سرگال:افغانستان آژ امریکہ ائے پؤجی آنی گڑدغ آ پھدا حالت آنی ردین بی اغ ائے گمان

ہمیں سال فروری ائے ماہ آ طالبان او امریکہ ائے نیمگا افگانستان آ امن ائے قیام آپا یک منغ نامہ بیسغئے سا ہمائی بارو آ سرا آژ گُمان پیدا بی سغاں ۔ہمائی خاصیں وجہ اے اسا کہ گپتران ائے نیاما دی افغانستان آ تشدد ائے سلسلہ کھدیں بند نویسا ،دوہمی ٹؤک اے دی محسوس کھزی آ رؤغئے سا کہ طالبان  افغانستان ائے سرکار آگو صلاح ائے گپتران کھنغ یا اندری ایں افغانستان آ امن قائیم کھنغ آپا ھچھ دل لوٹھی ایر نہ کھناں ۔مگہ کرا کرا چھی اے اینگے گُمان دی دیما آتکغاں ہمائی آژ اٹکل بی کہ وا طالبان ائے وتی آپسی ایں ناوشی ایں او اے کہ دوحہ آ بی اغ والا ایں گپتران آ طالبان ائے ہماں سروک آں بہر گتا آنہی ائے پلان او آنہی چنتی مڑوک آنی ویچار یک دوہمی آگو بالکل جتا آں پھرچھے کہ اے ٹؤک خاص ڈؤل چکا محسوس کھزی آ رؤغیں کہ دوحہ آ طالبان سروک آں صلاح آپا ہم صلاحی پھیدھارتھغئے سا او اے ویچار پدھر کھزغئے ساں کہ مڑدمی حق ،جمہوریت او سروکی آ بستگی ڈؤل ائے موضوع آنی چکا افغانستان ائے سرکار آگو سنجیدہ گپتران بیس بی او ھچھ حل دی درا کھنغ بیس بی ۔شاید طالبان ائے وٹاژ ہمیں ویچار ائے وجہ آژ امریکہ آ ہمیں منغ نامہ آ آخیری ایں دیم دئے اغ آپا وتی رضامندی پدھر کھزغئے سا او آخیر منغ نامہ دی بیسا مگہ اے تہ طالبان آنی ہماں سروک آنی ویچار اساں ہماں کہ گپتران آ سدھائی آ شریک اساں ۔مگہ اندری ایں افغانستان آ ہماں کہ حونی لیو جزغیں ہمائی آر دیستؤ امریکہ ائے تھنک ٹینک ،سنجیدہ زانتکار،او حوال کار افغانستان ائے اندری ایں حالت آنی جائیزہ گرغ آپا باڑہ اساں او اے زانغ آپا باڑہ اساں کہ افغانستان ائے ہماں دمغ آ طالبان ائے زور ایں یا آں طالبان ائے قوضہ اندرا ایں ،ہموزا تھانگے ماھول ایں او تھانگے ویچار آنی چکا عمل بی غیں ۔ہمیں خطرہ واشنگٹن پوسٹ ائے رپورٹر آنی یک ٹلہ آ افغانستان ائے رودرات سیماں ائے اینگے ضلع آنی اصلیت زانغ ائے کوشست کھزا ہماں کہ مزن ایں عرصہ آژ طالبان کمانڈر او مڑوک آنی پکڑ لافا آں ۔ہمیں ٹلہ آ ہمیں ماہ ائے بنگیج آ مراورا ضلع ائے دؤرہ کھزا ۔مگہ ہمیں ٹلہ طالبان ائے اجازت آ بغیر ہموزا داخل بی اغ آ ناسوب بیسغئے سا۔برحال آنہانر ہمیں ٹؤک ائے اجازت تہ ملسا کہ آں ہموزا رواں او مڑدم آنگو ٹؤک کھناں مگہ ہماں ٹلہ ائے پھجی آ طالبان مڑوک دی گون اساں ۔ہمیں ٹلہ آ محسوس کھزا کہ ہمیں کسنیں ضلع آ دی ہموزا طالبان گوستی ایں نوہ سال آنژ قوضہ کھزی آں ،نظم او نسق جزینغ ائے آں بالکل لائیق نیاں ۔