سرگال:پاکستان ائے سرکار ائے حلاپ میڈیا او سول سوسائیتی ائے درجہ بندی

سروزیر عمران خان ائے سرکار ائے حلاپ پاکستان ائے میڈیا او عوام ائے تیش گیش بی غیں ۔ہمیں تیش ائے سجوں آنژ مزنیں وجہ ایں کہ پاکستان آ یک وار پدوارغ عوام ائے ویچار آنر پدھر کھنغ ائے آجوئی آ مچھیں بھیرا آسر کھنغ ائے کوشست کھُزی آ شزا۔سرکار ائے نشانہ چکا شے دھکی ملک ائے سوشل میڈیا ایں ۔آنہی آ آنہی آپا پاکستان ائےالیکترانک کرائیمس ائے ایکت ۲۰۱۶ آ یک نوخیں ضابطہ آ اوار کھُزا۔ہمیں نوخیں ضابطہ ائے روگا فیس بک،انٹاگرام پھجی آ چنتی دیگر سوشل سائیٹس چکا نی ھچھ دی مواد سرکار ائے منظوری آ بغیر اپ لوڈ کھنغ نویس بی۔اشی ائے علاوہ مچھیں ڈن ائے ملکی سروس پرووائیدرس آنر یک سال ائے اندرا وتی دپتر پاکستان آ بوژغی بی تاکہ سرکار او سروس پرووائیڈرس آنی نیمگا بستگی قائیم بیس بی۔پاکستان آ میڈیا چکا پابندی جھنغ ائے اے اولی کوشست نعیں بلکہ آجوئی آ پھدا آژ نی تکا ہماں دی سیاسی ٹلہ یا طبقہ سروکی آ رہسا آنہی آ ھچھ نہ ھچھ صورت آ سرکار ائے حلاپ کھڑو بی اغ والا ایں آواز آ دبائینغ ائے کوشست کھُزا۔فرق چھڑوئی آ ہمیختر ایں کہ سرا سوشل میڈیا نیا،ریڈیو،تیلیویژن او اخبار اساں ۔ہمائی آ آسانی آگو دبائینغ بیس بی ۔مگہ سوشل میڈیا ائے طاغت ائے اٹکل سروزیر عمران خان او آنہی تحریک انصاف پارٹی شر ایں بھیرا پوہ ایں ۔پاکستان پیپلز پارٹی او پاکستان مسلم لیگ این ڈؤل ائے کہنیں سیاسی پارٹی آنی موجوتگی آ نوخیں پاکستان تحریک انصاف پارٹی ائے سروکی آ آئیغ پؤج او سوشل میڈیا ائے کرامت ایں ۔گڈا دی سوشل میڈیا آ ہماں وخت عمران خان ائے سرکار ائے ناسوبی آنر عوام ائے دیما ایر کھنغ بنا کھُزا تہ اے آنہانر قبول کھنغ مشکل بیسا۔میڈیا آ کنترول آ کھنغ آپا سرکار ائے زریعہ کھزی ایں گام گیج آنی حلاپ مچھیں ملک آ تیش ایں ۔سرکار ائے زریعہ ٹھائینتھی ایں ہمیں قانون آ سماج ائے مچھیں مہزب مڑدم سیاحیں قانون مناں ۔ہمیں قانون ائے حلاپ مچھیں سماج کھڑو بیسا ۔ہمیں بارو آ گوستی ایں روش آں اسلام آباد آ پاکستان فیدرل یونین آف جرنلست اے [پی این ایس ،سی پی این ای،پی بی سی،مڑدمی حق آنی کار آنی کمیشن پاکستان،پاکستان بار کونسل ،مزنیں عدالت بارایسوسیشن،اسلام آباد مزنیں عدالت ،بار ایسوسیشن ،اسما جہانگیر لیگل ایڈ سوسائیتی ،آئی آر اے ڈی اے،ایس اے ایف ایم اے،پارلیمانی کمیشن برائے مڑدمی حق ،میڈیا میٹرفار ڈیموکریسی او چنتی دانشور آں پاکستان انستی تیوت فار پارلیمنری سروسز آ یک کانفرنس ائے اہتمام کھُزا۔کانفرنس آ حوال کار ،قاضی ،سیاست زانتکار آنی علاوہ دانشور آں دی وتی ویچار آنر پدھر کھُزا۔کانفرنس آ یک ویچار اے دی اسا کہ سرکار آ ویچار آنر دبائینغ ائے بجاے ملک آ پھئیدار امن، قانون ائے برحالی ملک آژ دھشت گردی آ آسر کھنغ او تباہ بیسغیں معیشت چکا وتی دھیان دئے اغ لوٹھی۔