سرگال:افغانستان آ امن ائے قیام آپا پاکستان آ طالبان آنی جھوک آنی آسر کھنغ ضروری

افغانستان آ امن ائے قیام آپا قطر ائے بنجہ دوحہ آ امریکہ او طالبان ائے نیمگا گپتران ائے کے ای دؤر بیسغاں ۔آخیر کار ہمیں ہژدہ سال آنی مڑائی آ آسر کھنغ آپا دوایں دھُر آنی نیمگا ہمیں سال فروری آ یک منغ نامہ بیسا ،طالبان ائے وٹاژ منغ نامہ ائے احترام کھنغ ائے صورت آ امریکہ او او آنہی منغ والا مچھیں ملک آں وتی پؤجی افغانستان آژ ہٹائینغ آپا ہم صلاحی پھیدھارتھا۔منغ نامہ آ طالبان آ وعدہ کھزا کہ آں دمغ آ القائیدہ یا ھچھ دیگر ٹلہ آنر وتی عمل کھنغ ائے اجازت نہ دیاں ۔ہمیں منغ نامہ ائے بُنا پنچ ہزار طالبان بندی آنر الغی اسا مگہ افگان سرکار ائے گُشغ اسا کہ بندی آنر الغ آژ سرا مڑائی بندی ضروری ایں گڈا دی امریکہ آ صدر اشرف غنی ائے ٹؤک نہ منسا او آنہی زور بُنا افغانستان ائے صدر آ طالبان بندی آنر مرحلہ وار الغ ائے حکم دئے غی بیسامگہ طالبان آ ہمیں حکم آر مسترد کھُزا او مطالبہ کھزیش کہ بین افغان گپتران آژ سرا ہی مچھیں بندی آنر دو ہپتغ آنی نیمگا آجو کھزی آ برؤ ۔افغانستان ائے سرکار آ ہمیں مطالبہ منغ آژ انکار کھزؤ اشتا ۔منغ نامہ آ اندری ایں افغانستان جتا دھُر آنی نیمگا گپتران ائے مزن ایں عمل بنا کھنغ ائے ٹؤک طئے بیسغئے سا۔منغ نامہ چکا دستخط بی اغ آژ رندا صدر ٹرمپ آ گوشتغئے سا کہ اگر نی ھچھ دی ردین دپ بیسا تہ آں اینگے طاغت ائے استعمال کھنت ہمائی آ کہ اشی آژ سرا کھسے آ دی نہ کھزا او صدر ٹرمپ ائے ٹؤک راست دی بیسا ۔منغ نامہ ائے یک دم پھدا ہی طالبان آ یک امریکہ ائے پؤجی آ کُشتا ہمائی آ پھدا صدر ٹرمپ آ طالبان ائے پھجی آ گپتران جاری ایر کھنغ آژ انکار کھزؤ اشتا ۔افگانستان آ اے وخت سجوں آنژ خاصیں مسلہ اش انت کہ طالبان ائے پھجی آ گپتران ائے مسلہ ھچھ بھیرا پدوارغ اگا کھزی آ برؤ تاکہ قومی پھیمانہ چکا ملک ائے آؤخین روش آنی آپا ھچھ خاکہ ٹھائینغ بیس بی۔ہمیں گپتران آ اگا ودھینغ ائے یک کوشست ائے ڈؤل چکا پاکستان ائے پؤجی سروک جنرل قمر جاوید باجوا آ یک اعلی سطح ائے ٹلہ ائے نوہ جون آ افغانستان ائے دؤرہ کھزا ہموزا آنہاں صدر اشرف غنی آگو گپتران کھزا۔بیٹھک آ پھدا صدر غنی آ گوشتا کہ پاکستان ائے پؤجی حاکم آں یک آجو افگان ریپبلک ائے حمایت کھزا۔سوال اش انت کہ ہمیں ڈؤل ائے منغ نامہ سوب مند پھرچھے نوی آں؟پاکستان آ سرا دی افغانستان آ امن ائے قیام آپا وتی کردار ادا کھنغ ائے دعوی کھُزغاں مگہ آنہی آ وتی دعوی آنر کھدیں دی پھیلو نہ کھزا ۔۲۰۰۱ آ افگانستان آژ طالبان سرکار ائے آسر بی اغ آ پھدا پاکستان آ افغانستان آژ پھداسؤ آتکی ایں طالبان آنر وتی ہموزا اوٹ داسا  او آنہاں نی مالی او عسکری واہریائی دی کھزئی او نی تکا کھنغیں ۔نی گندغی اش انت کہ پاکستان ائے اسٹیبلشمنت افغان طالبان آنی جھوک آنر آسر کھنغ او آنہاں نی مدد دارغ آپا چھے گام گیج کھنت۔اگر ہمیں مدد بند نویسا تہ افغانستان آ امن ائے قیام ائے امیت چھڑوئی آ دروغی ویچار ہی بی آں ۔