سرگال:دوحہ آ افغان سرکاراوطالبان ائے نیمگا گپتران ائے بنگیج

مزن ایں انتظار آ پھدا قطر ائے شہر دوحہ آ نی ایں افغان سرکار او طالبان ائے نیمگا گپتران تسر بیسا ہمائی ائے خاصین مقصدمڑائی آ دیما کھنغ والا ایں افغانستان آ امن ائے قیام ایں ۔گپتران تہ بِنا بی غیں او امیت دی کھزی آ رؤغیں کہ افغانستان ائے ائے حالت آنی اندرا وشتری کھائے مگہ امیت آنی پھجی پھجی آ چنتی گُمان دی استاں ۔گوستی ایں شمبھے یعنی دوازد ستمبر آ گپتران ائے بنگیجی تقریب منعقد بیسغئے سا  ہمائی ائے اصل ایں مقصد ایں کہ بیست سال آنژ مڑائی آ دیما کھنغ والا ایں افغانستان آ امن قائیم بی او حالت آنی اندرا بدلاؤ آپا دگ سدھا بی ۔افغانستان آ خانہ جنگی او مڑائی ائے ماحول کم او پیش چھیار دھ آنژ جُزاناں پھیزاغیں مگہ ۲۰۰۱ ائے ستمبر ائے ماہ آ امریکہ آ بی اغ والا ایں دھشت گرد ھلگر آ پھدا امریکہ ائے سروکی آ افغانستان آ دھشت گردی ائے حلاپ مڑائی شروع بیسغئے سا آنہی آسر بی اغ ائے علامت ائے ڈؤل چکا ہمیں گپتران آ دیستی آ رؤغیں ۔ہمیں سلسلہ ائے اولی ایں مرحلہ ہماں اسا ہماں کہ طالبان او امریکہ ائے نمائیندگ آنی نیمگا گپتران بیسغئے سا ہماں کہ ہمیں سال فروری آ یک منغ نامہ چکا آسر بیسغئے سا ۔مگہ دوہمی او بازخاصیں مرحلہ نی آتکا ہماں کہ اصل آ بین افغان گپتران ائے دؤر ایں ۔گپتران ائے بنگیج چکا عالمی سروک آں ہمیں امیت پدھر کھزا کہ افغان آ امن ائے دگ سدھا بی مگہ ہمیں ٹؤک آپا ہر کھسے آ خاصیں زور داسا کہ گپتران ائے نیمگا امن برقرار ایر کھنغ لوٹھی ۔امریکی ڈن ائے وزیر مائیک پومپیو آ ہڑ دوکین ٹلہ آنژ اپیل کھُزا کہ آں ہمیں تاریخی موقع آژ فائیدہ زیراں او امن ائے قیام آپا جامع منغ نامہ کھناں ۔شوئے سیاسی نظام تھانگے بی؟ آنہی فیصلہ شوار کھنغی ایں ۔گُڈا دی آنہی آ ہمیں ٹؤک چکا خاصیں بھیرا زور ماکھُزا کہ مچھیں افغان عوام ائے حق آنی محاپظت اولی ایں ترجیح بی اغ لوٹھی۔۔پھرچھے کہ تشدد آ دارغ ائے ہمیں ایکا دگ ایں ۔امریکہ ائے ڈن ائے وزیر آ ہمیں ٹؤک بنگیجی تقریب آ گوشتا،درگتہ کہ ھند ائے ڈن ائے وزیر ایس جے شنکر آ دی امن ائے اہمیت چکا زور ماکھزؤ گوشتا کہ افغانستان ائے قسمت ائے فیصلہ وا افغانستان ائے مڑدم آنر کھنغ لوٹھی۔ہمیں بنگیجی تقریب آ ھند ائے ڈن ائے وزارت ائے جوائینت سیکیریتری برائے پاکستان،افغانستان او ایران ڈویژن جے پی سنگھ ائے سروکی آ یک اعلی ایں سطح ائے ٹلہ آ بہر گِتا۔وتی ورچوئیل گشتانگ آ ڈن ائے وزیر ایس جے شنکر آ آچ بندی چکا زور ماکھزؤ گوشتا کہ افغانستان آپا ھند ائے یک صاف او اٹل پالیسی رہسا کہ امن ائے قیام آپا ہماں دی عمل شروع کھزی آ برؤ آں افغانستان ائے سروکی آ بی اوافغانستان ائے عوام ائے بہر داری آگو بی او مچھیں ڈؤل چکا آنہی چکا افغانستان ائے کنترول بی پھرچھے کہ ہمیں ڈؤل آژ افغانستان ائے آجوئی ،ود مختاری او جاگاہی سالمیت آر برقرار ایر کھنغ بیس بی۔افغانستان ائے حالت آنی چکا نیاہ ایر کھنغ والا ایں زانتکار آنی ویچار ایں کہ طالبان ائے ہماں کہ پیسر ائے مڑوک آں آں منغ نامہ ائے حلاپ آں ۔اگر افغان سرکار او طالبان ائے نیمگا گپتران سوب مند بیسا یا ھچھ منغ نامہ بیسا تہ اے پیسر ائے مڑوک ھچھ دیگر ٹلہ آ اوار بی آں ۔گیش گمان ہمیں ٹؤک ائے غیں کہ آنہاں نی بستگی داعش یا اسلامک اسٹیٹ ائے افگان ٹلہ آنگو بیس بی۔اشی اٹکل تہ آئیغ والا ایں روش آنی اندرا بیس بی تنِک تہ ہمیں گُشغ بیس بی کہ بنگیجی تقریب آ ہماں کہ بیان او تجویز آتکغاں آنہی روگا اگر گپتران اگا بیسا تہ وشتری ائے امیت کھنغ بیس بی ۔