سرگال پاکستان طالبان سنگتي ائے اثر بين افغان مزاکرات چھکا

افغانستان اندرا ہژد سال آژ جززي ايں مڑائي آسر کھنغ آپا امريکہ او طالبان آ ہميں سال فروري لافا يکھ منغ نامہ چھکا دسختط کھزغاں منغ نامہ ائے روگا ہميں سال دھ مارچ تکا گھٹ آژ گھٹ پھنچ ہزار طالبان قيدي آر رہا کھزي آ شزہمشي عوض طالبان آ افغان سيکورٹي فورسز ائے يکھ ہزار مڑدم آر الغي آہميں عمل ائے پھيلو بيغ ائے پھزا افغان حکومت او طالبان ائے نياما مزاکرات چالو بيغي ساں
ليکن قيدي آني ادلا بدلي آر گت عو ہڑدوئيں ناني نياما تنازعہ پيدا بي سو شزا ہمشي پھجي آ طالبان آں وزي دھشت گرديں کاروائي دي جزيتھو اير کھزغاں ہمشي وجہ آژ مزاکرات وخت چھکا چالو نويس بيسغاں ليکن طالبان ائے ردين قيدي آني رہائي ائے پھزا ہميں ٹوک توار اخير کار دوحہ لافا پھزي ايں مہينہ ائے دوازد تاريخ آر چالو بي سو شزغاں پاکستان او طالبان ائے نياما دراژ ايں سيالداري آں ہمشي آژ مان کھائے کہ اش آني اثر مزاکرات چھکا لازم کھوي
پاکستان شروع آژ ہي طالبان آر ہتھيار کھزو افغانستان لافا وزي مڑائي مڑانا آختا
پاکستان ائے فوجي اسٹيبلشمنٹ او طالبان ائے خفيہ سنگتي ہماں وخت پدھر بيسغاں ہموزا قطر لافا واقع طالبان ائے سياسي دفتر ائے يکھ سنئير ايں اعہديدار آ گوشتا کہ تنظيم ائے کھل ايں فيصلہ آني لافا پاکستان ائے آئي ايس آئي اوار رہي
اگرچہ ہميإ سري دھکا آ کہ ہموزا طالبان آ آئي ايس آئي ائے پھجي آ وزي سيالداري ائے اعلان کھزغيسا
طالبان چھکا پاکستان ائے دراژ ايں اثر ہماں وخت پدھر بي سو شزغان ہموزا پھزي سال ملا عبدالغني برادر آر دوحہ لافا
طالبان ائے سياسي دفتر ائے ڈائرکٹر مقرر کھزي آ شزا
بين افغان مزاکرات چالو بيغ آژ پيشا ملا برادر ائے سروکي لافا تنظيم ائے دوحہ دفتر ائے يکھ گروہ آ پاکستان ائے دورہ کھزا
او ڈن ائے وزير شاہ محمود قريشي پھجي آ بعض ايں اہلکار آژ ملغ کھزا پدھر ايں ہميں بيٹھک ائے مقصد مزاکرات چالو بيغ آژ پيشا پاکستان ائے آقا آني ہدايت گرغي آ
لہزا طالبان او پاکستان ائے نياما ہماں نزيخ ايں رشتہ آں آں ہميں امن عمل ائے مستقبل ائے فيصلہ کھنغ لافا جوائيں کردار ادا کھناں