2019ರ ಸೆಪ್ಟೆಂಬರ್ 28 ರಂದು ನಡೆದ ಅಫ್ಘಾನಿಸ್ತಾನ ಅಧ್ಯಕ್ಷೀಯ ಚುನಾವಣೆಯ ಫಲಿತಾಂಶವನ್ನು ಫೆಬ್ರವರಿ 18 ರಂದು ಘೋಷಿಸಲಾಯಿತು. ಹಾಲಿ ಅಧ್ಯಕ್ಷ ಅಶ್ರಫ್ ಘಾನಿಯವರು ಈ ಚುನಾವಣೆಯಲ್ಲಿ ಗೆದ್ದಿರುವ ಬಗ್ಗೆ ಘೋಷಿಸಲಾಯಿತು. ಅವರ ಮುಖ್ಯ ಪ್ರತಿಸ್ಪರ್ಧಿ ಡಾ.ಅಬ್ದುಲ್ಲಾ ಅಬ್ದುಲ್ಲಾ ಅವರು ಚುನಾವಣಾ ಫಲಿತಾಂಶಗಳನ್ನು ಸ್ವೀಕರಿಸಲು ನಿರಾಕರಿಸಿದರು. ಚುನಾವಣಾ ಆಯೋಗದ ವಿರುದ್ಧ ವಂಚನೆಯ ಆರೋಪ ಹೊರಿಸಿದ ಅವರು ಮುಂದಿನ ಸರ್ಕಾರ ರಚಿಸುವುದಾಗಿ ಘೋಷಿಸಿದರು. ಮತದಾನ ಪ್ರಮಾಣ ಕಡಿಮೆ ಇತ್ತು ಮತ್ತು ಪ್ರಾಥಮಿಕ ಎಣಿಕೆಯ ಪ್ರಕಾರ ಘಾನಿ ಮುನ್ನಡೆ ಸಾಧಿಸಿದ್ದಾರೆ ಎಂಬುದು ಗೊತ್ತಾದಾಗ ಪ್ರತಿಸ್ಪರ್ಧಿಗಳು ಮತದಾನದ ಶೇಕಡಾವಾರು ಪ್ರಮಾಣವನ್ನು ವಿರೋಧಿಸಿದರು ಮತ್ತು ಇದರ ಪರಿಣಾಮವಾಗಿ ಶೇಕಡಾ 15 ರಷ್ಟು ಮತಗಳನ್ನು ಲೆಕ್ಕಪರಿಶೋಧನೆಗೆ ಒಳಪಡಿಸಲಾಯಿತು. ಅಧ್ಯಕ್ಷ ಘಾನಿ ಅವರು ಚುನಾವಣೆಯಲ್ಲಿ ಅತ್ಯಂತ ಕಡಿಮೆ ಅಂತರದಿಂದ ಜಯಗಳಿಸಿ, ಶೇಕಡಾ 50.64 ಮತಗಳನ್ನು ಗಳಿಸಿದರು.
ಅಂತಿಮ ಫಲಿತಾಂಶ ಪ್ರಕಟಣೆಯ ನಂತರ ಭಾರತ ಮರು ಆಯ್ಕೆಯಾಗಿರುವುದಕ್ಕೆ ಅಧ್ಯಕ್ಷ ಅಶ್ರಫ್ ಘನಿ ಅವರನ್ನು ಭಾರತ ಅಭಿನಂದಿಸಿತು. ಅಫ್ಘಾನಿಸ್ತಾನದ ಜನರ ಪ್ರಜಾಪ್ರಭುತ್ವದ ಆಕಾಂಕ್ಷೆಗಳಿಗೆ ಭಾರತ ತನ್ನ ಬೆಂಬಲವನ್ನು ಪುನರುಚ್ಚರಿಸಿತು ಮತ್ತು ಬಾಹ್ಯ ಪ್ರಾಯೋಜಿತ ಭಯೋತ್ಪಾದನೆಯ ಉಪದ್ರವವನ್ನು ಹೋರಾಡುವಲ್ಲಿ ಮತ್ತು ನಿರಂತರ, ಆಂತರಿಕ ರಾಷ್ಟ್ರೀಯ ಶಾಂತಿಗಾಗಿ ನಮ್ಮ ದ್ವಿಪಕ್ಷೀಯ ಕಾರ್ಯತಂತ್ರದ ಸಹಭಾಗಿತ್ವವನ್ನು ಬಲಪಡಿಸುವಲ್ಲಿ ಹೊಸ ಸರ್ಕಾರ ಮತ್ತು ಪ್ರಜಾಪ್ರಭುತ್ವದ ರಾಜಕೀಯದೊಂದಿಗೆ ಕೆಲಸ ಮಾಡುವುದನ್ನು ಮುಂದುವರಿಸಲು ಬದ್ಧವಾಗಿದೆ. ಅಫಘಾನ್ ನೇತೃತ್ವದ, ಅಫಘಾನ್ ಒಡೆತನದ ಮತ್ತು ಅಫಘಾನ್ ನಿಯಂತ್ರಿತ ಸಾಮರಸ್ಯವನ್ನು ಬೆಂಬಲಿಸಿದೆ.
ಅಫಘಾನ್ ಅಧ್ಯಕ್ಷೀಯ ಚುನಾವಣಾ ಫಲಿತಾಂಶವನ್ನು ವಿರೋಧಿಸುತ್ತಿರುವುದು ಇದೇ ಮೊದಲಲ್ಲ. ಸ್ವಲ್ಪ ಮಟ್ಟಿಗೆ, ಇದು 2014 ರ ಅಧ್ಯಕ್ಷೀಯ ಚುನಾವಣೆಯ ಪುನರಾವರ್ತನೆಯಾಗಿದ್ದು, ಇದರಲ್ಲಿ ಘನಿ ಮತ್ತು ಡಾ. ಅಬ್ದುಲ್ಲಾ ಅಬ್ದುಲ್ಲಾ ಅಭ್ಯರ್ಥಿಗಳಾಗಿದ್ದರು. ಚುನಾವಣಾ ಫಲಿತಾಂಶದ ಬಗ್ಗೆ ಇಬ್ಬರು ಪ್ರತಿಸ್ಪರ್ಧಿಗಳ ನಡುವೆ ವಿವಾದ ಉಂಟಾಗಿದ್ದು, ಎರಡೂ ಕಡೆಯವರು ಒಪ್ಪಿಕೊಳ್ಳಲು ಸಿದ್ಧರಿರಲಿಲ್ಲ. ಆದಾಗ್ಯೂ, ಆ ಚುನಾವಣೆಯ ನಂತರ ಡಾ. ಅಬ್ದುಲ್ಲಾ ಅಬ್ದುಲ್ಲಾ ಅವರನ್ನು ಮುಖ್ಯ ಕಾರ್ಯನಿರ್ವಾಹಕರಾಗಿ ನೇಮಿಸುವ ಹಂಚಿಕೆ ಸೂತ್ರವನ್ನು ರೂಪಿಸಲಾಯಿತು, ಈ ಹುದ್ದೆಯನ್ನು ಸಾಂವಿಧಾನಿಕವಾಗಿ ಅನುಮೋದಿಸಲಾಗಿಲ್ಲ. ಆದಾಗ್ಯೂ, ಇದಕ್ಕೆ ಸಂಸತ್ತಿನ ಅನುಮೋದನೆ ಅಗತ್ಯವಾಗಿತ್ತು. ನಾಲ್ಕು ವರ್ಷಗಳ ವಿಳಂಬದ ನಂತರ ಸಂಸತ್ತಿನ ಚುನಾವಣೆ 2018ರ ಸೆಪ್ಟೆಂಬರ್‌ನಲ್ಲಿ ನಡೆಯಲು ಸಾಧ್ಯವಾಯಿತು. ಚುನಾವಣಾ ಸುಧಾರಣೆಗಳು ಮತ್ತು ವಿಶೇಷ ಚುನಾವಣಾ ಸುಧಾರಣಾ ಆಯೋಗವನ್ನು ಸರ್ಕಾರದ ಕಾರ್ಯಸೂಚಿಯ ಅಂಗವಾಗಿ ಅಂಗೀಕರಿಸಲಾಯಿತು.
ಕಳೆದ ಐದು ವರ್ಷಗಳಲ್ಲಿ, ಅಫ್ಘಾನಿಸ್ತಾನದ ಯೂನಿಟಿ ಸರ್ಕಾರವು ಇಬ್ಬರು ನಾಯಕರ ನಡುವೆ ಸಂಪೂರ್ಣವಾಗಿ ಛಿದ್ರಗೊಂಡಿದೆ. ಇದರಿಂದಾಗಿ ಎರಡೂ ನಾಯಕರು ತಮ್ಮ ಸ್ವಂತ ನಿಷ್ಠಾವಂತರೊಂದಿಗೆ ಅಧಿಕಾರಶಾಹಿಯನ್ನು ಮುಖ್ಯವಾಗಿ ತಮ್ಮದೇ ಜನಾಂಗೀಯ ಗುಂಪುಗಳಿಂದ ಜೋಡಿಸಿ ಇತರ ಸಣ್ಣ ಜನಾಂಗೀಯ ಗುಂಪುಗಳನ್ನು ದೂರವಿಟ್ಟಿದ್ದಾರೆ. ಕೆಟ್ಟ ಪೈಪೋಟಿ ಆಡಳಿತ ಕೊರತೆಗೆ ಕಾರಣವಾಗಿದೆ. ಸರ್ಕಾರಕ್ಕೆ ಸವಾಲಾದ ತಾಲಿಬಾನ್ ಮತ್ತು ಇತರ ಗುಂಪುಗಳ ಸಹಾನುಭೂತಿದಾರರು ಸರ್ಕಾರೇತರ ಜಾಗವನ್ನು ಆಕ್ರಮಿಸಿಕೊಂಡರು.
ಟ್ರಂಪ್ ಆಡಳಿತ ಮತ್ತು ತಾಲಿಬಾನ್ ನಡುವಿನ ಶಾಂತಿ ಒಪ್ಪಂದಕ್ಕೆ ಅಫ್ಘಾನಿಸ್ತಾನ ಸಜ್ಜಾಗುತ್ತಿರುವ ಸಮಯದಲ್ಲಿ ಕಳೆದ ಅಧ್ಯಕ್ಷೀಯ ಚುನಾವಣೆಯ ಫಲಿತಾಂಶಗಳು ಬಂದಿವೆ. ಒಪ್ಪಂದದ ಅಂತಿಮಗೊಳಿಸುವಿಕೆಯು ಏಳು ದಿನಗಳ ಅಗ್ನಿ ಪರೀಕ್ಷೆಯ ಮೂಲಕ ಹಾದುಹೋಗಬೇಕಾಗಿದೆ, ಅಲ್ಲಿ ಎರಡೂ ಪಕ್ಷಗಳು ಹಿಂಸಾಚಾರವನ್ನು ಕಡಿಮೆ ಮಾಡಲು ಪ್ರಯತ್ನಿಸುತ್ತಿವೆ. ಶಾಂತಿ ಒಪ್ಪಂದವು ಯುಎಸ್ ಪಡೆಗಳನ್ನು ಹಂತಹಂತವಾಗಿ ಹಿಂತೆಗೆದುಕೊಳ್ಳಲು ಅನುವು ಮಾಡಿಕೊಡುತ್ತದೆ. ಹೇಗಾದರೂ, ತಾಲಿಬಾನ್ ಅಂತಿಮವಾಗಿ ಅಫಘಾನ್ ಸರ್ಕಾರದೊಂದಿಗೆ ಮಾತುಕತೆ ಪ್ರಾರಂಭಿಸಿದಾಗ ಶಾಂತಿಗೆ ನಿಜವಾದ ಪರೀಕ್ಷೆ ಬರುತ್ತದೆ. ಆದಾಗ್ಯೂ, ತಾಲಿಬಾನ್ ಮತ್ತು ಅಫಘಾನ್ ಸರ್ಕಾರದ ಪ್ರತಿನಿಧಿಗಳ ನಡುವೆ ಹಲವಾರು ಸುತ್ತಿನ ಅನೌಪಚಾರಿಕ ಮಾತುಕತೆ ನಡೆದಿವೆ. ಆದರೆ ನಾಯಕರು ತಮ್ಮ ವೈಯಕ್ತಿಕ ಸಾಮರ್ಥ್ಯದಲ್ಲಿ ಈ ಸಂವಾದಗಳಿಗೆ ಹಾಜರಾಗುತ್ತಿದ್ದಾರೆ ಎಂದು ತಾಲಿಬಾನ್ ಸ್ಪಷ್ಟಪಡಿಸಿದೆ. ಶಾಂತಿ ಒಪ್ಪಂದವನ್ನು ತಲುಪುವ ತಾಲಿಬಾನ್ ಬಯಕೆಯನ್ನು “ಟ್ರೋಜನ್ ಹಾರ್ಸ್ ತಂತ್ರ” ಎಂದು ಅಧ್ಯಕ್ಷ ಘನಿ ಅವರು ಹೇಳಿದ್ದಾರೆ.
ತಾಲಿಬಾನ್, ಇಲ್ಲಿಯವರೆಗೆ, ಅಫಘಾನ್ ಸರ್ಕಾರವನ್ನು ನ್ಯಾಯಸಮ್ಮತವೆಂದು ಒಪ್ಪಿಕೊಂಡಿಲ್ಲ. ಈಗ ಚುನಾವಣಾ ವಿವಾದ, ಘನಿ ಸರ್ಕಾರದ ನ್ಯಾಯಸಮ್ಮತತೆಗೆ ಪ್ರಶ್ನಾರ್ಥಕ ಚಿಹ್ನೆಯನ್ನು ಹಾಕಬಹುದು. ಇದು ಚುನಾವಣೆಯ ಸಂಪೂರ್ಣ ಪ್ರಕ್ರಿಯೆಯನ್ನು ಮತ್ತು ಅಫ್ಘಾನಿಸ್ತಾನದಲ್ಲಿ ಪಾಶ್ಚಿಮಾತ್ಯ ಸ್ಥಾಪಿತ ಪ್ರಜಾಪ್ರಭುತ್ವವನ್ನು ಪ್ರಶ್ನಿಸುತ್ತದೆ. ಈ ವ್ಯವಸ್ಥೆಯನ್ನು ತಾಲಿಬಾನ್ ಮೊದಲಿನಿಂದಲೂ ವಿರೋಧಿಸುತ್ತಿದೆ. ಶಾಂತಿ ಒಪ್ಪಂದದ ತೀರ್ಮಾನವು ಮೂಲೆಗುಂಪಾಗಿರುವ ಸಮಯದಲ್ಲಿ, ಚುನಾವಣಾ ಫಲಿತಾಂಶಗಳ ವಿವಾದವು ಶಾಂತಿ ಪ್ರಕ್ರಿಯೆಯನ್ನು ಪಣಕ್ಕಿಡಬಹುದು. ಅಧ್ಯಕ್ಷ ಘಾನಿಯ ಎದುರಾಳಿಗೆ ವಿವಾದಿತ ಫಲಿತಾಂಶಗಳೇ ಸಹಕಾರಿಯಾಗಬಲ್ಲವು. ತಾಲಿಬಾನ್ ಯುಎಸ್ ರೂಪಿಸಿದ ಶಾಂತಿ ಒಪ್ಪಂದಕ್ಕೆ ಒಪ್ಪುತ್ತಿರುವ ಸಮಯದಲ್ಲಿ ಮತ್ತಷ್ಟು ರಾಜಕೀಯ ಅಸ್ಥಿರತೆ ಮತ್ತು ಹಿಂಸಾಚಾರಕ್ಕೆ ಕಾರಣವಾಗಬಹುದು.
ಲೇಖನ : ಡಾ. ಸ್ಮೃತಿ ಎಸ್. ಪಟ್ಟನಾಯಕ್‌ , ದಕ್ಷಿಣ ಏಷ್ಯಾ ಕುರಿತ ವಿಶ್ಲೇಷಕರು