سرگال:ایغور مسلمان آنی چکا بی اغ والا ایں ظلم او جبر چکا عالمی براسی آر دھیان دئے اغ ائے ضرورت

چین ائے شیانگ صوبہ آ ایغور مسلمان آنی چکا ظلم او جبر ائے قصو جہان زانی ،چین ائے سرکار آ ہمیں صوبہ آ ایغور آنی آپا چنتی دستگیر کھزؤ ایر کھنغ ائے جھوک ٹھائینتھؤ ایر کھزغاں ہموزا آنہاں نی چکا ظلم کھزی آ رؤ۔نسلی فرق آ آسر کھنغ آپا اقوام متحدہ ائے کمیٹی آ اگست ۲۰۱۸ آ ہمیں صوبہ آ دھ لکھ آژ گیش ایغور مسلمان آنر دستگیری کیمپ آنی اندرا ایر کھنغ چکا پِکر آ پدھر کھزی آ شزغئے سا۔دکھ ائے ٹؤک اش انت کہ ہمیں مڑدم آنی آپا حالت آنی اندرا نی دی ھچھ بدلاؤ نیاتکا  بلکہ آنہاں نی حلاپ تشدد آ روشپروش گیشتری بی غیں ۔شنجیانگ آژ ملغ والا ایں حبر آنی روگا ایغور مسلمان آنی مڑدمی،مزہبی،او ثقافتی حق آنی حالت وشتر بی اغ ائے بجائے گیش ردین بی غیں ۔ہمیں ایغور آنر آنہاں نی مزہبی عقیدہ او او آنہاں نی رسم او رواج ائے وجہ آژ دستگیر کھزؤ کیمپ آنی اندرا ایر کھزی آ شزا ہمائی آژ صاف پدھر بی کہ چین ائے ایجنڈہ چھے ایں ۔چین ائے ۱۹۸۲ ائے آئین آ وتی ویچار پدھر کھنغ ائے آجوئی او مزہبی آجوئی ائے چوش کہ زکر ملی گڈا دی بیچنگ آنہی ائے حلاپ کار کھنغیں او بین الاقوامی بعاسی آنہی ائے مچھیں عمل آنی چکا نیاہ ایر کھزی ایں ۔نہ چھڑوئی آ ایغور مسلمان بلکہ دیگر اقلیت آنی چکا دی ظلم کھزی آ رؤغیں ۔چین ائے سرکار ھین مہاجر آنر اقلیتی علاقہ آنی اندرا نہ چھڑوئی آ ایر کھنغیں بلکہ روش پروش آنہی آ گیشتری کھنغیں۔اشی ائے علاوہ اینگے طبئی گام گیج کھزی آ رؤغاں ہمائی آژ اقلیت آنی آبادی آ گیش بی اغ آژ دارغ بیس بی ۔مزہبی محازچکا سرکار آ قرآن آر وتی قوضہ آ گتؤ جمعہ ائے نماز چکا دی پابندی جھزا۔اقلیتی اسکول آنی اندرا مینڈرن زوان لاگو کھزی آ شزا او کمیونسٹ پارٹی ائے شان آ نظم وانینغ ضروری مسنی آ شزا۔عالمی بعاسی ائے وٹاژ بدگوشی آ پھدا چین ایغور آنر دری ایں جہان آژ جتا ایر کھنغ ائے کوشست کھنغیں ۔اشی ائے علاوہ ہماں علاقہ آنی ود اوترقی ائے پروجیکٹ آنی آپا بین الاقوامی مالیاتی فنڈ ،عالمی بینک او آسیائی ترقی ائے بینک ڈؤل ائے ادارہ آنژ مدد گرغ ائے کوشست کھزؤ وتی ترقی ایجنڈہ آر جہان ائے دیما پیش کھنغ ائے کوشست کھنغیں تاکہ اصل ایں موضوع آژ جہان ائے دھیان ہٹائینتھی آ برؤ ،مگہ اشی باوجوت ایغور مسلمان آنی چین ائے پالیسی ائے مخالفت جاری ایں ۔