سرگال گلگت ائے حيثيت بدل کھنغ ائے پاکستاني کوشش آر ھند آ سختي آژ کھزا رد


ہميں مہينہ ائے سري ايں تاريخ آر پاکستان آ گلگت بلتستان آر عارضي صوبہ ائے درجہ ديغ ائے اعلان کھزا ہميں علاقہ آر ہمشي
آژ پيشا شمالي علاقہ ائے نام آژ زانزي آ شز
گلگت بلتستان مقبوضہ کشمير ائے يکھ بہر ايں ہمشي چھکا پاکستان آ ناجائز اين او غير قانوني قبضہ کھزو اير کھزا ہند آ پاکستاني سرے وزير عمران خان ائے ہميں اعلان چھکا بعض رد عمل پدھر کھنغ آگو اسلام آباد ائے گام ائے بعض بد گوشي کھزا
ڈن ائے وزارت ائے ترجمان آ گوشتا کہ نوخين دہلي ہميں ہند ائے علاقہ ائے حثيت آر مٹينغ ائے پاکستاني کوشش آر سختي آژ رد کھنت ہمشي چھکا پاکستان ائے غير قانوني قبضہ اين آں ہي آ پاکستان آژ مطالبہ کھزا کہ ہماں کھل ايں علاقہ آر تکھائي آژ ہورگ کھنت بلي اش آني چھکا ہمشي آ زبردستي قبضہ کھزو اير کھزا
آں ہي آ گوشتا کہ پاکستان ائے اينگے علاقہ آني چھکا ہچھ حق نئيں او حکومت پاکستان ائے نوخين گام آژ ہميں علاقہ لافا جززيں  ايں مڑدمي حقوق آني بعض خلاف ورزي آر لکھيتھي آ نويس بي
واجہ سري واستو آ گوشتا کہ نوزد سز چھل او ہپت لافا جموں او کشمير ائے يونين آف انڈيا ائے پھجي آ قانوني الحاق ائے رو آژ
گلگت بلتستان پھجي آ جموں کشمير ائے مرکز ائے انتظام بنا علاقہ او لداخ ہندستان ائے پکوئيں ايں بہر آں
گلگت بلتستان آر صوبہ ائے درجہ ديغ آپا آئين پاکستان لافا بدل ائے لوٹھغ بي
علاقہ لافا ہژد اگست آر صوبائي اسمبلي آپا گچين کاري بيغ والا ساں ليکن يازد جولائي آر پاکستان ائے گچيني کميشن آ کرونا وائرس ائے وبا ائے پيش نہياہ آں ہار رد کھزو اشتغيسا
گلگت بلتستان يکھ وٹ آ افغانستان تہ دوہمي وٹ آ چين آژ مان بي سي ايں ايزا ائے آبادي يکھ اعشاريہ دو ملين ايں
او ايزا آژ بي سو چين پاکستان معاشي راہداري گزي چين پاکستاني معاشي راہداري ائے روگا بحيرہ عرب لافا پاکستان ائے گوادر بندر گاہ آر شنجيانگ لافا کاشکر آژ جوڑسي آ رو لہزا ہميں منصوبہ لافا گلگت بلتستان خاص ايں کردار ادا کھنت