17-10-20

میڈیا آ ھچھ دی جمہوری ملک ائے چھیارمی ستون پوہ بی سی آ رؤ ۔ھچھ دی ملک اے معتبریت ہمیں ٹؤک آژ طئے بی کہ ہموزا ائے سرکار ائے کار او فیصلہ آنی نیمگا چھیختر ایمانداری ایں او میڈیا چھیختر آجو ایں ۔میڈیا سرکار ائے کار آنی چکا نیاہ ایر کھنت او آنہی ائے گتی ایں راست او غلط کار آنی حبر عوام تکا پُجھینی ۔مگہ پاکستان ائے میڈیا اے وخت باز مشکل وخت آژ گوزغیں ۔میڈیا آژ اینگے حوال کار آنر ملازمت آژ ہٹائینغ آپا زور ایں ہماں کہ سکیورتی استیبلشمنت ائے لوٹھغ آنی روگا کار نہ کھنغاں ۔میڈیا آر باز سینسر شپ دیما ایں ۔وتی ویچار آنر پدھر کھنغ ائے آجوئی مچھیں بھیرا آسر بیسا ۔اینگے حالت آ سرکار آر دی معتبریت ائے بحران دیما ایں ۔صاف ایں کہ ہماں وخت میڈیا آر آجوئی نوی او سرکار وتی کار ایماندراری آگو نہ کھنت تہ گُڈا سرکار چکا تھوار تہ کھڑو بی آں او بین الاقوامی براسی ہمیں نتیجہ تکا پُجھی کہ سرکار اصلیت آنر لکینغیں ۔سرکار ائے ھچھ دی مشینری اگر معاشرہ اندرا ویچار آنر پدھر کھنغ چکا پابندی جنتھ تہ آنہی مطلو اش انت کہ آں سرکار او ملک ائے معتبریت چکا اُرش کھنغیں۔پاکستان آ چنتی سروکی آنی نیمگا اینگے دپ بیسغاں ہمائی آژ ثابت بی کہ میڈیا ائے آجوئی آ ٹھپی کھنغ ائے ہر سروکی آ کوشست کھزی آ شزا ۔مگہ سجوں آنژ خاصیں دپ اپریل ۲۰۱۴ آ پیش آتکا ہماں وخت جیو ٹیلیویژن آ وتی حوال کار حامد میر چکا بیغیں حونی اُرش ائے حبر داسغئے سا ۔جیو آ آئی ایس آئی ائے ہماں وخت ائے ڈی جی آر ھلگر ائے ماسٹر مائینڈ منسا۔بس گُڈا چھے اسا ہمیں حبر آ حاکم آنر باور کھنائینتھا کہ آنہاں نی تانا شاہی او میڈیا ائے آجوئی یک پھجی آ نہ جُزاں آنہی آ
پھدا ہماں دی چھی اے بیسا آں ہر کھسے زانی۔۲۰۱۸ ائے جھیڑوئی گچین کاری آ پھدا پاکستان آ میڈیا چکا پابندی گیش بیسغاں ۔گوشتی آ رؤ کہ عمران خان ائے سروکی آ یک کمزار سرکار ٹھائینغ آپا پؤج آ وتی مچھیں زور آزمائینتھا ہماں وخت میڈیا ائے چھی اے دھُر آں پؤج ائے کردار چکا تھوار کھڑو کھُزا تہ پؤجی استیبلشمنت آ آنہانر تھُڑسینتھؤ چُپ کھنائینتھا چھی اے حوال کار ہماں کہ آنہانژ نہ تھڑستغاں آنہانر وتی ملازمت آژ دست شوزغی بیسا ہماں حوال کار آنی اندرا نجم سیٹھی،نصرت جاوید او مرتضی سولنگی ائے نام زکر ائے لائیق آں ۔سرکار بغاوت ائے نام چکا میڈیا آر چُپ کھنائینغ آروتی ناموس پوہ بی آں