سرگال:پاکستان ائے ھند آر بدنام کھنغ ائے ناسوب کوشست

ھچھ پیشہ ور ڈوہی وتی ھچھ ڈوہ ائے وجہ آژ ہماں وخت ہر وٹا بدنام بی رؤ تہ آنہی ائے ہمیں کوشست بی کہ آں وتی دُژمن آر دی ھچھ ڈؤل آگو بدنام کھزؤ اے ثابت کھنغ ائے کوشست کھنت کہ آنہی آر تہ چھڑوئی آ ھچھی بھیرا بدنام کھزی آ رؤ شہر آ ڈوہی تہ دوہمی دی استاں۔آں شاید اے ویچار کھنت کہ ہمیں ڈؤل آژ آں دوہمی آنر بدنام کھنغ آژ آنہی ڈوہ نیاہ نیائے،پاکستان ائے دی دھشت گردی آپا چھی اے ہمیں بھیرئے ویچار ایں ۔آں مزنیں عرصہ آژ ھند آر نقصان دئے اغ او آنہی سلامتی آ ٹھپی کھنغ آپا دھشت گردی آ گیش کھناناں پھیزاغیں ۔پنجاب او کشمیر ائے پھجی آ آنہی آ ھند ائے دیگر دمغ آنی اندرا دی دھشت گرد آنی زریعہ آگو تباہی ائے چنتی کوشست کھزغاں۔گڈا وتی استریتجک ارادہ آنی بُنا آنہی آ افغانستان آ دی دھشت گردی آ گیش کھُزا۔طالبان او حقانی نیٹ ورک ائے زریعہ آگو آنہی آ افغانستان آ ہماں کہ حونی لیو کھُزا آنہی آژ مچھیں جہاں پوہ ایں ۔اقوام متحدہ ائے متعلقہ کمیٹی ائے زریقہ آگو پاکستان آ سرگرم چنتی دھشت گرد تنظیم آنر عالمی دھشت گرد منسا۔گوستی ایں سال ہی قوام متحدہ ائے وٹاژ جیش محمد ائے سروک مسعود اظہر آر عالمی دھشت گرد آنی لسٹ آ اوار کھزی آ شزا۔چوش کہ چین ائے مدد ائے وجہ آژ مسعود اظہر آنہی آژ چنتی دھکا بھچسا مگہ آخیر کار یک وخت اینگے آتکا کہ چین دی پاکستان ائے مدد کھنغ آ ناسوب رہسا او گوستی ایں سال ہی اقوام متحدہ ائے سینکشن کمیتی آ آنہی آر عالمی دھشت گرد منسا۔پاکستان دھشت گردی آپا وتی چکا جھزی ایں داغ آر ہٹائینغ آپا سرا آژ ہمیں کوشست آ مان ایں کہ ھند ائے ھچھ تنظیم یا کم چہ کم ھچھ مڑدم آر اینگے دھشت گرد ثابت کھُزکھنت ہماں کہ پاکستان آ تخریب کاری کھنت ۔کھدیں آں ھند شہری آنر یرغمال کھزؤ آنہی آ دھشت گرد ثابت کھنغ ائے کوشست کھنت تہ کھدیں پؤجی عدالت آ آنہانر دروغی الزام جھزؤ سزا دیائینغ ائے پروپیگنڈہ کھنت کہ آں دھشت گردی ائے عمل آ اوار اسا۔ہمینگا کہ آنہی آ ھند ائے بحریہ ائے یک پیسر ائے اپسر کلبھوشن یادو ائے پھجی آ کھزغئے سا۔پاکستان چین ائے یک مضبوط اتحدی بلکہ باز مسلہ آنی آپا آنہی محافظ بی سی ایں ۔اے وخت ھند او چین ائے حالت چوش کہ ناوش آں ہمیں خاطرہ حالت آنی فائیدغ زڑتھؤ آنہی آ ھند آر بدنام کھنغ ائے یک دیگر کوشست کھُزا آنہی آ ھند انجنیر وینو مادھو ڈونگارا آ اقوام متحدہ ائے دواز سد او شست او ہپت سینکشن کمیتی ائے بُنا دھشت گرد منغ ائے تجویز ایر کھزغئے سا مگہ آنہی منسوبہ آنر امریکہ آ سوب مند بی اغ ناسا او آنہی آ شرمسار بی غی بیسا۔پاکستان ائے شمشی رؤ کہ ھند ائے حلاپ ہمیں بھیرئے پروپیگنڈہ کھنغ آ آں کھدیں دی سوب مند نوی پھرچھے کہ جہان زانی کہ ھند آ گو ہمیختر وخت نعیں کہ آں دیگر کار آنر السؤ دھشت گردی ائے کار کھنت۔