موضوع: پاکستان اندرا احمدیہ پاڑو سرا ظلم او وئیل

احمدیہ پاڑو اسلام ائے ہماں پارو ایں ہماں ۲۳ مارچ ۱۸۸۹ اندرا قائم بیس غئے سا او ہماہی ائے جوڑ کھنوخ پنجاب ائے ولاقہ قادیان ائے نندوخ مرزا غلام احمد ساں۔ آں ہانی دعوی آ کہ حذا آ آں ہار مہدی او مسیح کھزؤ دیم داسا۔۱۹۰۸ اندرا مرزا غلام احمد ائے فعت بیئغ آژ رندا ہمیں پاڑو ائے بازیں خلیفہ بیسغاں او اے وختا آں ہانی خلیفہ مرزا مسرور احمد آں۔ ہند ائے بہر بیئغ آژ رندا اشی ائے صدر دفتر قادیان آژ درکھتؤ پاکستان ائے صوبہ پنجاب وٹا شزا او نی اشی ائے صدر دفتر انگلینڈ اندرئیں۔ہمیں پاڑو نی تکا ۲۱۰ آژ گیش ملک یا علاقہ آنی تکا ودھزؤ شزا۔ اشانی کچھ نزیخ ۲۰ ملین ایں۔اشانی کھل آنژ گیش آبادی پاکستان اندرئیں ہماں دو آژ پھنچھ ملین نیامغا ایں۔پاکستان اندرا ہمیں پاڑو آر ہماں ہی آر قادینی دی گوشتی آ رؤ،دڑدم اسلام آژ خارج پوہ باں۔پرچے کہ اے حضرت محمد آر آخیری پیغمبر پوہ نواں۔۱۹۴۷ اندرا پارلیمان ائے یکھ آئینی بدلاؤ آگو قادیانی آنر غیر مسلم قرار داسی آ شزا۔اشی آژ رندا ۱۹۸۴ اندرا جنرل ضیا الحق آ یکھ آردینینس آگو آں ہانی مذہبی حق پھلسغاں ۔ پاکستان اندرا قادیانی آنر دبائینغ او لتاڑغ ائے کوشش کھزی آ شزغاں او ہمیں کوشش دنے وخت آ دی بی غاں۔اصلیت تہ اشیں کہ ملک ائے باز مشہوریں مڑدم آنی تعلق ہمیں پاڑو آگو ایں آنہانژ اہم ایں نام پھاجھارگی داروخ سائنسدان او نوبل انعام گروخ ڈاغدار عبدلسلام ائے غیں ہماہی ائے فوت بیئغ آژ رندا آں ہانی مزار سرا مان آتکی ایں کوہ آژ لفظ مسلم آر درا کھزی آ شزا۔آئین پاکستان اندرا اقلیت آنی حق آنی حفاظت ائے ضمانت داسی آشزا او اقلیت آنر آہانی حق آژ دیر دارغ باز خطرناک او افسوس ائے گپ ایں۔پاکستان اندرا قادینی آنر اقلیتی درجہ ناسی آ روغ ائے مطالبہ سرا سرکار ائے کھونڈ دوتل کھنغ باز افسوس او شرم ائے  ٹوک ایں۔اینگا مان کھائے کہ اسلامی شدت پسند عنصر آں ہار کافر ائے بہر اندرا ایر کھنغ آپا اڑی کھن غاں۔ ہمیں واجھیں صورت حال اندرا ہمیں پاڑو شدت پسند آنی آسرو سرا زند گوازینغ آپا لاچار ایں پرچے کہ سیاسی حکمت عملی بنا ہمیں واجھیں معاملہ آنی اندرا فیصلہ گرغ آژ وزار دیر داراں۔