موضوع : پاکیستان اندرا نظام تعلیم آر اسلامی رنگ دئیغ ائے کوشش

اسکرپٹ: معین الدین خان
تاریخ: ۲۷ جولائی ۲۰۲۰

اسلام علم ائے روژنائی،فکر او زانتکاری والائی دین ایں۔ وانگی ائے دیم روی سرا کھل آنژ گیش زور اسلام آ داسا۔وانگی ائے دیم روی ہی فکر ائے پھراہی او ویچار او روژن ویچار آنی گلو بوژی۔لیکن اے دی راست ایں کہ بازین واگ داروخ آن مخلوک ائے دین آگو بستگی ائے جذبہ ائے فائیدہ زڑتھا او وزی واگداری آر بھچائینغ یا ودھینغ ائے مقصد آگو مخلوک آر جذباتی کھزؤ اینگیں کار آں جھزؤ اشتا ہماں آن ہار وزت او ویچار او روژن خیالی آژ دیر باڑتھ کھنتھ۔ اینگیں واگ داروخ واگ داری کھزؤ وزی زندگی ائے روش آنر پھیلو کھناں او ہمیں جہان آر کھلاں رواں لیکن ہماں کشوخیں جؤر مخلوک آر ورائیناں رواں ھماں پھیلانا پھیلانا باز تباہی کھاری۔پاکستان ائے مثال آر اگر دیما داروں تہ جنرل ضیا الحق یکھ اینگیں ورادھڑ فوجی واگ داروخ ساں ہماں ہاں اسلام آر آرغ ائے نام سرا اینگیں درمان ہمانں ہند ائے مخلوک آر ورائینتھا کہ آنہی ائے اثر دنے وخت آ پاکستان اندرا جزغاں۔۔اگرچہ رندی ایں دواذد سال آنژ ہمازا چھن جیسؤ آتک گیں سراکار کار کھن غئیں لیکن سماجی سطح سرا ماحول سرا ہمانں اثر اسلامی کھنغ ائے کار آ پھرینتھا ہماں نی دی ہچھ نہ ہچھ واجھا جزغاں۔ہمیں صورت حال ائے جائزہ گرانا پاکستان ائے پھجھارتھی ایں صحافی زبیدہ مصطفی آ اخبار ڈان اندرا گیست می صدی ائے شروع ائے سالاں او گڈا پاکستان ائے جوڑ بئغ آژ رنداژ گیست او یکھمی صدی ائے شروع ائے روشاں آنی نیاما بیئغ والائیں بدلاؤ آنی جائزہ پیش کھزا۔زبیدہ مسطفی ائے روگا اخبار ڈان اندرا آہانی پھجی آ یکھ سنگت آ کار کھز سا ہما ورنائی روشاں یکھ پھجارتھی ایں نویسوک ساں۔۱۹۲۰ ائے شروع ائے دہائی ائے آحیر آ ہما ساعت آ دلی ائے اینگلو عربک اسکول اندرا داخلہ گتا تہ آہانی پرنسپل آ آہانژ پھول کھزا کہ آں دینیات ائے شعبہ اندرا سنی دینیات وانغ لوتھا یا گڈا شعیہ دینیات۔؟ آنہی آر ہما ساعت آ ہمیں فرق بارو آ سا نیا۔آںہاں لوغا شزؤ وزی ابا آژ پھول کھزا۔آہانی ابا احمد سعید ہما وخت ائے پھجارتھی این دانشور ساں۔ آں گورنمنٹ کالج اندرا استاد دی است ساں ہموزا پطرس بخاری دی آنہانی شاگرد ساں۔ تکھائی آ ولدی داسئی مئیں بچھ سکول اندر ہچھ واجھیں دینیات تھرا نہ پڑہغی این۔زبیدہ مسطفی لکھاں کہ ہماں زنہ آ عامیں ویچار  اشا کہ کہ مڑدم  وزی چکھ آنر دینیات ائے پڑہائی وزی لوغاں نشتؤ دیائنتھ سا۔گڈا آں قیام پاکستان ائے شروعاتی روش آنی ذکر کھنانا لکھاں کہ ہر ویلا ما اسکول اندرا تعلیم حاصل کھنغ شروع کھزا تہ عام طور سرا بانی پاکستان محمد علی جناح ائے ہماں گشتانگ آر بازآ منس سا ہماہی اندرا آں ہاں گوشت غئے سا کہ پاکستان اندرا بکھال وزس مندراں روغ آپا آزاد باں او مسلمان  وزی مسیت آں روغ آپا آزاد باں۔ زبیدہ مصطفی ائے روگا آں ہاں سکول،کالج اندرا دینیات کڈہیں دی نہ پڑھسا،اسلامی تعلیم آں ہار وزی ماس آژ ملسا جبکہ یکھ ماستر صاحب آن ہار فارسی پڑھائینغ آپا آں ہانی لوغا آتک ساں۔