سرگال: شہ آمریکہ پوجیانی روگا رندا، پہ اوگانستانئ نندوکان تیارئ گرگ پہ نتیجہ۔

چُنت روچ دیما آمریکہ سدر ڈونالڈ ترامپ بہ وتی یک ٹوئیٹئ گشتیت کہ منا وعدہ انت کہ تہ کریسمسا یا گیشتر تہ ھمی رادگین سالئ آخرا آمریکہ پوجی تہ اوگانستانا برگردنت۔ شہ ایشی مطلب ایش بوت کہ دیم شہ درگیتین وھدہ آمریکہ پوجی شہ اوگانستانا در بنت و بری ٹوئیٹا شہای ھبرا یاتئ نہ بوتیت کہ آیا طالب وھدہ داتگنت یا کہ نہ۔ ھوشا بیت کہ گون آمریکہ پوجیانی روگا ای شرط جور بوتت کہ طالب یقین داتگنت کہ ھیچ دھشت گردین ڈلئ بہ آمریکہ پوجیانی سرا ھلگر مہ کنت۔ بہر حال طالب شہ سدر ترامپئ ای ٹوئیٹا وش آتگی کرتگنت و ھمی وڑا سدرترامپ گون فوکس بزنس چینلا کہ بہ ای ٹوئیٹئ باروا سوج کرتنت بہ پسوئ گشتیت کہ بہ اوگانستانا مئ ۴۰۰۰ پوجی منتگنت و تہ امبرانین سالئ آخرا مُچانا بہ آوانی گئسان برگردیننت۔ مگہ آی کومین سلامتئ مشیر روبرت سی روبراین بیانئ بری بھرا دیگہ وڑا آی شہ سدر ترامپ ٹوئیٹادیما بہ لوس انجلس گشتتیت کہ نون بہ اوگانستانا شہ پنچ ھزار پوجیا کمتر منتگیت و آیوکین سالئ سرا تہ ۲۵۰۰ نزیکا مانیت۔ ھوشا بیت کہ بہ آمریکہ و طالبانی نیاما تا ھمی سالئ فروریا آمریکہ پوجیانی روگا رندا معاملہ دستخت بوتگیت و نون تہ ھمی سالئ آخرا آمریکہ پوجی شہاوگانستانا رونت و بہ تفاھما ای وڑا اتگیت کہ آمریکہ پوجی تہ ۱۸ ماہ شہ اوگانستانا برونت و طالب ھم وتی عھدئ سرا بوشتنت و ھیچ دھشت گردین ڈلئ پہ آمریکہ پوجیان ٹپئ مہ رسینیت۔ بہ سدر ترامپئ ٹوئیٹا بہ طالبانی رد عملا ذبیح الله مجاھد گشتگیت کہ باز جوانین کارئ انت ونون تفاھمئ کہ بوتگیت شریا عمل بیت و بہ اوگانستانا بازین حلقہ حیران منتگنت۔

اوگانستانئ حکومت دفتن کجام عملئ نشان نہ داتگیت پہ چہ کہ ای ھبر نانگمانا بہ دیما آتگیت، آمریکہ دپاع محکمہ ھم تہ انون کجام تبصرہ بری باروا نہ کرتگیت، شہ دیگہ نیمگئ ھم رندا شہ سدر ترامپئ ٹوئیٹا ناتو سکرٹر جنرال جینیس ٹولٹین برگ بہ اتحادین پوجیانی مواقفئ بھرابیانئ داتہ و گشتہ کہ شہ سرا تہ آخرا ھمی مواقف بوتہ ھمی کہ حالات سازگار بنت دیگہ مئ مشن ھم ختم بیت و ما یکجا شہ اوگانستانا در بنت، یکجا بہ اوگانستانا شوتگنت و یکجا در بنت۔ ای ھبرا واجہ ٹولٹین برگ ناٹو سکرٹر بہ یک حالین کنفرانسئ دات۔ ناتو پوجی بہ۱۱-۰۹-۲۰۰۱ رندا شہ دھشت گردین ھلگرا بہ اوگانستانا اتتنت۔ ناتو سکرٹر جنرال کجام اشارہ بری بھرا نہ کرت کہ شہ سدر ترامپ مواقفا دیما سی داشتہ یا نہ۔ یا نون گون یکئ دگرا صلاح و شور کنگا بنت۔ شہ ای ھبران حالات دیگہ وڑا دیستگ بنت، بہ اوگانستانا موجودین حالاتئکہ استنت بیدئ طالبا آ دیگہ مُچین حیران منتگنت۔ وھدہ کہ بہ آمریکہ و طالبانی نیاما گپ و ھبرئ کہ رادگ اتیت ھما وھدہ دو نیمگئ نیاما کنفیوژنئ ماحول ات و ای وڑا احساس بوت کہ بہ اوگانستانا بیدئ طالبا دیگہ کجام کَسئ نہ انت پہ چہ کہ بہ گپ و ترانئ وھدہ ھم بہاوگانستانئ تھا قتل و کُش و چور و چپاول رادگ ات و بہ طالبانی دستورا ھلگر ھم رادگ اتنت۔ ڈاٹر عبداللہ عبداللہ بہو تی رد عملا کہ درا کرتہ گشتگیت کہ پہ ای ھبرئ ھضما کمین وقتی گیت پہ چہ کہ ای ھبر نانگمانا بوتہ و نون ای وڑا درا بیت کہ بہ نومبرا آمریکہ پوجی رونت و اماپکر کرتگنت کہ آمریکہ پوجی روگئ تیاریا دارنت، مگہ کمین مانیت و درا انت کہ ایش اوگانستانئ سرا اثر کلیت، ھمی وڑا گشتیت کہ اوگانستانئ مردم باید انت یکجا بنت و وت پہ وتی آیوکا یکجا کار کننت و پہ ای مکسدا بہ دوحہ بہ گپ و ترانا موشکول انت، ھمی وڑا تشویشئ وڑ انت۔

ھندوستان یک دوست و ھمسیائگ وڑا تعاونئ یقینا پہ اوگانستانا داتگیت۔