موضوع: نویسوک،ڈانشور او عالم آنی سرا پاکستان اندرا پابندی

تاریخ:۲۰ جون ۲۰۲۰

آنگا تہ دانشور،نویسوک او عالم آنی آں پا پاکستان ائے ڈغار یدر گونڈ رہسا ہماں ہی سبب آ بازیں إرڈإ آنر وزی وطن او لوغ آنر اشتؤ دیگر ملکاں پناہ گرغی بیسا یا گڈا چی اے نار ویل گندغی بیسغاں۔اشی ائے دی بازیں سبب آں۔ یکھے تہ ویچار آنی گونڈ بیئغ ایں ہماہی ائے سخت گیری آنی سبب آ چیئے اینگیں قانون جوڑ بیسغاں ہماں بازی آ ویچار پھیدارغ او ضمیر ائے توار آگو بکزی آ نیاہا کھایاں،دیگر گپ اشیں کہ ہمsیں آجوئیں ملک ائے ۷۳ سالہ تاریخ ائے کم او گیش نیم بہر آجوئی انددرا نہ بلکہ سدھائی آ فوجی واگ داری اندرا گوستا او ہماں نیم بہر اندرا واگ دارئ فوج دستاں نیاساٰں،اشی اندرا دی مسک رندا اصل ایں نظام جزینغ والائیں فوجی جرنل ساں۔نی ما پاکستان ائے جمہوری نظام بارو گپ جنوں او قصو آر گونڈ کھنانا ۲۰۰۸ آژ پاکستان اندرا جمہوریت ائے نوخیں سغر آژ برحالی ائے ذکر کھناں۔آخیری ایں فوجی ڈکتیتر جنرل پرویز مشرف ائے گار بیئغ پھجی آ جمہوریت برحال بیسا او یکھ چھن جیسغیں سرکار پاکستان پیپلز پارٹی ائے سروکی بنا جوڑ بیسا۔ یکھے یہم ایں گپ اے گندغا آتکا کہ سری ایں دھکا ہمیں سرکار آ وزی پھنچھ سال پھیلو کھزغاں۔اشی آژ پیشا ہچھ دی سرکار آ ہمیں واجھا پھنچچھ سال ائے مدت تکا کار نہ کھزغئے سا۔اشی آژ رندا گشین کاری بیسغاں او اے دھکا نواز شریف ائے مسلم لیگ آ مزائیں گیشتری آگو سرکار جوڑ کھزا۔آنہی آ دی پھنچھ سال تکا واگ داری جزینتھا لیکن ہمانگا کہ پیشا رمز داسی آ شزا کہ چھن جیسؤ آتک غیں سرکار آنی اندرا دی بالواسطہ طور سرا سرکار ائے واگ فوجی صدر دفتر دستاں بی ہمیں واسطہ ہمیں ہڑ دوئیں سرکار آنی مزن ایں وزیر آں واگ داری ائے کار سنبھالتھ نہ کھزا۔