ବୈଦେଶିକ ମନ୍ତ୍ରୀ ଡକ୍ଟର ଏସ. ଜୟଶଙ୍କର ଏକ ତିନି ଦିନିଆ ଗସ୍ତରେ ଫିନଲ୍ୟାଣ୍ତ ଯାଇଥିଲେ। ମନ୍ତ୍ରୀ ହେବା ପରେ ଏହା ସେହି ଦେଶକୁ ତାଙ୍କର ଥିଲା ପ୍ରଥମ ଗସ୍ତ। ଯଦିଓ 1950 ମସିହା ପରଠାରୁ ଫିନଲ୍ୟାଣ୍ତ ସହିତ ଭାରତର ଉତ୍ତମ ସଂପର୍କ ରହିଆସିଛି । ଫିନଲ୍ୟାଣ୍ତ ଏବେ ୟୁରୋପୀୟ ସଂଘର ଅଧ୍ୟକ୍ଷ ଥିବାରୁ ସନ୍ତ୍ରାସବାଦର ନିନ୍ଦା ପାଇଁ ଆନ୍ତର୍ଜାତୀୟ ସ୍ତରରେ ଭାରତ ସମର୍ଥନ ଲୋଡୁଥିବାରୁ ଏହି ଗସ୍ତ ଅଧିକ ଗୁରୁତ୍ବପୂର୍ଣ୍ଣ କୁହାଯାଇ ପାରେ।

ଶ୍ରୀ ଜୟଶଙ୍କର ଫିନଲ୍ୟାଣ୍ତର ତୁଙ୍ଗ ନେତାମାନଙ୍କ ସହ ସୀମାପାର ସନ୍ତ୍ରାସବାଦ ଉପରେ ଟିକନିଖ ଆଲୋଚନା କରିଛନ୍ତି ।  ଜମ୍ମୁ କଶ୍ମୀରରୁ ଧାରା 370 ଉଚ୍ଛେଦ ପରେ ପାକିସ୍ତାନ ଅନେକ ମନଗଢା କାହାଣୀ ସୃଷ୍ଟି କରୁଥିବା ବେଳେ ଏହି ଆଲୋଚନା ହୋଇଛି। ଭାରତର ବୈଦେଶିକ ମନ୍ତ୍ରୀ ଫିନଲ୍ୟାଣ୍ତର ପ୍ରଧାନମନ୍ତ୍ରୀ ଆନ୍ତି ରିନେ ଏବଂ ତାଙ୍କ ପ୍ରତିପକ୍ଷ ପେକ୍କା ହାଭିଷ୍ଟୋଙ୍କ ସହିତ ଦ୍ୱିପକ୍ଷୀୟ ସଂପର୍କ ଉପରେ ଆଲୋଚନା କରିଛନ୍ତି। ସବୁଜ ଜ୍ଞାନକୌଶଳ ଉପରେ ବିଶେଷ ପ୍ରାଧାନ୍ୟ ଦେଇ ଦ୍ୱିପକ୍ଷୀୟ ସଂପର୍କର ସମୀକ୍ଷା ମଧ୍ୟ କରାଯାଇଛି। 

ଭାରତ ଏବଂ ବିଶ୍ୱ ବିଷୟ ଉପରେ ଫିନିସ ଆନ୍ତର୍ଜାତୀୟ ବ୍ୟାପାର ପ୍ରତିଷ୍ଠାନରେ ଉଦବୋଧନ ଦେଇ ଶ୍ରୀ ଜୟଶଙ୍କର ଭାରତ ଏବଂ ଫିନଲ୍ୟାଣ୍ତ ମଧ୍ୟରେ ଥିବା ସଂପର୍କର ପ୍ରଗାଢତା ଉପରେ ଆଲୋକପାତ କରିଛନ୍ତି। ସେ କହିଛନ୍ତି ଯେ ବିଶ୍ୱ ଏବେ ଜ୍ଞାନଭିତ୍ତିକ ଅର୍ଥନୀତି ଉପରେ ଗୁରୁତ୍ବ ଦେଉଥିବାବେଳେ ଆପୋଷ ସ୍ବାର୍ଥ ବିଜଡିତ ଦୀର୍ଘଗାମୀ ପନ୍ଥା ଗ୍ରହଣକୁ ସୁଦୃଢ କରିବା ଉପରେ ସେ ଧ୍ୟାନ ଆକର୍ଷଣ କରିଥିଲେ।  ଶ୍ରୀ ଜୟଶଙ୍କର ଦୃଢ ଭାବେ କହିଥିଲେ ଯେ ଜମ୍ମୁ କଶ୍ମୀରର ବିଶେଷ ଅଧିକାର ଉଚ୍ଛେଦ କରାଯିବା ପଛରେ ସେଠାରେ ଉତ୍ତମ ଶାସନ ଏବଂ ବିକାଶ ଉଦ୍ଧେଶ୍ୟ ନିହିତ ଅଛି। ଜାତୀୟ ସୁରକ୍ଷା ଉପରେ ସେ କହିଥିଲେ ଯେ ସୀମାପାର ସନ୍ତ୍ରାସବାଦ ଭାରତ ପାଇଁ ଚ୍ୟାଲେଞ୍ଜ ଭାବେ ଉଭାହୋଇଛି ଏବଂ ସନ୍ତ୍ରାସବାଦ ଯୋଗୁଁ ବିଗତ ତିନି ଦଶନ୍ଧି ମଧ୍ୟରେ ପ୍ରାୟ 40 ହଜାର ଭାରତୀୟଙ୍କ ପ୍ରାଣହାନୀ ଘଟିଲାଣି।

ବିଶ୍ୱ ସନ୍ତ୍ରାସବାଦ ଉପରେ ଶ୍ରୀ ଜୟଶଙ୍କର କହିଛନ୍ତି ଯେ ଭାରତ ସନ୍ତ୍ରାସବାଦି ଆକ୍ରମଣର ଅନେକ ଶିକାର ହୋଇଚି ଏବଂ ବିଶ୍ୱର ବିଭିନ୍ନ ଭାଗରେ ସନ୍ତ୍ରାସବାଦ ଆକ୍ରମଣ ଘଟୁଛି।  ଏଣୁ ସନ୍ତ୍ରାସବାଦକୁ ନିନ୍ଦା କରିବା ପାଇଁ ବିଶ୍ୱ ସ୍ତରରେ ଦୃଢ ସ୍ୱରର ଆବଶ୍ୟକତା ରହିଛି। ଆଫଗାନିସ୍ଥାନର ଭବିଷ୍ୟତକୁ ନେଇ ମଧ୍ୟ ଚିନ୍ତା ପ୍ରକଟ କରିଥିଲେ। ଏହା ବ୍ୟତିତ ଉପସାଗରୀୟ ଅଞ୍ଚଳର ସ୍ଥିରତା ମଧ୍ୟ ବାରତ ଚାହେଁ ବୋଲି ସେ କହିଥିଲେ।

ବିଶ୍ୱର ଶକ୍ତିଶାଳି ରାଷ୍ଟ୍ରମାନଙ୍କ ସହିତ ସଂପର୍କକୁ ନେଇ ଶ୍ରୀ ଜୟଶଙ୍କର କହିଥିଲେ ଯେ ଭାରତ ଏହିସବୁ ଦେଶମାନଙ୍କ ସହିତ ଉତ୍ତମ ସଂପର୍କ ବଜାୟ ରଖିବା ଉପରେ ଗୁରୁତ୍ବ ଦେଇଆସୁଛି। ଭାରତ ବୈଦେଶିକ ବ୍ୟାପାରରେ ନିଜର ପ୍ରତିଶ୍ରୁତିବଦ୍ଧତା ତଥା ଏହାର ବିବିଧତାରେ ଏକତାର ମନ୍ତ୍ର ଉପରେ ଗୁରୁତ୍ବ ଦେଇଥାଏ ଏବଂ ଆଞ୍ଚଳିକ ଓ ଆନ୍ତର୍ଜାତୀୟ ରାଜନୀତିର ଏକ ପ୍ରମୁଖ ଭୂମିକା ଗ୍ରହଣ କରୁଥିବା ଭାରତ ଲୋକାଭିମୁଖି ବିକାଶ ଉପରେ ଗୁରୁତ୍ବ ଦେଉଥିବା ସେ କହିଛନ୍ତି।

ଡକ୍ଟର ଜୟଶଙ୍କର ଫିନଲ୍ୟାଣ୍ତର ପ୍ରଥମ ଉପ ବାଚସ୍ପତି ତୁଲୁ ହାତାଇନେନ ଏବଂ  ଫିନଲ୍ୟାଣ୍ତ ପାର୍ଲାମେଣ୍ଟର ବୈଦେଶିକ ବ୍ୟାପାର କମିଟି ସହିତ ଫଳପ୍ରଦ ଆଲୋଚନା କରିଛନ୍ତି। ସେ ରାଷ୍ଟ୍ରପତି ସାଉଲି ନିନିଷ୍ଟୋଙ୍କୁ ମଧ୍ୟ ସାକ୍ଷାତ କରିଛନ୍ତି। ଜୟଶଙ୍କର ମହାତ୍ମା ଗାନ୍ଧିଙ୍କ 150ତମ ଜୟନ୍ତି ପାଳନ ଉପଲକ୍ଷେ ତାଙ୍କର ଏକ ପ୍ରତିମୂର୍ତ୍ତି ସେଠାରେ ଉନ୍ମୋଚନ କରିଛନ୍ତି।

କଶ୍ମୀର ଭାରତର ଆଭ୍ୟନ୍ତରିଣ ମାମଲା ବୋଲି ଭାରତର ଆଭିମୁଖ୍ୟକୁ ଆନ୍ତର୍ଜାତୀୟ ସମର୍ଥନ ମିଳିଛି। ଭାରତ ଏ ସଂପର୍କରେ ଆମେରିକା, ବ୍ରିଟେନ ଏବଂ ରୁ, ପରି ଦେଶମାନଙ୍କ ସହ ଆଲୋଚନା କରି ସକାରତ୍ମକ ସମର୍ଥନ ପାଇଛି। ଶ୍ରୀ ଜୟଶଙ୍କରଙ୍କ ଉଦବୋଧନର ସାରମର୍ମ ହେଉଛି ଯେ ଭାରତ କଶ୍ମୀର ପ୍ରତି ରଖିଥିବା ଆଭିମୁଖ୍ୟ ସ୍ପଷ୍ଟ କରିଛି ଏବଂ ସନ୍ତ୍ରାସବାଦର ଚରାଭୂଇଁ ପାଇଁ ପାକିସ୍ତାନକୁ ସାମଗ୍ରୀକ ଭାବେ ନିନ୍ଦା କରିବାର ଆବଶ୍ୟକତା ରହିଛି। କଶ୍ମୀର ପ୍ରସଙ୍ଗ ଉପରେ ୟୁରୋପୀୟ ସଂଘ ଦୃଷ୍ଟି ରଖିଥିବା କାରଣରୁ ବୈଦେଶିକ ମନ୍ତ୍ରୀ ଜୟଶଙ୍କରଙ୍କ ଏହି ଗସ୍ତର ଗୁରୁତ୍ବ ବଢିଯାଇଛି।

ଆଲେଖ:  ସଂଘମିତ୍ରା ଶର୍ମା

ଭାବାନୁବାଦ:  ରାମଚଂଦ୍ର ନାଥ