئیغ آژ دارغ آپا راضی آں ۔درگتہ کہ ترکی ائے پؤجی ہمیں باہوٹ آنر پھدا آئیغ آپا اجازت نہ دئے غیں۔ہمیں باہوٹ آنی آپا یک مزن ایں مسلہ ایں ۔ہمیں باہوٹ آنی اندرا چھی اے افغان شہری دی اوار آں ،مگہ اشاں نی اندرا سجوں آنژ گیش مڑدم خانہ جنگی ائے سبب آژ بے لوغ بی اغ والا شامی شہری آں ۔اشی آ گمان نعیں کہ یورپ باز باہوٹ او مہاجر آنی آپا باز کشش ائے مرکز ایں پھرچھے کہ ہموزا اقتصادی ،سیاسی او سماجی حالت کھُل ملائینتھؤ باز آسیائی او افریقی ملک آنژ شر ایں ۔ہمیں سبب ایں کہ شام عراق یا افغانستان ڈؤل ائے مڑائی آژ تباہ ملک آنی چنتی مڑدم مروشی دی یورپ پُجھغ آپا باڑہ آں۔