நாளேடுகள் நவில்வன.

”அமெரிக்காவுக்கு அஞ்சாத இந்தியா” என்ற தலைப்பில் தினத்தந்தி தமிழ் நாளேடு தலையங்கம் வெளியிட்டுள்ளது. அதில்,

“‘நாமார்க்கும் குடி அல்லோம், நமனை அஞ்சோம்’ என்று திருநாவுக்கரசர் எழுதிய ஒரு பாடல் உண்டு. அதன் பொருள், ‘நாம் யாருக்கும் அடிமைகள் அல்ல, எமனுக்கும் பயப்படமாட்டோம்’ என்பதுதான். இந்த பாடலின் உட்பொருளைத்தான் பிரதமர் நரேந்திர மோடி அரசு உலகத்துக்கு பறைசாற்றி வருகிறது.

ஈரான் நாட்டின் மீது வருகிற நவம்பர் 4-ந்தேதி முதல் பொருளாதார தடை விதிக்கப்போவதாக ஏற்கனவே அமெரிக்கா அறிவித்துள்ளது. இதன்படி, ஈரான் நாட்டுடன் வர்த்தகம் மேற்கொள்ளும் நாடுகள் மிக கடுமையான நடவடிக்கைகளை எதிர்நோக்கவேண்டும் என்றநிலையில் ஏற்கனவே அச்சுறுத்தி உள்ளது. இந்த பொருளாதார தடை ஈரானுக்கும் அதிக பாதிப்பை ஏற்படுத்தும் என்றாலும், ஈரானின் முக்கிய ஏற்றுமதி பொருளான கச்சா எண்ணெயை நம்பி இந்தியா போன்ற நாடுகள் பெரிதும் இருக்கின்றன.

அணு ஆயுத உற்பத்தி தடை தொடர்பாக 2015-ம் ஆண்டு செய்து கொண்ட ஒப்பந்தத்தை ஈரான் மீறியதாககூறி, இந்த பொருளாதார தடையை அமல்படுத்தப்போவதாக அமெரிக்கா பிரகடனப்படுத்தியுள்ளது. இந்தியா கச்சா எண்ணெய் இறக்குமதி செய்யும் நாடுகளில் ஈரான் 3-வது இடத்தில் இருக்கிறது. எனவே, அமெரிக்கா விதித்துள்ள பொருளாதார தடையை இந்தியாவால் நிச்சயமாக அமல்படுத்த முடியாது. இந்தநிலையில், ஈரான் நாட்டிலிருந்து அடுத்த மாதம் 90 லட்சம் பீப்பாய் கச்சா எண்ணெயை இறக்குமதி செய்வதற்கான ஒப்பந்தத்தை ஈரானோடு, இந்திய பொதுத்துறை எண்ணெய் நிறுவனங்கள் மேற்கொண்டு இருக்கின்றன. இதில் பெரிய லாபம் என்னவென்றால், இதுவரையில் ஐரோப்பிய வங்கிகள் வழியாக யூரோ மூலம் இந்த எண்ணெய் வாங்கப்பட்டுள்ளநிலையில், இப்போது ரூபாய் மூலமாக வர்த்தகம் செய்ய முடிவெடுக்கப்பட்டுள்ளது. கச்சா எண்ணெய்க்காக இந்தியா கொடுக்கும் ரூபாயை, இந்தியாவில் இருந்து உணவு தானியங்கள், மருந்து பொருட்கள் போன்றவற்றை வாங்கி தங்கள் நாட்டில் இறக்குமதி செய்வதற்கு ஈரான் பயன்படுத்திக் கொள்ள இருக்கிறது. அமெரிக்காவின் எச்சரிக்கையை ஈரானில் மட்டும் இந்தியா புறக்கணிக்கவில்லை.

ரஷியாவுடன் வர்த்தகம் மேற்கொள்ளும் நாடுகள் மீதும் நடவடிக்கை எடுக்கப்படும் என்று அமெரிக்கா விடுத்த எச்சரிக்கையை மீறி, இந்திய ராணுவத்தின் பயன்பாட்டுக்காக ரஷியாவிடம் இருந்து ரூ.40,300 கோடி அளவுக்கு எஸ்.400 ரக ஏவுகணைகள் வாங்குவதற்கு இந்தியா வந்திருந்த ரஷிய அதிபர் புதின், பிரதமர் மோடி முன்னிலையில் ஒப்பந்தம் கையெழுத்தாகி உள்ளது. ரஷியாவிடமிருந்து ஏவுகணைகள் வாங்குவது உள்பட 8 ஒப்பந்தங்களில் இந்தியாவும்-ரஷியாவும் கையெழுத்திட்டுள்ளன. இந்தியாவின் பாதுகாப்புக்கு எஸ்.400 ரக ஏவுகணைகள் மிக பயன்தரும் ஒன்றாகும். 400 கி.மீட்டர் தூரத்திலிருந்து எதிரி போர் விமானங்கள் வரும்போது இந்த ஏவுகணையால் அதை தாக்கமுடியும். இந்த ஏவுகணையை கனரக வாகனங்களுடன் இணைக்க முடியும் என்பதால், எந்த இடத்துக்கும் எளிதில் கொண்டு சென்று 32 இலக்குகளை குறிவைத்து 72 ஏவுகணைகளை செலுத்த முடியும். அமெரிக்கா மீட்டும் இசைக்கு எல்லாம், நடனம் ஆடாமல் பிரதமர் மோடி மிகதுணிச்சலாக எடுத்துள்ள இந்த நடவடிக்கை நிச்சயமாக ஒவ்வொரு இந்தியனையும் நெஞ்சை நிமிர்த்தி பெருமிதம் கொள்ள வைக்கிறது.”

என்று குறிப்பிட்டுள்ளது.

”ரஷ்யாவுடன் ஒப்பந்தம்: ராஜீய உறவுகளில் இந்தியாவின் சமநிலை!”

என்ற தலைப்பில் ஹிந்து தமிழ் நாளிதழ் தலையங்கம் வெளியிட்டுள்ளது. அதில்,

”ராணுவத் தளவாடங்கள், விண்வெளித் துறை உட்பட ரஷ்யாவுடன் இருபதுக்கும் மேற்பட்ட ஒப்பந்தங்களைச் செய்துகொண்டிருப்பதன் மூலம், தனது ‘அணி சாரா’ தன்மையையும் வெளியுறவு ராணுவத் துறைகளில் கடைப்பிடிக்கும் சுதந்திரக் கொள்கைகளையும் இந்தியா மீண்டும் உறுதிசெய்திருக்கிறது. சீனாவும் பாகிஸ்தானும் ரஷ்யாவை ராணுவரீதியாக நெருங்கும் வேளையில், அமெரிக்காவுடன் மட்டும்தான் இந்தியா நட்புறவைப் பேணுகிறது என்ற எண்ணத்தை மாற்றவும் இந்த ஒப்பந்தங்கள் வழிசெய்துள்ளன.

இந்த ஒப்பந்தங்களின்படி, ‘எஸ்-400’ ஏவுகணைகள் தொகுப்பை ரஷ்யாவிடமிருந்து இந்தியா வாங்குகிறது. வான் வழி ஏவப்படும் எந்தவித ஆபத்தையும் அடையாளம் கண்டு வழியிலேயே மறித்து அழிக்கும் திறன் கொண்ட இந்த ஏவுகணைகள் ரூ.40,000 கோடியில் வாங்கப்படுகின்றன. ‘எஸ்-400’ ஏவுகணைகள் ஒப்பந்தம் சர்வதேச அரங்கில் ஏற்படுத்தவிருக்கும் புவிஅரசியல் விளைவுகள் குறிப்பிடத்தக்கதாக இருக்கும் என்று சொல்லலாம். ரஷ்யாவுடனான ராணுவ ஒத்துழைப்பை மேலும் சில துறைகளில் ஆழப்படுத்த விரும்புவதை இதன் மூலம் வெளிப்படுத்தியிருக்கிறது இந்தியா.

ரஷ்யா, ஈரான் ஆகிய நாடுகளுடன் ராணுவ, வர்த்தக உறவு வைத்துக்கொண்டால் பொருளாதாரத் தடை நடவடிக்கைகளை எதிர்கொள்ள நேரிடும் என்று அமெரிக்கா பிற நாடுகளை எச்சரித்திருந்த நிலையிலும், இந்த ஒப்பந்தங்கள் கையெழுத்தாகியிருப்பது குறிப்பிடத்தக்கது. அமெரிக்காவிடமிருந்து ராணுவத் தளவாடங்களை அதிக அளவில் கொள்முதல் செய்யும் இந்தியா, எந்த நாட்டுக்கும் கட்டுப்பட்டதல்ல என்பது இச்செயலால் நிரூபிக்கப்பட்டிருக்கிறது.

இந்தியப் பாதுகாப்புத் தேவைகளுக்கானவற்றை உரிய நாடுகளிடமிருந்து பெறும் சுதந்திரத்தை விட்டுத்தர இந்தியா தயாராக இல்லை. ‘எஸ்-400’ ஏவுகணைகளை இந்தியா பேரம் பேசியபோது ஹெலிகாப்டர்கள், ரகசியமாகப் பறந்துசென்று தாக்கும் போர் விமானங்கள், துப்பாக்கிகள் போன்றவற்றைத் தங்களிடமிருந்தே வாங்கிக்கொள்ளுமாறு ரஷ்யா வற்புறுத்தியது. இந்தியா அதை ஏற்கவில்லை என்பது குறிப்பிடத்தக்கது.”

என்று குறிப்பிட்டுள்ளது.

 

 

 

 

 

 

Pin It