زموږ په اړه: د بهرنیو خپرونو څانګه

د بهرنۍ پالیسۍ او عامه دیپلوماسي په ډګر کې د بهرنیو خپرونو اساسي رول ارزښت هیڅ ډول توضیحاتو ته اړتیا نلري. ملتونه نورو ته د خپل انځور او لیدلوري د وړاندې کولو په لار کې نړیوالو نشراتو ته ډېر ارزښت ورکوي.

د هند او برتانیه تر منځ د استعماري اړیکو له امله رسنۍ په هند او برتانیه کې نږدې یو وخت پیل شوي دي. همداشان کله چې بي‌بي‌سي په ۱۹۳۸زیږدیز کال کې د لومړي ځل د پاره د یوې بهرنۍ ژبې په توګه په عربي ژبه خپرونې پیل کړې، لږ ورسته آل انډیا راډیو هم په سیمه کې د بهرنیو ژبو د نشراتو یوه سرچینه شوه، چې د ۱۹۳۸ کال د اکتوبر د میاشتې په لومړۍ نېټه یې په پښتو ژبه خپرونې پیل کړې. دا خپرونې په ټوله معنا د دویم نړیوال جنګ په وخت د متحدینو د پروپاګندا په موخه کېدې. د دغو خپرونو اصلي موخه دا وه چې په سیمه کې د جرمنۍ د بلیتڅریګ (Blitzkrieg) په نوم فعالې رادیو مقابله وکړي او همدارنګه یې د نړۍ په دې برخه کې د بي‌بي‌سي هڅې تکمیل کړي. د هندوستان تر خپلواکۍ ورسته د ال انډیا راډیو د بهرنیو خپرونو څانګې ته د یوه نوي ملت او د یوه زاړه تمدن د غږ، د دیپلوماسۍ د یوې الې او د مختلفو پېښو په وخت د پروپاګندا د یوه نوي ماشین په توګه نوی مسوولیت ور د غاړې شو.

د ال انډیا راډیو د بهرنیو خپرونو څانګه د هندوستان او نورې نړۍ ترمنځ یوه ټینګه اړیکه ده، په تېره بیا د هغو هیوادونو سره چېرې چې د هندي وګړو د اوسېدو له امله د هند ګټې د هغو سره تړل شوي دي. هغه هندوستانیان، چې د یوه ښه ژوند په موخه یې لسیزې وړاندې خپل هیواد پرېیښی دی، نن هم د نړۍ په هر ګوټ کې هیله لري‌ تر څو پوه شي، چې د دوی د زوکړې په وطن کې څه تېریږي. په طبیعي ډول د بهرنیو خپرونو څانګه د خپلو بېلابېلو خپرونو په ترڅ کې د مهمو ملي او نړیوالو مسایلو په اړه د هندوستان لیدلوری خپروي.

د ال انډیا راډیو د بهرنیو خپرونو څانګه په سلو هیوادونو کې په ۲۷ ژبو د خپرونو له امله په نړیواله کچه د بهرنیو خپرونو په راډیویي شبکو کې یوه معتبره شبکه ده. ال انډیا راديو د خپلو بهرنیو خپرونو له لارې هڅه کوي تر څو د نړۍ په لرې پرتو سیمو کې شته اوریدونکي په اړیکه کې وساتي. اوس وخت ال انډیا راډيو د بهرنیو اورېدونکو د پاره په انګریزي، فرانسوي، روسي، سواهېلي، عربي، پارسي، پښتو، بلوڅي، تبیتي، چینایي، تایلنډي، برماوي، د اندونیزیابهاشایي او نورو ژبو خپرونې کوي. همدارنګه په هندي، ‌بنګالي، تامیل، تیلګو، ملیالم، کنډ او ګجراتي ژبه د نړۍ په هره برخه کې میشته هندوستانیانو ته خپرونې کوي، سربېره پر دې د اردو، پنجابي، سندهي، سرایکی، سېنهالا او نیپالي ژبو خپرونې د هند په نږدې ګاونډ کې میشته اورېدونکو ته ارزښتمنې دي. د بهرنیو خپرونو څانګې تر ډېره په خپلو خپرونو کې د خبري ټولګو، تبصرو، روانوچارو او هندي مطبوعاتو ته د کتنې په څېر توکو ته ځای ورکوي. خو سربېره پر دې لنډ خبرونه، د سپورټ او ادبیاتو په اړه راډیویي مجلې، د ټولنیز اقتصاد، سیاست، تاریخ، ساینس او کلتوري توکو په اړه مرکې او بحثونه، په پرمختیایي چارو، مهمو پېښو او بنسټونو په اړه فیچرونه او د هندوستان کلاسیکه، فلکلور او نوې موسیقي د ال انډيا راډیو د نشراتو لوبه برخه جوړوي.

د بهرنیو خپرونو د څانګې د ټولو خپرونو د منځپانګې هڅه د یوه ځواکمن، سیکولر، دیموکراتیک او جمهوري هند انځورول دي، کوم چې د اقتصاد، صنعت او ټکنالوژي د پراختیا په ماموریت کې د پرمختګ په موخه لا ډېر فعال او خوځنده دی. په دې ډول د هندوستان پراخ تخنیکي ځواک، د هغه لاسته راوړنې او د چاپېریال توازن په یوه ډول د اسان بحث د پاره وړاندې کیږي. همدارنګه په عدم تشدد د هندوستان باور، نړیوالې سولې او بشري حقونو ته د هغه ژمنتیا او د نړیوال اقتصاد په ډګر کې د یوه نوي ترتیب په پنځولو کې د هندوستان برخه اخیستنه هم په یو ډول تر بحث لاندې نېول کیږي. د بهرنیو خپرونو څانګه د کلتوري تبادلې پروګرام لا لارې ۲۵ بهرنیو خپرنیزو ارګانونو ته موسیقي، خبرې او د دواړو توکو ګډ خپرنیزتوکي تولیدوي او توزیع کوي.

 

 

د بهرنیو خپرونو څانګې ټرانسمېټر د سارک هېوادونو، لودیځې اسیا، د خلیج او سویلي اسیا هیوادونو ته د شپې د نهو بجو د انګریزي ژبې خبري سرویس، چې په اصل کې د کورني سرویس د پاره جوړ شوی وي هم خپروي. له دې پرته د بهرنیو خپرونو څانګه په ټوله نړۍ کې د خپلو ټولو ټرانسمېټرونو څخه د ورځې د مهمو پېښو خبرونه، تبصرې او د مطبوعاتو کتنې خپروي.