“အိန္ဒိယ ဗဟိုဘဏ်တိုက်ကြီး RBI က သော့ချက်ကျ အတိုးနှုန်းများ မပြောင်းလဲဘဲ ထားရှိလိုက်ခြင်း”

သောတရှင်များခင်ဗျား၊ ဒီကနေ့ သတင်းဝေဖန်ချက် အခန်းကဏ္ဍမှာ နိုင်ငံတော် ပြည်သူ့ဘဏ္ဍာရေးနဲ့ ပေါ်လစီဌာနမှ ဆောင်းပါးရှင် Dr. Lekha S. Chakraborty ဝေဖန်ရေးသားပေးပို့ထားတဲ့ “အိန္ဒိယ ဗဟိုဘဏ်တိုက်ကြီး RBI က သော့ချက်ကျ အတိုးနှုန်းများ မပြောင်းလဲဘဲ ထားရှိလိုက်ခြင်း” အကြောင်း သတင်းဆောင်းပါးကို ဆက်လက်ဖော်ပြသွားမဲ့အတိုင်း တင်ပြအစီအရင်ခံပါရစေ။

အိန္ဒိယဗဟိုဘဏ်တိုက်ကြီး RBI ရဲ့ ငွေကြေးဆိုင်ရာ ပေါ်လစီကော်မတီ (MPC) က ၎င်းရဲ့ ပဥ္စမမြောက် နှစ်လတကြိမ်ပေါ်လစီ ပြဋ္ဌာန်းချက်ကို ထုတ်ပြန်ခဲ့ပါတယ်။ အဲဒီကော်မတီကို ဗဟိုဘဏ်တိုက်ကြီးရဲ့ အုပ်ချုပ်ရေးအရာရှိချုပ် Dr. Urjit Patel က ဦးဆောင်လျှက် ရှိပါတယ်။ စိတ်ဝင်စားဖွယ် မှတ်ချက်တခုကတော့ အဆင့်မြင့်ဆုံး ဘဏ်တိုက်ကြီးဟာ အတိုးနှုန်းထားတွေကို လက်ရှိအတိုင်း ဆက်လက်ထားရှိဖို့ ဆုံးဖြတ်လိုက်ဒါဘဲ ဖြစ်ပါတယ်။ MPC ဟာ Repo အတိုးနှုန်းကို မပြောင်းလဲဘဲ ၆% အဖြစ် ထားရှိပြီး၊ Reverse Repo အတိုးနှုန်းကို ၅.၇၅% အဖြစ် ဆက်လက်တည်ရှိစေလိုက်ပါတယ်။ ဒါပေမဲ့ ဒီကော်မတီဟာ လက်ရှိဘဏ္ဍာရေးနှစ်ရဲ့ ကျန်ရှိနေတဲ့ ကာလအတွက် ဖေါင်းပွမှု ကြိုတင်ခန့်မှန်းချက်ကို ၄.၃% မှ ၄.၇% အထိ မြင့်တင်ဖော်ပြထားပါတယ်။

အိန္ဒိယနိုင်ငံမှာ ငွေကြေးဆိုင်ရာ ပေါ်လစီကော်မတီကို RBI အက်ဥပဒေ ၁၉၃၄ ရဲ့ ပြင်ဆင်သတ်မှတ်ချက်ကို နောက်ခံထားပြီး၊ အာဏာပိုင်အဖွဲ့တဖွဲ့နဲ့ ပေါ်လစီနှုန်းထားတွေကို ဆုံးဖြတ်ရာမှာ RBI အုပ်ချုပ်ရေးအရာရှိချုပ်တဦးတည်းအစား ဌာနဆိုင်ရာ MPC အဖွဲ့ဝင်များရဲ့ ယန္တရားတခုက ဆုံးဖြတ်ရေးအတွက် ဖွဲ့စည်းတည်ထောင်ခဲ့ဒါ ဖြစ်ပါတယ်။ အိန္ဒိယနိုင်ငံအတွင်း Macro ပေါ်လစီ ချမှတ်ရေးမှာ အဓိကကျတဲ့ ဌာနပိုင်ဆိုင်ရာ ပြုပြင်ပြောင်းလဲမှု တစိတ်တပိုင်းအဖြစ် RBI နဲ့ အိန္ဒိယအစိုးရတို့က NMF (New Monetary Framework) လို့ခေါ်တဲ့ “ငွေကြေးဆိုင်ရာ လုပ်ငန်းဘောင်သစ်” တခုကို လက်မှတ်ရေးထိုးခဲ့ကြပြီး၊ Central Bank ခေါ် ဗဟိုဘဏ်ရဲ့ ရည်မှန်းချက်တွေကိုလည်း ပြန်လည်ရေးသားခဲ့ကြပါတယ်။ အဲဒီဌာနပိုင်ဆိုင်ရာ ပြန်လည်ပြုပြင်တည်ထောင်မှုအပြီးမှာ RBI ရဲ့ တခုတည်းသော ရည်စူးချက်က ဈေးနှုန်းတည်တံ့ရေးကို ထိန်းချုပ်ဖို့ဘဲ ဖြစ်ခဲ့ပါတယ်။ အဲဒီအချိန်ကစပြီး၊ RBI ဟာ ငွေလဲလှယ်မှုနှုန်း ထိန်းချုပ်မှု အလုပ်ခန့်အပ်ရေးနဲ့ ဖေါင်းပွမှုနဲ့အတူ ကြီးထွားမှုတို့နဲ့ပါတ်သက်ပြီး ဘက်စုံ အချက်ပြသူတဦးရဲ့ ချဉ်းကပ်မှုနောက်လိုက်ခြင်းအား ရပ်ဆိုင်းလိုက်ပြီး၊ ဖေါင်းပွမှုကို ပစ်မှတ်ထားနေခြင်း ဆီသို့ ဦးတည်အာရုံပြုခဲ့ပါတယ်။

MPC ရဲ့ ညီတူညီမျှဖြစ်စေတဲ့ ငွေကြေးဆိုင်ရာ ပေါ်လစီကို ၆% သတ်မှတ်ဖို့ ဆုံးဖြတ်ချက်ဟာ ဖေါင်းပွမှုကို ၄% အထိသာ တင်းကြပ်စွာ ထိန်းချုပ်ထားနိုင်ပြီး၊ ပုံမှန်အခြေစိုက်မှုနဲ့ စီးပွားရေး ကြီးထွားမှု ပြန်လည်ခေါင်းထောင်လာခဲ့တဲ့ အကြောင်းရင်းတို့ကြောင့်ဘဲ ဖြစ်ပါတယ်။ GST ၊ ဘဏ်များကို ငွေထပ်မံဖြည့်ဆည်း မတင်မှု၊ ရောင်းဝယ်ဖေါက်ကားရန် လွယ်ကူမှု အဆင့်မြှင့်တင်လာခြင်းတို့အပါအဝင်၊ အစိုးရဲ့ ပြန်လည်ပြင်ဆင်တည်ထောင်ရေး နည်းလမ်းအဖြာဖြာတို့ကို နောက်ခံထားမှုအား ဆန့်ကျင်လျှက် MPC ဟာ စီးပွားရေး ကြီးထွားမှု ခန့်မှန်းချက် ဖြစ်တဲ့ ၂၀၁၈ ခုနှစ် ဘဏ္ဍာရေးနှစ်အတွက် Annual GVA (Gross Value Added) Forecast ခေါ် နှစ်ပါတ်လည် စုစုပေါင်းတန်ဖိုး ပေါင်းစပ်ထားတဲ့ စီးပွားရေးကြီးထွားမှု ကြိုတင်ခန့်မှန်းချက်ကို ၆.၇% အဖြစ် သတ်မှတ်ထားပါတယ်။ ဒီကော်မတီရဲ့ ၂၀၁၇ ခု-၂၀၁၈ ခုနှစ်များအတွင်း ပဥ္မအကြိမ်မြောက် နှစ်လတကြိမ် ငွေကြေးဆိုင်ရာပေါ်လစီ ထုတ်ပြန်ချက်မှာ RBI က ၂၀၁၇ ခု-၂၀၁၈ ခုနှစ် ဘဏ္ဍာရေးနှစ်အတွက် GVA ကြီးထွားမှုနှုန်း အစစ်အမှန်ကို စံတင်ရာမှာ အောက်တိုဘာလ ထုတ်ပြန်ကြေညာချက်ရဲ့ ၆.၇% ကို မကြာသေးမှီက ကမ္ဘာ့ရေနံဈေးနှုန်းတွေ တိုးများလာနေသော်ငြားလည်း စွန့်စားမှု ထပ်တူထပ်မျှနဲ့ ထိန်းသိမ်းထားရှိလိုက်ကြောင်း ဖော်ပြခဲ့ပါတယ်။ ပဥ္မမအကြိမ်မြောက် ငွေကြေးဆိုင်ရာ ပေါ်လစီ ကြေညာစာတမ်းမှာ RBI က ပစ္စည်းအမျိုးအစား ၁၇၈ မျိုးတို့အပေါ် GST နှုန်းထားတွေကို ၂၈% မှ ၁၈%သို့ လျော့ချလိုက်တာကြောင့် သွယ်ဝိုက်အခွန်ငွေရရှိမှု လျော့နည်းလာခြင်း၊ ယစ်မျိုးခွန်တချို့တဝက် ရုပ်သိမ်းခြင်းနဲ့ ရေနံထွက်ပစ္စည်းတွေအပေါ် VAT အခွန် ရုပ်သိမ်းခြင်းနဲ့ တချို့ပြည်နယ်တွေမှာ တောင်သူလယ်သမားတွေရဲ့ အကြွေးအမှီများ ဖျက်သိမ်းမှုတွေကြောင့် “Fiscal Slippage” ခေါ် ငွေကြေးဆိုင်ရာ လွှဲချော်မှုတွေ ဖြစ်နိုင်ဒါကို သတိပေးခဲ့ပါတယ်။ RBI ဟာ Fiscal Slippage က ဖေါင်းပွမှုကို အားဖြည့်ပေးလိမ့်မယ်လို့ မှတ်ချက်ချထားပါတယ်။

အဆိုပါ ငွေကြေးဆိုင်ရာကော်မတီ MPC ရဲ့ အစီအရင်ခံချက်မှာ ကမ္ဘာ့ဘဏ္ဍာရေး ဈေးကွက်တွေနဲ့ အမေရိကန်ဗဟိုဘဏ်၊ အထူးသဖြင့် ပေါ်ပေါက်နေတဲ့ ယိမ်းယိုင်လှုပ်ရှားနေမှုတို့ရဲ့ ဖွံ့ဖြိုးမှုတွေနဲ့ပါတ်သက်ပြီး ၊ မှတ်ချက်တွေ ကောက်ယူထားပြီး၊ အတိုးနှုန်းတွေကို လက်ရှိအတိုင်းထားရှိဖို့ရာ ဆုံးဖြတ်ချက်ချရာမှာ စဉ်းစားချင့်ချိန်ခဲ့ကာ၊ အတိုးနှုန်းကွာခြားမှုကြောင့် ငွေကြေးပမာဏက တိုးတက်ပြီး နိုင်ငံတွေဆီ စီးဝင်သွားမှုကို ရှောင်ရှားစေခဲ့ဒါ ဖြစ်ပါတယ်။ ဒါပေမဲ့ RBI ရဲ့ ကြားနေပေါ်လစီကို ဆက်လက်ထိန်းသိမ်းထားဖို့ ဆုံးဖြတ်ချက်နဲ့ပါတ်သက်ပြီး ၊ မကြေမနပ်ဖြစ်မှုတချို့ ပေါ်ပေါက်လာကာ၊ ပေါ်လစီနှုန်းထားတွေကို လျော့ချမယ်ဆိုရင် ပြည်တွင်းတောင်းဆိုမှုတွေကို ပြန်လည်ရှင်သန်လာစေပြီး၊ စီးပွားရေးကြီးထွားမှု အရှိန်မြှင့်တင်ဖို့ရာ ပုဂ္ဂလိက ရင်းနှီးမြှပ်နှံမှုတွေကို အားပေးနိုင်လိမ့်မယ်လို့ ပြောဆိုနေကြပါတယ်။

သက်သေအထောက်အထားတွေက ဘဏ်တိုက်တွေဟာ ပေါ်လစီ (Repo) နှုန်းထားကို လျော့ချသည့်တိုင် သူတို့ရဲ့ ဘဏ်သွင်းငွေ သို့မဟုတ် ချေးမငွေ နှုန်းထားတွေကို ပြောင်းလဲခြင်း မပြုကြဒါကို ဖော်ပြနေပါတယ်။ ပေါ်လစီကြေညာချက်ရဲ့ အကျိုးအမြတ်ဟာ အိန္ဒိယစီးပွားရေးလောကထဲက Interest rate channel ယန္တရားရဲ့ ထိရောက်မှုများအပေါ် မူတည်နေပါတယ်။ Repo နှုန်းထားကို လျော့ချခြင်းဟာ စီးပွားရေးတိုးတက်မှုကို အားသွန်ပေးလိမ့်မယ်လို့ ယူဆမယ်ဆိုရင် မှန်ကန်မယ်မဟုတ်ပါဘူး။ ဒါကြောင့် ယခုကြေညာချက်ဟာ RBI အုပ်ချုပ်ရေးအရာရှိချုပ် Dr. Urjit Patel ရဲ့ သတိကြီးစွာ ချမှတ်ခဲ့တဲ့ ဆုံးဖြတ်ချက်တခု ဖြစ်ပါတယ်။

MPC ရဲ့ ပေါ်လစီ ဆုံးဖြတ်ချက်ဟာ ကုမ္ပဏီတွေရဲ့ ခံစားချက်ရဲ့ တညီတညွှတ်တည်း ရှိလိမ့်မယ်လို့ မျှော်လင့်ထားပါတယ်။ ဒီဆုံးဖြတ်ချက်နဲ့ ပါတ်သက်ပြီး၊ အပြုသဘောဆောင်တဲ့ သတင်းတွေ ရောက်ရှိနေပါတယ်။ ခေါင်းကြီးပိုင်း ဖောင်းပွမှု တွန်းအားတွေဆီမှ ဖိအားနဲ့ အမေရိကန်ပြည်ထောင်စု ဗဟိုဘဏ်တိုက်ကြီး ဥက္ကဌ Ms Janet Yellen ရဲ့ ဆုံးဖြတ်ချက်တွေ အပါအဝင် ကမ္ဘာလုံးဆိုင်ရာ ငွေကြေးဈေးကွက်ရဲ့ ယိမ်းယိုင်မှု လမ်းကြောင်းတို့ဟာ RBI ကို အတိုးနှုန်းတွေအား လက်ရှိအတိုင်း ထားရှိဖို့ လွှမ်းမိုးခဲ့ပါတယ်။ လွန်ခဲ့တဲ့ နိုဝင်ဘာလအကုန်မှာ ထုတ်ပြန်ခဲ့တဲ့ Ms Janet Yellen ရဲ့ Federal ဗဟိုဘဏ်တိုက်ကြီးရဲ့ ဆုံးဖြတ်ချက်နဲ့ ပါတ်သက်တဲ့ ထောက်ခံချက်မှာ အနာဂါတ်ကာလမှာ Federal ဗဟိုဘဏ်တိုက်ကြီးရဲ့ အတိုးနှုန်းတွေကို နောက်ထပ်တိုးမြှင့်နိုင်တယ်ဆိုဒါကို အရိပ်အမွက် ဖော်ပြထားပြီး၊ အဲဒီလိုပြုလုပ်ခြင်းက ထွန်းကားနေတဲ့ စီးပွားရေးလောကမှာ ငွေကြေးဝင်ရောက်လာဖို့ အလားအလာရှိတယ်လို့ ဖော်ပြထားပါတယ်။ ဒါကြောင့် RBI ဘဏ်တိုက်ကြီးရဲ့ အတိုးနှုန်းတွေ ပြန်လည်ထိန်းသိမ်းထားရှိခြင်းက ပြည်သူပိုင် ဘဏ်လုပ်ငန်းနယ်ပယ်မှာ မကြာသေးမှီက စတင်ခဲ့တဲ့ ကြီးမားတဲ့ ငွေကြေးထောက်ပံ့မတည်ရေး အစီအစဉ်နောက်ပိုင်းအခြေအနေကို ဖော်ပြလိုက်တာဖြစ်ပါတယ်။ ယခုပေါ်လစီဟာ ငွေဝင်မှုကြီးထွားမှု အလုံးစုံနဲ့ ပုဂ္ဂလိက ရင်းနှီးမြှပ်နှံမှုတွေကို အားဖြည့်အရှိန် ရရှိစေလိမ့်မယ်လို့ မျှော်လင့်ရပါတယ်…စသဖြင့် ဆောင်းပါးရှင် Dr. Lekha S. Chakraborty ဝေဖန်ရေးသားထားဒါကို နိဂုံးချုပ် အစီအရင်ခံ တင်ပြလိုက်ရပါတယ် ခင်ဗျား။