تبصرہ

سرگال:پاکستان ائے سرکار ائے حلاپ اپوزیشن پارٹی آنی کانفرنس

نی ایں روش آں پاکستان پیپلز پارٹی ائے چئیرمین واجہ بلاول بھٹو ائے کانڈھ چکا اپوزیشن پارٹی اسلام آباد آ جوڑ بیسغاں ہموزا آنہاں آؤخین روش آنی مشترکہ لائیحہ عمل چکا داس گپت کھُزا ہمیں پارٹی کانفرنس آ دوازد اپوزیشن پارٹی آں بہر گتا درگتہ کہ جماعت اسلامی آ وضہار آنہی آژ جتا ایر کھُزا۔جولائی ۲۰۱۸ ائے گچین کاری آ پھدا اے چھیارمی دھکا ایں کہ اپوزیشن پارٹی آں کھُل پارٹی کانفرنس آ بہر گتا ۔سرا اے پی سی ۲۸ جولائی آ گچین کاری ائے سئے روش آنی پھدا منعقد کھزی آ شزغئے سا ہمائی آ مچھیں اپوزیشن پارٹی آں الزام جھزغئے سا کہ عمران خان ائے تحریک انصاف پارٹی سروکی آ آرغ آپا گچین کاری آ دھاندلی کھزی آ شزا ۔دوہمی دو کھُل پارٹی کانفرنس فضل الرحمن ائے جمعت المائے اسلام ائے وٹاژ جون ۲۰۱۹ او جون ۲۰۲۰ آ لوٹھائینتھی آ شزغئے ساں ۔ہمیں کانفرنس آ باز پارٹی آں بہر نہ گتغئے سا ہمائی آ چھڑوئی آ ہمیں پیرا داسی آ شزغئے سا کہ سرکار ائے عمل اطمینان دؤخ نیاں ۔آنہی برعکس ہمیں کھُل پارٹی کانفرنس آ سرکار آگو مقابلہ کھنغ آپا وتی ویچار پدھر کھزغاں ۔بیٹھک آ عمران خان ائے استعفی خط لوٹھسی آ شزا ۔آنہی آسر بی اغ آژ سرا یک ۲۶ ٹک آنی منغ نامہ منظور کھزی آ شزا او کھُل پارٹی پاکستان جمہوری تحریک شروع کھنغ آپا سرکار ائے حلاپ لائیحہ عمل ائے جار جھزی آ شزا ۔ہمیں لائیحہ عمل سئے مرحلہ آنی بی ہمائی بُنا دسمبر آ ملک گیر پبلک بیٹھک بی ،ریلی کشتی آ رواں او اگی ایں سالجنوری آ اسلام آباد آ یک فیصلہ ائے لانگ مارچ کھزی آ رؤ ْاپوزیشن پارٹی آں گوشتا کہ سرکار ائے حلاپ احتجاج کھنغ آپا مچھیں جمہوری طریقہ اپنائینتھی آ رواں ،ہمائی آ احتجاج او پارلیمان باسک آنی استعفی اوار آں ۔اشی ائے علاوہ سرکار ائے حلاپ تحریک عدم اعتماد دی پیش کھزی آ رؤ۔دو مزنیں اپوزیشن پارٹی یعنی پاکستان مسلم لیگ نوازنون او پاکستان پیپلز پارٹی ائے سروک نواز شریف او آصف علی زرداری آ ویڈیو کانفرنس آگو اپوزیشن پارٹی آنی سروک آنگو گشتانگ کھُزا۔نواز شریف آ وتی گشتانگ آ عمران خان سرکار او آنہی حمایت کھنغ والا آنی باز بدگوشی کھُزا۔آنہی آ گوشتا کہ مئے کوشست عمران خان ائے حلاپ نعیں بلکہ آنہاں نی حلاپ ایں ہماں ہاں کہ گچین کاری آ دھاندلی کھنائینتھا تاکہ عمران کان ائے سرکار قائیم بیس بی او ہمینگا ہماں مڑدم ؤں ملک آ برباد کھزا۔دوہمی سروک آ عمران خان ائے سرکار ائے ناسوبی آنی چکا روژنائی ماکھُزا ہماں بارو آ آنہی آ مسلکی تشدد،عدالتی کار آنی نیمگا سرکار ائے مداخلت سیاسی بندی آنی رہائی ،سی پی ای سی او دھشت گردی ائے بارو آ قومی ایکشن پلان آ لاگو نہ کھنغ ائے زکر کھزا۔