سرگال:پلوامہ ھلگر آ پاکستان اے دست بی اغ آپا منغ

پاکستان یکے پھدا دیگر وتی ٹھائینتھی ایں جال اندرا بجھغیں ۔اپوزیشن ائے ریلی آنی سوب مند بی اغ آژ اسٹیبلشمنت ائے گھبراہٹ جتا دیم آ نیاہ پھیزاغیں چوچ کہ آنہی آر لکینغ ائے کوشست دی بروبر جزغاں ۔مریم نواز ائے مڑد آر ہوٹل ائے کمرہ ائے تاک بھورینتھؤ کھڑو کھنغ ائے مسلہ بی یا گڈا سندھ ائے آئی جی ائے یرغمال ائے مسلہ ،آنہی آژ پدھر بی کہ حاکم طبقہ مچھیں بھیرا تھڑستی ایں او آنہاں نی اندرا فیصلہ گرغ ائے حوصلہ باقی نعیں ۔باز مشکل آگو پاکستان ایف اے ٹی ایف ائے بلیک لسٹ آ اوار بی اغ آژ بھچسا مگہ آنہی پالیسی وتی امت او جہان آر پھرامغ ائے ہی رہسا ۔ہزاراہاں نی کچھ آ بے ڈوہ مڑدم پاکستان آ دھشت گردی ائے شکار بیسغاں مگی سرکار ائے سلوخ دھشت گرد آنی آپا نی دی بدل نویسا۔ہمسائیگ ملک چاھے افغانستان بی یا ایران یا ھندوستان آنہی ائے ہمیں پالیسی آر دو وٹی ایں گپتران ائے نیمگا او جہانی ادارہ آنی نیمگا کھڑو کھزی آ شزا کہ پاکستان ہماں وخت تکا دھشت گرد آنی واہریائی بند نہ کھنت ہماں وخت تکا دمغ آ پھائیدار امن ائے امیت کھنغ نویس بی ۔پشاور ھلگر چکا پی ڈی ایم ائے سروک مولانا فضل اللہ آ دی ہمیں ٹؤک گوشتا کہ دھشت گردی چکا قابو کھنغ ائے پؤج او سرکار ائے مچھیں دعوی دروغی آں ۔دھشت گرد آنر اسٹریٹجک ایسٹ پوہ بی اغ والا ملک آنژ دھشت گردی ائے حلاپ ھچھ دی کاروائی ائے امیت کھنغ بے کار ایں ۔گوستی ایں روش آں سرکار ائے یک وزیر فواد چوھدری ائے منغ کہ پلوامہ ھلگر پاکستان آپا یک فخر ائے لمحہ سا اے گشغ وا منغ ایں کہ پلوامہ ھلگر اندرا پاکستان ائے دست ایں ۔ہمیں ٹؤک ائے جہانی براسی آ دی نوٹس گتا ۔وزیر فواد چوھدری آ آنہی آ عمران خان ائے سروکی آ پاکستان ائے سوب مندی منسا۔نی پاکستان ائے قلعی مچھیں ڈؤل آگو بتکؤ شزا او ھند ائے ہمیں دعوی کہ پلوامہ ھلگر آ پاکستان ائے دست سا آخیر راست ثابت بیسا۔نی وتی وزیر ائے اقبالیہ بیان آژ چھم چھرینغ عمران خان آپا شے دھککی  آسان نوی۔پاکستان آر اے شمشغ نہ لوٹھی کہ نی ایف اے ٹی ایف ائے وٹاژ ہماں کہ چھیار ماہ آنی وخت داسی آ شزا ہمیں نیمگا آنہی ائے مچھیں عمل آنی چکا مچھیں جہان ائے نیاہ مان ایں او آنہی ھچھ دی نادانی آنہی آر باز مصیبت آ ما کھُز کھنت۔