سرگال:اسرائیل ائے نی ایں گچین کاری تعطل آ آسر کھنغ آ ناسوب

اسرائیل آ ۲۳ می پارلیمانی گچین کاری آپا دو مارچ آ ووٹ ماکھُزی آ شزغئے ساں۔یک سال ائے اندرا بی اغ والا ایں سئے می عامین گچین کاری ،من وسلوی آپا پُر امیت اسرائیلی آنی امیت چکا پھیلو نویسغاں۔ووٹنگ ائے چند کھنٹہ پھدا ہی کھٹغ ائے دعوی کھنغ والا لیکو پارٹی ائے سروک او اعلی ایں وزارت ائے عہدہ چکا مزن ایں مدت تکا رہغ والا بنجامن نیتن یاہو ،۱۲۰ باسک آنی کنسیت آ ۶۱ ائے کرشماتی عدد گرغ آ ناسوب رہسا۔شش ملین ووٹ آنی ۹۹ پیصد گنتی آ پھدا لیکو پارٹی ۳۶ سیٹ گرغ آ پھدا سجوں آنژ مزن ایں پارٹی رہسا او مزہبی ٹلہ ساش او یونائینتد ،تورا جوڈازم آ ترتیب آگو نوہ او ہپت سیٹ ملسغاں ۔ درگتہ کہ چپ محاز چھڑوئی آ شش سیٹ آنی چکا سوب مند بیسا۔ہمیں وڑا چپ محاز ائے مزہبی بلاک آ کھُل ۵۸ سیٹ ملسغاں او ایوزن آ اکثریت آپا نتن یاہو آر سئے سیٹ آنی کمی دیما ایں ۔ مچھیں ووٹ آنی گنتی پورا بی اغ آ پھدا اینگا مزن آغیں کہ آنہی آر اکثریت ملی برؤ۔معاشی ترقی او امریکہ ائے پھجی آ نزیخی ایں سیال داری دی لیکو پارٹی آ سوب مند کھنائینغ آ ناسوب رہسا ہمائی آپا آں امیت کھنغئے سا۔ہمیں ڈؤل آ حزب اختلاف ائے زریعہ آگو ۶۲ سیٹ کھٹغ ائے باوجوت سرکار ٹھائینغ ائے گمان نیاہ نیاغیں ۔پیسر ائے جنرل بینی گینز ائے سروکی آ اعتدال پسند بلیو اینڈ وائیٹ پارٹی آ امیت آنی برعکس چھڑوئی آ ۳۳ سیٹ ہی ملسغاں او چپ محاز ائے لیبر پارٹی جیشر میریز بلاک آ ہپت سیٹ ہی ملسغاں ۔ ہمیں گچین کاری ائے اصل ایں کھٹوخ جوائینٹ لست ایں ہمائی آ پھانزد سیٹ ملسغاں ۔اے کچھ ۱۹۴۸ آژ اسرائیل ائے عرب آنی نمائیندگی آپا سجوں آنژ گیش ایں ۔گڈا دی ہپت سیٹ کھٹسؤ ایوگ ڈور لیبر مین اے سروکی آ یسرائیل بیتینیو سجوں آنژ مزن ایں کنگ میکر پارٹی بیسؤ دیما آتکا۔اگی ایں سرکار ٹھائینغ آپا آنہی حمایت نتن یاہو او گینز آپا ناگزیر ایں ،مگہ اے آسان نوی۔لیبر مین ہر ہماں سرکار ائے حلاپ رہسا ہمائی آ عرب پارٹی اوار آں ۔دسمبر ۲۰۱۸ آ نتن یاہو او لیبر مین ائے نیمگا ناوشی ائے وجہ آژ کنسیٹ آر تحلیل کھنغی بیسا ہمائی آ پھدا ۲۰۱۹ ائے اپریل او ستمبر آ ہمیں ماہ سئے دھکا گچین کاری کھنائینغی بیسا۔