بلوچھستان اندرا ودھوخٰیں بیچینی

سجلا روشاں بلوچستان لبریشن آرمی ائے یکھ گروپ ائے مجید بریگڈ آ کراچی اندرا واقع پاکستان اسٹاک ایکسچینج سرا حملہ کھزؤ مچھیں پاکستان اندرا اتھل پتھل آ ڑتھ غئے سا۔پھجی پھجی آعالمی ذرائغ ابلاغ ائے دل گوش دی وزی پلو آ کھنائتھغئے سا۔ہمیں حملہ آژ رندا پاکستان ائے مزن ایں وزیر او آنہی ائے وزیر خارجہ شاہ محمود قریشی آ سدھاہی آ ہندوستان سرا حملہ آپا ہندوستان آر ذمہ وار داشت غئے سا۔ پاکستانی واگ داروخ خاص طور سرا ہماں ہند ائے سلامتی ادارہ آنی یکھ عادت ایں کہ آں وزی اندری ایں حالات اور بے جوگیں ملکی حکمت عملی سرا پڑدہ پھرینغ آپا ہندوستان او آنہی ائے ایجنسی سرا الزام جناں کھلاں۔ لیکن اینگا کھزؤ آں وزی رائے عامہ آر بذراہ کھنغ ہندا وا وزی کار آنر بے نقاب کھناں۔ بیچینی چاہے بلوچستان اندرا بی یا گڈا سندھ اندرا اشی ائے چی اے  بییادی ایں سبب آں ہماہانی تفصیل پاکستان ائے پھاجھرگی داروخین تجزیہ کار او سلامتی ادارہ آنی زایتکار پیش کھنانا آتکغاں۔سجلا روشاں پاکستان ائے پھجارگی داروخین سیاسی او سلامتی بارو آ تجزیہ کار محمد عامر رانا آ اخبار ڈان اندرا بلوچستان پھجی پھجی آ سندھ اندرا ودھوخیں بے چینی او آنہی ائے نتیجہ اندرا پیدا بیئغ والائیں شدت پسندی ائے تفصیل آگو ذکر کھزا۔آں ہانی روگا سجلا روشاں سندھ او بلوچستان اندر مذہبی انتہا پسندی داروخیں دھشتگردی واجھا نسلی او جاہلی ایں قوم پرستی داروخیں پرتشدد انتہا پسندی سغر کھڑو کھن غیں۔ بلوچ بیچینی ائے حور آگو ہندے نہ ہندے آ ہمیں ویچار دل اندرا نشتؤ شزا کہ اے تکھائی آ ختم بی رؤ لیکن سلامتی ائے نقطہ نیاہ آگو ہماں دی گام زڑتھی آرواں آہانی سبب آ سیاسی او مالی سطح سرا بھا دئیغی بی او پھجی پھجی آ سماجی سطح سرا خاص طور سرا  ورنا اشی آگو باز رنجا باں۔ بلوچستان اندر بلوچستان لبریشن آرمی ائے ودھوخیں بے چینی اشی ائے نتیجہ ایں۔سجلا ہفتہ آنی نیاما سندھ دی تشدد ائے ہند بیسی ایں ایزا ہچھ مزہبی انتہا پسند گروپ تہ اوار نیا لیکن سندھو دیش لبریشن آرمی او سندھو دیش ریولوشنری آرمی آ کراچی،لاڑکانہ،او گھوٹکی اندرا بازیں حملہ کھزغاں۔جون ماہ آ آہاں ریجرز او احساس پروگرام ائے دفتر آنر خاص طور سرا نشانہ کھھزا۔ میڈیا ائے رپورٹ ائے روگا وفاقی سرکار ہمیں ہڑدوئیں گروپ آنر جئے سندھ قومی محاذ ائے براور داشتؤ دہشتگردی آر دارغ ائے ایکٹ بنا پابندی داروخیں تنضیم آنی زمرہ اندرا اوار کھنغ لوٹھی۔اے دی اشکھزی آ رؤغیں کہ سندھ ائے انتہا پسند گروپ آنی بلوچ شدت پسند گروپ آنگو رابطہ ودھغاں۔حال اے دی استیں کہ ایس آر اے او ایس ایل اے ائے رابطہ بلوچستان ائے ب ایل اے آگو باز ودھزؤ شزغاں او بلوچستان لبریشن آرمی آنہر تربیت دی دئے غئیں ہما ہی عوض آں کراچی اندرا ہمیں سندھی گروپ آنژ حملہ آنی کھنغ اندرا واہری لوٹھگاں۔