سرگال: متحدین عربین امارات-اسرائیل سفارتین بستگی و عالم اسلامئ۔ 

متحدین عربین امارات گون اسرائیل باضابطہ ئن وڑئ سفارتین بستگیانا سَک کرتیت۔ آ کَس کہ بری وھدہ دنیائ بدل بیگانی کچانہ پہ آوان بہ ای اندازہ امیتئ وڑ نہ ات۔

مُچین زاننت کہ ترکیہ بہ سفارتین بستگئ سَک کنگا بہ اسلامین مُلکانی تھا اولی مُلک اتیت کہ بہ ۱۹۴۹ اسرائیلا دروست کرت مگہ وھدہ کہ رجب اردغان زمانگا اتیت، آ ھم ای بستگیانا سیست و معطل کرتیت۔ بہ تل ابیب تہ مروچی ھم ترکیہ کنسول خانہ موجود انت۔ ایران ھم یک وھدہ اسرائیلا دروست کرتت، مگہ وھدہ کہ ۱۹۷۹ آیت اللہ خمینی سربراھیا انکلاب بوتیت و بہ اودان اسلامین حکومت سَک بوتیت، دیگہ دو نیمگئ بستگی پروشت، مگہ مروچی ھم بہ اودان پہ کار و بارا قالینئ آ شہ ایرانئ یھودیان موشکول انت، آوان گون خطرا اتنت و آوان ایرانا اشتہ پہ اسرائیلی روگا مجبور بوتنت پہ چہ کہ شہ مسلمانانئ نیمگا پہ یھودیان کجام خطرئ ات۔ شہ متحدین عربین اماراتا رندا امیت روت کہ بحرین، عمان و سودان گون اسرائیل سفارتین بستگیانا سَک کننت۔ مگہ پہ سعودین عربا، پہ ای کارا شاید وخت بیت، پہ چہ کہ حرمین شریفہ ئن بہ عالمین کچانہ پہ مسلمانانئ وابستگئ پکرئ کنگا مجبور انت۔

موجودین حالت بہ یھودیت و اسلامئ نیاما شہ تصادم و لگگئ زاویہ دیستگ بیت و نتیجہ ای جذباتین وڑئ درا بیگا انت، مگہ مروچین حالاتانا دنیائ اکتسادین و سیاسین بدل بیگانی روشنیا گیندنت و کوشست بیت ای حالات گیشتر درا بیت، چُنت وھدہ دیما بہ اسرائیلئ حالان ای وڑئ مضمون چاپ بوتہ کہ اسرائیل پہ وتی بقا، تاناکا پہ آمریکہ و بریتانیائ نیمہ داریا تکہ کرتگ نہ کنت۔ پہ امیشا اسرائیل اگہ بلوٹیت وترا ساتیت، گون دیگہ عربان باید انت مصالحت کنت، پہ چہ کہ شہ چار نیمگا گون عربان بستگیت، پہ امیشا گشتگ کننت کہ یک نیمگین عملئ نہ انت، دو نیمگ لوٹنت وتی بستگیانا سَک کننت۔

نون منتیت ای سوج کہ ای معاھدہ جوان انت یا نہ؟ دیگہ پہ پسوئ چُنت وھدہ باید انت چمبراہ ماننت پہ چہ کہ ای واقعہ ای وڑا نہ انت کہ کرار و آرام گئوزنت۔ دیگہ چیزئ نہ بلکہ ایش انت کہ غلطین وھدہ بہ دیما کپیت و بازین وج داریت۔ اولی وجی ایش انت کہ دوبئ مُچین عربین مُلکانی معیشیت، مُچین چیز، دار و نداریش تیل انت کہ بہ کرونائ وھدہ انچوش بوتہ کہ یک بیرلئ در کنگ اینکس بیت کہ خرچی ھم در نہ بیت و بہ نتیجہ، خلیجین مُلکانی معیشیت باز کم واک بوتگیت کہ راست اوشتاتگ مہ کنت۔ اسرائیلی معیشیت ھم پورہ ئن وڑئ کم حال انت، مگہ صنعتئ بنیادی انکس پرواک انت پہ امیشا گیشتر نرمئ دیستنئ ضرورت نہ انت۔ پہ کجام معقول و شرّین معاھدہ کنگا دو نیمگئ برابیر بیگ زروری انت۔

دومی وج ایش انت کہ ای واقعہ بہ سہ ستونئ سرا اوشتاتگیت۔ اوی ستونی صدر ڈونالڈ ٹرامپ، دومی ستون سرئ وزیر نیتینیاھو انت و سومی ستون سعودین عربئ ولیعھد محمد بن سلمان انت۔ ھر سہ ستونئ بنیاد نون چنڈگا انت۔ ٹرامپ گون انچین گیچئن کارئ دیم پہ دیم انت کہ نتیجہ ۳ نومبرا درا بیت، ای وڑا شہ گیچئن کاریا درا بیت کہ آی حریف جو بایدن شہ آی دیما بیت۔

نیتینیاھو وت ھم گون سَکیان دیم پہ دیم انت۔ سرئ کرونائ اوبہ، ھزاران کَس بہ سڑیکان در کپتگنت و آی استفائ لوٹوک انت۔ کم شہ کم ۱۰ ھزار مردم آی گئسا چاردوگر کرتگنت تہ جائ کہ حالات اینکس نازورک بوتہ کہ اگست ۲۴ تاریخا دیما بوتگین بجٹ ھم ٹال داتگ بوت۔ سعودین عربئ ولیعھد محمد بن سلمان ھم پہ خیریت بہ چما نہ کئیت۔ آ ھم گون لھتین مسئلہ آن بند انت۔ سلمان آل سعودئ جانشینئ رسما پروشت و ولیعھد بوت و بری خاندانا کش و گیر رادگ انت۔ ھال انت کہ سعودین عربئ چیرین محکمہ گئوستگین سربراھی سعد الجبر واشینگتنئ یک عدالتئ وتی کشگئ الزاما مقدمہ دائر کرتہ و عدالتئ فیصلہ محمد بن سلمانا گون شکا ٹپی کنت۔

بہر حال مھمئن ھبر ایش انت کہ ترکیہ، پاکستان، مالزی و ایرانئ وڑئ مُلک تہ نون گون اسرائیل بستگئ سَک کنگا مخالپ انت۔ وھدہ کہ بہ ۱۹۶۷ سالا اسرائیل مُچین گپتگ بوتگین سرڈگارا پہ فلسطین تسلیم مہ کنت، سروک ھر چی کہ بلوٹنت مگہ بہ عربانی دلا چی گئوزیت۔ ھمی وج انت کہ سعودین عربئ ڈنئ کارانی وزیر فیصل بن ریحان گون جرمنئ ھالتاکئ گشتیت کہ تہ وھدہ کہ اسرائیل تسلیم مہ کنت ای حکیکتا شہ چما پرینتگ نہ کننت۔

شہ مُچان اھمین ھبر ایش انت کہ اقسائ مسیت، مسلمانانی قبلہ انت و ای حکیکت شہ چما دور نہ بیت و دیگہ اگہ ڈونالڈ ٹرامپ بہ گیچئن کاریا پروش وارت دیگہ منتگین ستون وت ریچنت۔