سرگال:برصغیر آ القائیدہ او اسلامک اسٹیٹ ائے عمل

اقوام متحدہ ائے یک رپورٹ ائے روگا وتی سوب مندی او ناسوبی آنی نیمگا القائیدہ او آئی ایس آ نی ایں روش آں برصغیر آ وتی عمل گیش کھنغ آپا کوشست کھُزا۔چوش کہ آں سوب مند تی نویسغاں مگہ ہمیختر ضرور محسوس کھزی آ شزا کہ ھند آ وتی گام جمائینغ آپا چھی اے نوجوان آنگو آنہاں بستگی کھُزا او آنہانر وتی لسٹ آ اوار کھنغ ائے کوشست کھزا ۔یک اٹکل ائے روگا ھند آ آئی ایس ائے بستگی آ آئیغ والا مڑدم آنی کچھ یک سد او پنجہ او دو سد تک بی او آنہاں نی مزنیں کچھ کیرالہ او کرناٹک ڈؤل ائے بُرز ھند ائے ریاست آنژ بستگی ایر کھناں ۔عالمی دھشت گردی ائے حوالہ آژ اسلامک اسٹیٹ او القائیدہ اِن انڈین سب کانٹینی نینٹ آژ ہمیں مچھیں دمغ آ خطر لاحق ایں ۔اے کیو آئی ایس آ  ھند ائے علاوہ بنگلہ دیش ،پاکستان او میانمار آژ دی چھی اے مڑدم آنر وتی لسٹ آ اوار کھزا ۔اقوام متحدہ ائے رپورٹ ائے روگا اے کیو آئی ایس آ ہمیں دمغ آ دھشت گردی ائے ھلگر آنی منصوبہ بندی دی کھُزا ۔اقوام متحدہ ائے سینکشن مانٹیرنگ ٹیم آ وتی ۲۶ می رپورٹ آ آئی ایس ،القائیدہ او آنہی آژ جڑسی ایں دیگر مڑدم او ٹلہ آنی حوالہ آژ گوشتا کہ آی ایس ولیہ ھند آ گوستی ایں سال مئی ائے ماہ آ ہی جار جھزغئے سا کہ کیرالہ او کرناٹک آ آنہی باسک آنی کچھ باز گیش ایں ۔اقوام متحدہ ائے ہمیں مزکورہ ٹیم آ وتی رپورٹ گوستی ایں ۲۳ جولائی آ جاری کھزغئے سا ۔ہمیں ٹیم آ جتا ملک آنی خفیہ ایجنسی آنگو دی بستگی قائیم کھزؤ حالت آنی بارو آ زانتکاری گرغ ائے کوشست کھزا ۔عالمی وبا کووڈ ائے نیمگا جتا ملک آنی اندرا ہماں کہ لاک ڈاؤن او دیگر پابندی جھزی آ شزغاں ہماں حالت آ اے زانغ ائے کوشست دی کھزی آ شزا کہ ہمیں گام گیج اوپابندی آنی اثر القائیدہ او آئی ایس ائے عمل او منصوبہ آنی چکا چھے کھوی؟ہمیں بارو آ مشاھدہ کھنغ والا ایں ٹیم ائے گُشغ ایں کہ ہمیں پابندی آنی وجہ آژ دھشت گرد ٹلہ آنی آئیغ روغ او منصوبہ بندی چکا باز اثر بیسا پھرچھے کہ آنہاں نی کار آ باز مشکل پیدا بیسغاں او آنہاں نی عمل تعطل ائے شکار بیسغاں ۔آنہاں نی ھلگر کھنغ ائے منصوبہ آنی چکا آف مان آتکا آنہاں نی نیٹ ورک تعطل ائے شکار بیسا او مالی لین دین آپا عمل دی ٹھپ بیسغاؓ ۔مگہ رپورٹ آ یک ٹؤک باز پکر ائے وجہ ایں کہ اے کیو آئی ایاس طالبان ائے اثر بُنا افغانستان ائے نیم روز ،ہیلمند او قندھار صوبہ آژ وتی عمل جاری ایر کھزغاں۔القائیدہ اِن انڈین سب کانٹی نینٹ ائے نی ایں سروک اوسامہ محمد ایں ۔اقوام متحدہ ائے ہمیں رپورٹ آ اے دی گوشتی آ شزا کہ اے کیو آئی ایس برصغیر آ انتقامی کاروائی کھنغ ائے منصوبہ کھنغیں پھرچھے کہ آں وتی پیسر ائے سروک ائے کُشغ ائے بدلہ گرغ آپا باڑہ ایں ۔