ଆମେରିକାର ବୈଦେଶିକ ବିଭାଗ ରିପୋର୍ଟରେ ପାକିସ୍ତାନର ତୀବ୍ର ସମାଲୋଚନା

ଆମେରିକାର ବୈଦେଶିକ ବିଭାଗ 2018 ବର୍ଷ ପାଇଁ ପାକିସ୍ତାନରେ ସନ୍ତ୍ରାସବାଦ ଉପରେ ଏହାର ରିପୋର୍ଟ ଜାରି କରିଛି | ଏହି ରିପୋର୍ଟରେ ସନ୍ତ୍ରାସବାଦ ବିରୁଦ୍ଧରେ ସଂଗ୍ରାମ ଲାଗି ପାକିସ୍ତାନ ଦ୍ଵାରା ଉଚିତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନଥିବା ବିଷୟ ଉଲ୍ଲେଖ କରାଯାଇଛି | ବିଭିନ୍ନ ଦେଶରେ ଆତଙ୍କବାଦର ସ୍ଥିତି ନେଇ ଆମେରିକା କଂଗ୍ରେସ ଦ୍ଵାରା ଆକଳନ କରାଯାଇଛି |

ଏହି ରିପୋର୍ଟ ବିଭିନ୍ନ ପରିପ୍ରେକ୍ଷୀରେ ପାକିସ୍ତାନ ପାଇଁ ସମାଲୋଚନାତ୍ମକ ଅଟେ | ଏଥିରେ କୁହାଯାଇଛି ଯେ ଇସଲାମାବାଦ, ଲସ୍କର-ଇ–ତୋଇବା ଓ ଜୈଶ-ଇ-ମହମ୍ମଦ ସନ୍ତ୍ରାସବାଦୀ ସଙ୍ଗଠନକୁ ପାକିସ୍ତାନରେ ସହାବସ୍ଥାନ କରିବା, ନିଯୁକ୍ତି ଦେବା ଓ ତାଲିମ ଦେବାରୁ ରୋକିବାରେ ବିଫଳ ହୋଇଛି | ଜୁଲାଇ 2018ରେ ସାଧାରଣ ନିର୍ବାଚନରେ ପ୍ରତିଦ୍ୱନ୍ଦିତା କରିବା ପାଇଁ ଲସ୍କର ସଂଗଠନ ସହ ଜଡିତ ଥିବା ସଦସ୍ୟ ମାନଙ୍କୁ ପାକିସ୍ତାନ ସରକାର ଅନୁମତି ଦେଇଥିବା ନେଇ ପ୍ରମାଣ ମିଳିଥିବା ବିଷୟ ମଧ୍ୟ ଏହି ରିପୋର୍ଟରେ ଦର୍ଶାଯାଇଛି | କୁଖ୍ୟାତ ସନ୍ତ୍ରାସବାଦୀ ମାନଙ୍କୁ ଜାତୀୟ ମୁଖ୍ୟସ୍ରୋତରେ ଆଣି ସନ୍ତ୍ରାସବାଦୀ ସଂଗଠନ ଗୁଡିକୁ ରାଜନୈତିକ କ୍ଷମତା ହସ୍ତାନ୍ତରିତ କରିବା ଥିଲା ଏହାର ମୂଳ ଉଦ୍ଦେଶ୍ୟ | ଭାଗ୍ୟ ବଶତଃ ପାକିସ୍ତାନର ନିର୍ବାଚନ କମିଶନ ଏହାକୁ ଅନୁମତି ଦେଇନଥିଲେ | ଅର୍ଥ ହେରଫେର ଓ ସନ୍ତ୍ରାସବାଦ ଅର୍ଥ ଯୋଗାଣ ବିଷୟ ନେଇ ଏହି ରିପୋର୍ଟରେ କୁହାଯାଇଛି ଯେ ଏପରି କାର୍ଯ୍ୟକଳାପ ଅବୈଧ ଘୋଷିତ ହେବା ସତ୍ତ୍ୱେ ମଧ୍ୟ ଏହା ବିରୁଦ୍ଧରେ ଯଥାବିଧି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନାହିଁ ।

ଆଫଗାନିସ୍ତାନ ସମ୍ବନ୍ଧରେ ରିପୋର୍ଟରେ କୁହାଯାଇଛି ଯେ ପାକିସ୍ତାନ, ଆଫଗାନ ସରକାର ଓ ଆଫଗାନ ତାଲିବାନ ମଧ୍ୟରେ କଥାବାର୍ତ୍ତା ଲାଗି ସମର୍ଥନ ଜଣାଇଥିବାରୁ ଏହାର ରାଜନୈତିକ ସମାଧାନ ହୋଇପାରିଲା | କିନ୍ତୁ ଆଫଗାନ ତାଲିବାନ ଓ ହକ୍କାନୀ ନେଟୱାର୍କକୁ ପାକିସ୍ତାନ ସ୍ଥିତ ସୁରକ୍ଷିତ ଆଡ୍ଡାସ୍ଥଳୀରୁ ଆତଙ୍କବାଦୀ କାର୍ଯ୍ୟ ଚଳେଇବା ଓ ଆଫଗାନିସ୍ତାନରେ ଆମେରିକା ଓ ଆଫଗାନ ବାହିନୀକୁ ଧମକ ଦେବାରୁ ପାକିସ୍ତାନ ପ୍ରତିବନ୍ଧିତ କରିନଥିଲା |

ଆର୍ଥିକ କ୍ରିୟାନ୍ବୟନ ଟାସ୍କ ଫୋର୍ସ, ଏଫଏଟିଏଫ ବିଷୟ ନେଇ ରିପୋର୍ଟରେ ଦର୍ଶାଯାଇଛି ଯେ ଜାତିସଂଘ ଦ୍ଵାରା ବେଆଇନ ଘୋଷିତ LeT ଓ ଏହାର ସହଯୋଗୀ ସନ୍ତ୍ରାସବାଦୀ ସଂଗଠନ ଉପରେ ଲଗାମ କସିବାରେ ପାକିସ୍ତାନ ବିଫଳ ହୋଇଛି | ଏହି ସଂଗଠନ ଗୁଡିକ ଏବେ ମଧ୍ୟ ଆର୍ଥିକ ସମ୍ବଳ ଉପଯୋଗ କରି ପାଣ୍ଠି ସଂଗ୍ରହ କରୁଛନ୍ତି | ଏଫଏଟିଏଫ, ଗତବର୍ଷ ଜୁନ ମାସରେ ପାକିସ୍ତାନକୁ ଗ୍ରେ ତାଲିକାଭୁକ୍ତ କରିଥିଲା ଓ ଏହାର ସବିଶେଷ ବୈଠକରେ ପାକିସ୍ତାନକୁ ଏହି ତାଲିକାରୁ ବାହାର କରିବା ପାଇଁ ମନା କରିଦେଇଥିଲା | ପାକିସ୍ତାନ 27ଟି ମାନଦଣ୍ଡ ମଧ୍ୟରୁ ମାତ୍ର 5ଟି ପଏଣ୍ଟ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିଥିବାରୁ ଏଫଏଟିଏଫ ଦ୍ଵାରା ଏହି ନିଷ୍ପତ୍ତି ନିଆଯାଇଥିଲା | ରିପୋର୍ଟରେ ଆହୁରି ମଧ୍ୟ କୁହାଯାଇଛି ଯେ ବିନା ଲାଇସେନ୍ସରେ ଅର୍ଥ ହସ୍ତାନ୍ତରଣ ବ୍ୟବସ୍ଥା ସମଗ୍ର ଦେଶରେ ଜାରି ରହିଛି ଓ ସୀମାପାର ଇଲାକାରେ ସକ୍ରିୟ ଆତଙ୍କବାଦୀ କାର୍ଯ୍ୟକଳାପ ସହ ଆତଙ୍କବାଦ ଅର୍ଥ ଯୋଗାଣ ମଧ୍ୟ ଜାରିରହିଛି | ତେବେ ପରବର୍ତ୍ତୀ ସମୟ ସୀମା ପୂର୍ବରୁ ସନ୍ତ୍ରାସବାଦୀ କାର୍ଯ୍ୟକଳାପ ବିରୁଦ୍ଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପାକିସ୍ତାନ ଏଫଏଟିଏଫକୁ ପ୍ରତିଶ୍ରୁତି ଦେଇଛି |

ସନ୍ତ୍ରାସବାଦର ମୁକାବିଲା ଲାଗି ପାକିସ୍ତାନର 2015 ର ଜାତୀୟ କାର୍ଯ୍ୟକାରୀ ଯୋଜନାର ଉଲ୍ଲେଖ କରି ଆମେରିକା ବୈଦେଶିକ ବିଭାଗ ରିପୋର୍ଟରେ କୁହାଯାଇଛି ଯେ ବ୍ୟାଙ୍କ ଗୁଡିକୁ ସନ୍ଦିଗ୍ଧ ଦେଣନେଣ ନେଇ ସୂଚନା ଦେବା, ପ୍ରତିଷେଧମୂଳକ ଅଟକ ରଖିବା , ଆତଙ୍କବାଦୀ କାର୍ଯ୍ୟକଳାପ ପାଇଁ ମୃତ୍ୟୁଦଣ୍ଡ ଦେବା ଓ ସ୍ଵତନ୍ତ୍ର ସନ୍ତ୍ରାସବାଦୀ ନିରୋଧୀ ଅଦାଲତ ସ୍ଥାପନ କରିବା ନେଇ ନିୟମ ପ୍ରଣୟନ କରାଯାଇଥିବା ସତ୍ତ୍ୱେ ଏହାକୁ କାର୍ଯ୍ୟକାରି କରାଯାଉନାହିଁ | ରିପୋର୍ଟରେ, 2018ରେ ପାକିସ୍ତାନ ଦ୍ଵାରା ଗ୍ରହଣ କରାଯାଇଥିବା ଆତଙ୍କବାଦୀ ବିରୋଧୀ ଅଭିଯାନ ନେଇ ଉଲ୍ଲେଖ କରାଯାଇଥିବା ବେଳେ ସେଠାକାର ପରିସ୍ଥିତି ଉପରେ ସନ୍ତୋଷ ବ୍ୟକ୍ତ କରାଯାଇନାହିଁ |

ତୀବ୍ର ସମାଲୋଚନାର ଶିକାର ହେବା ପରେ ପାକିସ୍ତାନର ବୈଦେଶିକ କାର୍ଯ୍ୟାଳୟ, ଲସ୍କର-ଇ-ତୋଇବା ଓ ଜେଶ-ଇ-ମହମ୍ମଦ ଭଳି ଆତଙ୍କବାଦୀ ସଙ୍ଗଠନ ଉପରେ ଅଙ୍କୁଶ ଲଗାଇବା ପାଇଁ ପର୍ଯ୍ୟାପ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିନଥିବାର ଦୋଷାରୋପ ପ୍ରତି ନିଜର ଅସନ୍ତୋଷ ବ୍ୟକ୍ତ କରିଥିଲା | କୁହାଯାଇଛି ଯେ ଏହି ରିପୋର୍ଟରେ, ଗତ ଦୁଇ ଦଶନ୍ଧିରେ ସନ୍ତ୍ରାସବାଦ ବିରୁଦ୍ଧରେ ସଂଗ୍ରାମ ଲାଗି ପାକିସ୍ତାନ ଦ୍ଵାରା ନିଆଯାଇଥିବା ପଦକ୍ଷେପ ଓ ସେଠାକାର ମୂଳ ସ୍ଥିତି ନେଇ ସମ୍ପୁର୍ଣ୍ଣ ଭାବେ ଅଣଦେଖା କରାଯାଇଛି | ପାକିସ୍ତାନର ବୈଦେଶିକ ବିଭାଗ ଦ୍ଵାରା ଜାରୀ ବିବୃତ୍ତିରେ ଦାବି କରାଯାଇଛି ଯେ ତାଙ୍କର ଏହିପରି ପଦକ୍ଷେପ ଅଞ୍ଚଳରେ କେବଳ ଅଲକାଏଦା ସଂଗଠନର ମୂଳପୋଛ କରିନାହିଁ ବରଂ ବିଶ୍ଵକୁ ଏକ ସୁରକ୍ଷିତ ସ୍ଥଳୀ ଭାବେ ପରିଣତ କରିଛି | କିନ୍ତୁ ପାକିସ୍ତାନ, ଓସାମା ବିନ ଲାଦେନକୁ ଏବୋଟ୍ଟାବାଦର ସେନା ଛାଉଣି ଅଞ୍ଚଳରେ ପାଞ୍ଚ ବର୍ଷ ପର୍ଯ୍ୟନ୍ତ ଆଶ୍ରୟ ଦେଇଥିବା ବିଷୟ ନେଇ କୌଣସି ବିବୃତ୍ତି ଦେଇନାହିଁ | ଏଠାରେ ସ୍ମରଣ କରିଦିଆଯାଇପାରେ ଯେ ଆମେରିକା ବାହିନୀ ଲାଦେନକୁ ସେଠାରେ ଠାବ କରି ମାରିଦେଇଥିଲା | ପାକିସ୍ତାନ ଯଦି ବାସ୍ତବରେ ସନ୍ତ୍ରାସବାଦ ବିରୁଦ୍ଧରେ ସଂଗ୍ରାମ କରିବାକୁ ଚାହୁଁଥାନ୍ତା ତେବେ ଓସାମା ବିନ ଲାଦେନକୁ ଠାବ କରିବାରେ ସହାୟତା କରିଥିବା ଡାକ୍ତର ଶକିଲ ଆଫ୍ରିଦିଙ୍କୁ ଦେଶର ସର୍ବୋଚ୍ଚ ପୁରସ୍କାରରେ ସମ୍ମାନିତ କରିଥାନ୍ତା | ହେଲେ ଏହା ପରିବର୍ତ୍ତେ ଗତ 9 ବର୍ଷ ହେଲା ସେ ପାକିସ୍ତାନୀ ଜେଲରେ ବନ୍ଦୀ ଭାବେ କାଳାତିପାତ କରୁଛନ୍ତି |

ପାକିସ୍ତାନ, ଭଲ ଓ ଖରାପ ସନ୍ତ୍ରାସବାଦୀ ମଧ୍ୟରେ ପ୍ରଭେଦ କରି ସନ୍ତ୍ରାସବାଦର ମୁକାବିଲା କରିବା ଦିଗରେ କିପରି ଦୋମୁହାଁ ରୀତି ଅବଲମ୍ବନ କରୁଛି ତାହା ସର୍ବବିଦିତ | ପାକିସ୍ତାନ, ଭଲ ସନ୍ତ୍ରାସବାଦୀ ଦେଶ ପାଇଁ ଏକ ସମ୍ପତ୍ତି ବୋଲି ଅଭିହିତ କରୁଥିବା ବେଳେ ସନ୍ତ୍ରାସବାଦକୁ ଏହାର ରାଷ୍ଟ୍ର ନୀତିର ଅଂଶ ବିଶେଷ ଭାବେ ବିବେଚନା କରୁଛି | ଇସଲାମାବାଦ ଯେତେଦିନ ପର୍ଯ୍ୟନ୍ତ ସବୁ ପ୍ରକାରର ସନ୍ତ୍ରାସବାଦର ମୂଳୋତ୍ପାଟନ ଲାଗି କଡା କାର୍ଯ୍ୟାନୁଷ୍ଠାନ ଗ୍ରହଣ ନକରିଛି ସେତେଦିନ ପର୍ଯ୍ୟନ୍ତ ସନ୍ତ୍ରାସବାଦର ମୁକାବିଲା ଦିଗରେ ଏହାର ଦାୟିତ୍ଵବୋଧତାକୁ ବିଶ୍ଵସନୀୟ କରିବାରେ ସକ୍ଷମ ହେବ ନାହିଁ |

ମୂଳ ଲେଖା : ଅଶୋକ ହାଣ୍ଡୁ , ରାଜନୈତିକ ଭାଷ୍ୟକାର

ଅନୁବାଦ: ରୀତା ଯୋଶୀ