‘Gaza ကမ်းမြောင်ဒေသ၌ အကြမ်းဖက်မှုများ တိုးမြှင့်လာနေခြင်း’

သောတရှင်များခင်ဗျား၊ ဒီကနေ့ သတင်းဝေဖန်ချက် အခန်းကဏ္ဍမှာ အရှေ့အလယ်ပိုင်းဆိုင်ရာ ခွဲခြမ်းစိတ်ဖြာလေ့လာသူ ဆောင်းပါးရှင် Dr. Fazzur Rehman Siddiqui ဝေဖန်ရေးသားပေးပို့ထားတဲ့ ‘Gaza ကမ်းမြောင်ဒေသ၌ အကြမ်းဖက်မှုများ တိုးမြှင့်လာနေခြင်း’ အကြောင်း သတင်းဆောင်းပါးကို ဆက်လက်ဖေါ်ပြသွားမဲ့အတိုင်း တင်ပြအစီအရင်ခံပါရစေ။

သမိုင်းဝင် Jerusalem မြို့ကို တောက်ပြောင်တဲ့ ပိုစ်တာ်တွေ၊ ဆိုင်းဘုတ်တွေ၊ ကြွေးကြော်သံကပ်ပြားတွေနဲ့ ချယ်သထားပြီး၊ အမေရိကန်သံရုံးကို Tel Aviv မြို့မှ Jerusalem မြို့သို့ ပြောင်းရွှေ့တဲ့ အခမ်းအနား ကျင်းပနေတုံး တခြားတဖက်မှာ Gaza ကမ်းမြောင်ဒေသမှာ နေထိုင်လျှက်ရှိနေကြတဲ့ ပါကလက်စတိုင်းလူမျိုးတွေဟာ ၂၀၁၄ ခုနှစ် Gaza အကြပ်အတည်းတွေနောက်ပိုင်း အဆိုးဝါးဆုံး အကြမ်းဖက်မှုတွေအောက် ပိတ်မိနေကြပါတယ်။

Jerusalem မြို့မှာ အခမ်းအနားကျင်းပဘို့ စိတ်တက်ကြွနေချိန်မှာ Gaza ခြံစည်းရိုးအနီး အမေရန်ကန်ပြည်ထောင်စုရဲ့ Jerusalem မြို့မှာ သံရုံးဖွင့်ဘို့ တဖက်သတ်ဆုံးဖြတ်ချက်ကို ဆန့်ကျင်ဆန္ဒပြဘို့ ရောက်ရှိနေခဲ့ကြတဲ့ Gaza အရပ်ဒေသမှာ နေထိုင်နေကြသူတွေ စုရုံးရောက်ရှိလာတဲ့အခါ အစ္စရေးလ်ကာကွယ်ရေးတပ်ဖွဲ့တွေက Sniper သေနတ်တွေနဲ့ လူမဲ့ Drone လေယာဉ်တွေနဲ့ တိုက်ခိုက်ခဲ့ဒါကြောင့် အနည်းဆုံး ပါလက်စတိုင်း (၆၀) ခန့် သေဆုံးပြီး၊ တခြားသူ (၂၄၀၀) ကျော်တို့ ဒါဏ်ရာရရှိသွားခဲ့ကြပါတယ်။ အဲဒီပါလက်စတိုင်းလူမျိုးတွေက လွန်ခဲ့တဲ့ ၁၉၄၈ ခုနှစ်မှာ ပါလက်စတိုင်းလူမျိုး အများအပြားတို့က တိုင်းပြည်မှ ထွက်ပြေးသွားခြင်း သို့မဟုတ် နှင်ထုတ်ခံခဲ့ရခြင်း အကြိမ် (၇၀) မြောက် နှစ်ပါတ်လည်အထိမ်းအမှတ်ဖြစ်တဲ့ Nakba ပါလက်စတိုင်းဒုက္ခသည်များနေ့အတွက်လည်း သတိရ ဝမ်းနည်းကြေကွဲနေခဲ့ကြပါတယ်။ ယခုအပါတ်က ဖြစ်ပေါ်ခဲ့တဲ့ အရေးအခင်းဟာ Nakba နေ့ အထိမ်းအမှတ်သို့မဟုတ် အမေရိကန်သံရုံး ဖွင့်လှစ်ခဲ့ဒါကို ဆန့်ကျင်ဆန္ဒပြပွဲမှ ထွက်ပေါ်လာတဲ့ ရလာဒ်သက်သက်မဟုတ်ပါဘူး။ လွန်ခဲ့တဲ့မတ်လကစပြီး၊ နှစ်ဖက်စလုံးတို့မှာ တင်းမာမှုတွေ မြင့်မားလာနေခဲ့ပြီး၊ ပါကလက်စတိုင်းတွေက နေ့စဉ်နေ့တိုင်း ဘိုးဘွားပိုင် မြေနယ်နိမိတ်သို့ ပြန်လာရေး အခွင့်အာဏာကို သရုပ်ဖေါ် ပြသနေခဲ့ကြပါတယ်။ ဒီဆန္ဒပြချီတက်ပွဲကို Return March လို့လည်း လူသိများပါတယ်။

လွန်ခဲ့တဲ့ ၂၀၁၇ ခုနှစ် ဒီဇင်ဘာလအတွင်း Mr. Trump ရဲ့ ရုတ်တရက် ကြေငြာချက်တခုပြုလုပ်ခဲ့တဲ့နောက်ပိုင်း အမေရိကန်ပြည်ထောင်စုက လွန်ခဲ့တဲ့တနင်္လာနေ့က မိမိတို့ရဲ့ သံရုံးကို Tel Aviv မြို့မှ Jerusalem မြို့သို့ တရားဝင် ပြောင်းရွှေ့ခဲ့ပါတယ်။ ယခုလိုပြုလုပ်လိုက်ခြင်းက အစ္စရေးလ်နိုင်ငံဝန်ကြီးချုပ် Mr. Benjamin Netanyahu နဲ့ အစ္စရေးလ်နိုင်ငံတို့အတွက် Mr. Trump က Video နဲ့ သဝဏ်လွှာပေးပို့ ဂုဏ်ပြုခဲ့ဒါနဲ့အတူ သမိုင်းမှတ်တိုင်စိုက်ထူလိုက်တဲ့အခါသမယဖြစ်ခဲ့ပါတယ်။ အမေရိကန်သမ္မတ ယခုကိစ္စအပြီးပြတ်လုပ်ကိုင်ဘို့ရာ အချိန်အတော်ကြာခဲ့တယ်လို့ ဖေါ်ပြခဲ့ပါတယ်။ Washington အစိုးရရဲ့ အမေရိကန်သံရုံးကို Jerusalem မြို့သို့ ရွှေ့ပြောင်းရေးကို ကုလသမဂ္ဂအဖွဲ့ဝင်အများစုတို့က ကန့်ကွက်ခဲ့ကြပါတယ်။ ကြေငြာစာတမ်းတခုမှာ အမေရိကန်ပြည်ထောင်စုရဲ့ အပြုအမူကို ဆန့်ကျင်သောအားဖြင့် နိုင်ငံပေါင်း (၁၂၇) နိုင်ငံတို့က ဆန့်ကျင်မဲ ပေးခဲ့ကြပြီး၊ (၃၅) နိုင်ငံတို့က မဲမပေးခဲ့ကြဘဲ၊ အဖွဲ့ဝင် (၉) နိုင်ငံတို့က အမေရိကန်ပြည်ထောင်စုကို ထောက်ခံခဲ့ကြပါတယ်။ Jerusalem မြို့ရဲ့ အဆင့်အတန်းဟာ အစ္စရေးလ်နဲ့ပါလက်စတိုင်းတို့အပြင်၊ ကမ္ဘာလုံးဆိုင်ရာ လူမှုအသိုင်းအဝိုင်းရဲ့ ခိုင်မာတဲ့ ရပ်တည်ချက်ကလည်း အေးချမ်းတဲ့ နည်းလမ်းနဲ့ ရှာဖွေရေးတို့အတွက် ထင်ရှားတဲ့ အခြေအနေ၊ အဆင့်အတန်းတခု ရရှိစေခဲ့ပါတယ်။

ကုလသမဂ္ဂ အထွေထွေအတွင်းရေးမှူးချုပ် Mr. Antonio Guterres က Gaza အရပ်ဒေသမှာ အဓိကရုဏ်းတွေ တိုးများလာနေခြင်းနဲ့၊ အမေရိကန်ပြည်ထောင်စုက ထင်မြင်ထားတဲ့အတိုင်းဘဲ ကြေငြာစာတမ်း မူကြမ်းကို Veto အာဏာသုံး ဖျက်သိမ်းစေခဲ့ခြင်းတို့အပေါ် စိုးရိမ်မှုကို ဖေါ်ပြခဲ့ပါတယ်။ အဆိုပါ ကြေငြာစာတမ်းမှာ Kuwait နိုင်ငံက ဆင့်ခေါ်ခဲ့တဲ့ ကုလသမဂ္ဂလုံခြုံရေးကောင်စီရဲ့ အရေးပေါ်အစည်းအဝေးပွဲတခုမှာ Gaza ကမ်းမြောင်ဒေသက အရေးအခင်းတွေကို စုံစမ်းစစ်ဆေးဘို့ တောင်းဆိုထားခဲ့ပါတယ်။ UNSC ရဲ့ ကြေငြာစာတမ်းမူကြမ်းမှာ ဆန့်ကျင်ဆန္ဒပြမှုတွေ အေးချမ်းစွာရှိနေရေးကို တောင်းဆိုထားပါတယ်။ ဒါပေမဲ့ အစ္စရေးလ်ဝန်ကြီးချုပ်က အဆိုပါသတ်ဖြတ်မှုတွေကို ‘မိမိကိုယ်ကို ကာကွယ်ရေးဖြစ်တယ်’ လို့ အဓိပ္ပါယ်ဖေါ်ကာ Hamas တွေအား အပြစ်တင်ရှိခဲ့ပါတယ်။ ပြင်သစ်နိုင်ငံကလည်း ယင်းသတ်ဖြတ်မှုကို ရှုတ်ချခဲ့ပြီး ဗြိတိန်နိုင်ငံက အစ္စရေးလ်နိုင်ငံအား စိတ်ရှည်ထား သီးခံထိန်းချုပ်ဘို့ မေတ္တာရပ်ခံခဲ့ပါတယ်။ ဂျာမဏီနိုင်ငံကလည်း အစ္စရေးလ်နိုင်ငံအား အေးချမ်းစွာ ဆန့်ကျင်ဆန္ဒပြခွင့်ကို လေးစားပါရန် ပြောကြားခဲ့ပြီး၊ EU ဥရောပသမဂ္ဂက အလားတူခံစားမိပါတယ်။ Russia နိုင်ငံက Jerusalem အရေးကိစ္စအတွက် တဖက်သတ်ဖြေရှင်းချက် မချနိုင်ဘူးလို့ ဖေါ်ပြခဲ့ပါတယ်။

တူရကီနိုင်ငံက အစ္စရေးလ်နဲ့ အမေရိကန်ပြည်ထောင်စုမှ သူတို့ရဲ့ သံအမတ်တွေ ပြန်ခေါ်ယူဘို့ ဆုံးဖြတ်လိုက်ပါတယ်။ အလားတူ အဓိကကျတဲ့ သံတမန်ရေးရာ အရေးယူမှုတွေ နိုင်ငံအများအပြားတို့မှာ ဖြစ်ပေါ်လျှက်ရှိပါတယ်။ တူရကီအစိုးရက အမေရိကန်ပြည်ထောင်စုမှာလည်း ပါလက်စတိုင်းတွေ သတ်ဖြတ်ခံရမှုအတွက် ထပ်တူထပ်မျှ တာဝန်ရှိတယ်လို့ ဖေါ်ပြခဲ့ပါတယ်။ အလားတူလှုပ်ရှားမှုတခုအနေနဲ့ ပါလက်စတိုင်းအာဏာပိုင်တွေကလည်း သူတို့ရဲ့ သံအမတ်ကို အမေရိကန်ပြည်ထောင်စုမှ ပြန်ခေါ်ယူလိုက်ပါတယ်။ သမ္မတ Mr. Mahmoud Abbas ဟာ စောစောပိုင်းက ပါလက်စတိုင်းတွေဟာ အမေရိကန်ပြည်ထောင်စုကို ရိုးသားဖြောင့်မတ်တဲ့ စေ့စပ်ပေးသူအဖြစ် မယုံကြည်ကြတော့ကြောင်း ဖေါ်ပြခဲ့ပါတယ်။

အိန္ဒိယနိုင်ငံဟာ ပါလက်စတိုင်းအား လွတ်လပ်တဲ့ ကိုယ်ပိုင်အုပ်ချုပ်ရေး အာဏာပိုင်နိုင်ငံတနိုင်ငံအဖြစ် အစ္စရေးလ်နိုင်ငံနဲ့အတူ တည်ရှိသင့်တယ်လို့ မပြောင်းလဲတန်း ရပ်တည်လျှက်ရှိပြီး၊ Jerusalem ရဲ့ အနေအထားကို နှစ်ဖက်စလုံးတို့က သင့်သင့်မြတ်မြတ် ဆွေးနွေးဖြေရှင်းသင့်တယ်လို့ ဖေါ်ပြလျှက်ရှိပါတယ်။ လွန်ခဲ့တဲ့ ၂၀၁၇ ခုနှစ် ဒီဇင်ဘာလအတွင်း ကုလသမဂ္ဂ လုံခြုံရေးကောင်စီမှာ အမေရိကန်ပြည်ထောင်စုရဲ့ Jerusalem မြို့အား အစ္စရေးလ်နိုင်ငံရဲ့ မြို့တော်အဖြစ် သတ်မှတ်ရေးနဲ့ပါတ်သက်ပြီး မဲပေးခဲ့ကြတဲ့အခါ အိန္ဒိယနိုင်ငံက ဆန့်ကျင်မဲပေးတဲ့ နိုင်ငံပေါင်း (၁၂၇) နိုင်ငံထဲ ပါဝင်ခဲ့ပါတယ်။

လက်ရှိ Gaza အရပ်ဒေသမှာ တိုးများလာနေတဲ့ အကြမ်းဖက်မှုတွေဟာ ပါလက်စတိုင်းနဲ့ အစ္စရေးလ်တို့အကြား ဆက်ဆံရေးတွေကို ထိခိုက်နစ်နာစေလျှက်ရှိပြီး၊ ဒီအကြပ်အတည်းကို စောလျင်စွာ အဆုံးသတ်ဖြေရှင်းနိုင်မဲ့ဟန်မရှိပါဘူး။ ဒါ့အပြင် ပေါ်ပေါက်နေတဲ့ အရှေ့အလယ်ပိုင်း အရပ်ဒေသအတွင်းက အခြေအနေကလည်း အေးချမ်းသာယာပြီး၊ တည်တံ့ခိုင်မြဲတဲ့ ဖြေရှင်းချက်တခု ရရှိဘို့ မျှော်လင့်ချက်တွေ ပေးကမ်းခြင်းမရှိပါဘူး စသည်ဖြင့် ဆောင်းပါးရှင် Dr. Fazzur Rehman Siddiqui ဝေဖန်ရေးသားထားတာကို နိဂုံးချုပ် အစီအရင်ခံ တင်ပြလိုက်ရပါတယ် ခင်ဗျား။